Hamutuk Hametin Konfiansa ! PR Horta Orgullu Ho Operasionalidade PNTL & F-FDTL
Imajem : Prezidente Repúblika José Ramos Horta iha CFP Comoro, 11/03/2025. Foto : Média-GPR
SAPNewsTL, Dili – Presidente da Republika José Ramos Horta orgulhu ho servisu Polisia Nasional Timor-Leste (PNTL) no FALINTIL Forsa Defeza Timor-Leste (F-FDTL) tanba hatudu operasionalidade ne’ebe diak tebes.
Xefe Estadu fo sai lia hirak ne’e ba jornalista sira, hafoin partisipa aniversáriu Polísia Nasional Timor-Leste ba dala XXV ho tema “Hamutuk Hametin Konfiansa”.iha Centro Gormação Policia (CFP) Comoro Dili, Tersa-Feira, loron 11 fulan Marsu.
“Ha’u orgulhu ba ita nia forsa PNTL, F-FDTL no mos institusaun sira seluk, ita labele haree no kompara deit sira seluk pior liu, ne’e lae, maibe ita nia operasionalidade ita nia polisia ho F-FDTL diak tebes”.
Xefe Estadu ne’e fo parabens ba PNTL, Nia orgulhu ho atuasaun operasionalidade no komportamentu PNTL no FFDTL di’ak tebes.
“Ha’u halo avaliasaun no observasaun, ha’u bele hatete loron ida ne’e, parabens ba PNTL no F-FDTL servisu desde 1999 to’o ohin loron haksoit ba oin “. Dehan PR Horta iha Centro Formação Policia Comoro.
Aleinde ida ne’e, Chefe Estadou mos fo obrigadu barak ba PNTL no F-FDTL bele hala’o servisu ba populasaun ho diak.
“Obrigadu ba sira servisu ne’ebe diak, fo ba ita possibilidade para toba hakmatek populasaun bairo-bairo sira”.
Ministru Presidénsia Konselhu Ministru, Agio Pereira hatutan PNTL hanesan instituisaun estadu ninian atu tau matan ba populasaun iha Territoria Nasional Timor Leste, oras 24 sira responsavel boot tebtebes.
“Ha’u nia felisitasaun ba organizadores hotu tanba dehan katak hamutuk jametin konfiansa, konfiansa populasaun ba PNTL ne’e krusial tebes para PNTL iha ligitimidade atu bele uza forsa para atu servi nasaun”. Hateten Agio Pereira
Aleinde ida ne’e, Ministru Interior Francisco da Costa Guterres hatutan kona ba Presidente da Repúblika nia kestaun mak povunnia konfiansa.
“Kestaun importante mak ne’e, ohin Presidente Repúblika mai hato’o importante ida ba ita hotu katak, povo nia konfiansa ne’e mak fator determinante atu PNTL hala’o servisu”. Francisco da Costa Guterres
Entertantu, Ministru Interior Francisco Guterres husu ba PNTL atu buka oinsa desenpenha papel ne’ebe diak hala’o nia servisu diak liu hosi uza ho elementu prinsipal rua dixiplina no obediénsia ba ierarkia hodi tane nafatin konfiansa ne’ebe povu fo hela ba sira.
Jornalista : Vinsensius Saldanha Morais De Araujo
