Hametin Relasaun Bilateral & Kooperasaun ! PR Horta Vizita Xina & Vietnam
![](https://sapnewstl.com/wp-content/uploads/2024/07/IMG-20240727-WA0026.jpg)
Imajem : Presidente Repúblika José Ramos Horta iha aeroportu internasionál Nicolau Lobato Comoro, 27/07/2024. Foto : Média PR
SAPNewsTL, Dili – Prezidente Repúblika José Ramos-Horta, hala’o vizita estadu ba Repúblika Popular Xina no Repúblika Sosialista Vietnam. Objetivu husi vizita ida ne’e mak atu hametin relasaun bilaterál, promove kooperasaun ekonómika, no haforsa parserias rejionál sira.
Vizita estadu Prezidente Ramos-Horta nian ba Xina sei hahú iha loron 29 to’o 31 Jullu. Vizita ne’e sei hahú ho serimónia benvindu ofisiál no serimónia tau koroa. Prezidente Ramos-Horta sei partisipa iha série sorumutu nivel aas ho lider xave Xina nian sira, inklui Prezidente Xi Jinping, Primeiru-Ministru Li Qiang, no Prezidente Kongresu Nasionál Populár, Zhao Leji.
Eventu xave sira iha vizita Prezidente Ramos-Horta nian ba Xina sei inklui enkontru bilateral ho Prezidente Xi Jinping. Akordu importante balun inklui Planu Kooperasaun entre Governu Xina no Timor-Leste kona-ba Inisiativa Belt and Road (BRI), Akordu Servisu Aéreu, no kooperasaun iha área agrikultura no media sei asina.
Prezidente Repúblika mós sei partisipa iha jantar estadu ne’ebé organiza husi Prezidente Xi Jinping. Durante vizita estadu ne’e, Prezidente sei hato’o diskursu importante iha Fórum Negósiu kona-ba oportunidade investimentu.
“Oportunidade Investimentu Timor-Leste nian, aprezenta perspetiva investimentu ba investidór potensiál sira husi Xina no kria oportunidade networking ba empreza sira husi nasaun rua ne’e”dehan Prezidente ba Jornalista sira iha Aeroportu Nicolaou Lobato, 27/07/24.
![](https://sapnewstl.com/wp-content/uploads/2024/07/IMG-20240727-WA0021.jpg)
Presidente Repúblika José Ramos Horta
Iha loron 31 fulan-Jullu, Prezidente sei desloka ba Vietnam ba vizita estadu husi loron 1 to’o 4 Agostu. Iha Vietnam, Prezidente Ramos-Horta sei simu ho serimónia ofisiál.
Enkontru nivel aas sira planeadu ona ho Sekretáriu-Jerál Partidu Komunista no Prezidente Vietnam, To Lam, Primeiru-Ministru Pham Minh Chinh, no Ministru Negósiu Estranjeiru Bui Thanh Son.
Diskusaun hirak ne’e ho objetivu atu hametin ligasaun diplomátika no esplora área kooperasaun mútua. Prezidente mós iha ajenda atu sai sasin ba asinatura akordu bilateral sira, ne’ebé subliña kompromisu atu hametin relasaun entre nasaun rua ne’e.
Prezidente Ramos-Horta deklara, “Vizita ida ne’e reprezenta pasu signifikativu ba Timor-Leste iha promosaun ligasaun besik liu ho Xina no Vietnam no promosaun ita nia interese komún iha rejiaun. Ami hein atu hakle’an ami nia parserias no esplora dalan foun ba kooperasaun ne’ebé sei fó benefísiu ba ita nia nasaun, kontribui ba estabilidade no prosperidade rejionál.”
Bainhira Timor-Leste kontinua hari’i ninia relasaun internasionál, vizita estadu ida ne’e marka etapa importante ida iha esforsu diplomátiku nasaun nian no nia buka ba kooperasaun ekonómika no polítika ne’ebé boot liu iha Ázia.
Jornalista: João Marito