Harahun Fatin Nuklear 3 Iha Iran ! Trump Fo Parabens Ba Militar Sira

Imajem : Presidente Estados Unidos América Donald J. Trump iha Uma Mutin EUA, 21/06/2025. Foto : The White House

SAPNewsTL, América : Presidente Estados Unidos América (EUA) Donald J. Trump deklara militar EUA nia atake maka’as rezulta fatin instalasaun nuklear xave tolu iha Iraun hetan ona destruisaun.

Marciana da Conceição – SAP News TL

“Iha tempu badak liubá militár EUA nian hala’o atake maka’as ba instalasaun nukleár xave tolu, iha rejime Iraun nian Fordow, Natanz no Eshfan. Ema hotu rona naran sira-ne’e durante tinan barak, bainhira sira hari’i empreza destrutivu ida-ne’e”. Hateten Presidente EUA Donald J. Trump iha Uma Mutin EUA, 21/06/2025. Sita The White House

“Ami nia objetivu maka destruisaun ba kapasidade enrikesimentu nukleár Iraun nian no hapara ameasa nukleár ne’ebé maka hamosu hosi patrosinadór estadu númeru 1 iha mundu ba Terror”.

“Ohin kalan ha’u bele relata ba mundu katak atake sira maka susesu militár espetakulár ida. Iraun nia instalasaun xave sira enrikesimentu nukleár nian hetan ona kompletamente no totalmente halakon iha Iraun”.

“Agora tenke hari’i dame, se sira la halo atake sira iha futuru, durante tinan 40, Iraun hatete mate ba Amérika, mate ba Israel. Sira oho ona ami nia ema ho bomba sira iha estrada ninin liliu ami lakon ema liu 1,000 no rihun atus ba atus iha Médiu Oriente no mundu tomak mate hosi sira-nia ódiu liuliu barak maka mate hosi sira-nia jenerál Qasem Soleimani.

“Ha’u deside ona iha tempu uluk katak ha’u sei la husik ida-ne’e akontese, ida-ne’e sei la kontinua, ha’u hakarak agradese no kongratula Primeiru-Ministru Bibi Netanyahu, ami serbisu hanesan ekipa ida hanesan karik laiha ekipa ida maka serbisu antes no ami la’o dook ona atu hamoos ameasa aat ida-ne’e ba Israel”.

“Ha’u hakarak agradese ba militár Israel ba serbisu furak ne’ebé sira halo no importante liu maka patriota sira, ha’u hakarak kongratula patriota boot Amerikanu, ne’ebé maka lori mákina furak sira-ne’e ohin kalan no militár Estadus Unidus nian tomak iha operasaun ida hanesan ne’ebe mundu seidauk haree iha dékada barak”.

“Ha’u spera katak, ita sei la presiza ona sira nia servisu iha kapasidade ida-ne’e, ha’u mós hakarak kongratula prezidente Xefe Estadu-Maiór Konjuntu Jenerál Dan Raising Cane, jenerál espetakulár no hotu-hotu hosi militár sira ne’ebé matenek hodi envolve iha atake ida-ne’e ho buat hotu”.

“Ida-ne’e labele kontinua, ita sei iha dame ka sei iha trajédia ba Iraun boot liu duké ita haree iha loron ualu ikus ne’e, hanoin katak iha alvu barak maka sei iha. Kalan ida-ne’e maka susar liu hotu no karik letal liu maibé se dame la mai lalais”.

“Ami sei buka tuir alvu sira seluk ho presizaun, velosidade no abilidade, barak liu bele hasai iha minutu balun nia laran, laiha militár iha mundu ne’ebé bele halo saida maka ami halo ohin kalan, nunka iha militár ida ne’ebé bele halo saida maka akontese iha tempu uitoan liubá”.

“Aban Jenerál Kane Sekretáriu Defeza Pete Hegseth sei iha konferénsia imprensa iha tuku 8:00 dadeer iha Pentágonu no ha’u hakarak agradese de’it ba ema hotu no liuliu ba Maromak. Ha’u hakarak hatete de’it katak ami hadomi Maromak no ami hadomi ami nia militár, Maromak haraik bensaun ba Médiu Oriente, bensaun ba Israel no Amérika”.

Antes ne’e, Presidente EUA Donald J. Trump hakerek liu hosi nia pajina katak sira-nia parte susesu halo atake ba fatin nuclear tolu iha Iraun.

“Ami kompleta ona ami nia atake susesu tebes iha fatin Nukleár tolu iha Iraun, inklui Fordow, Natanz, no Esfahan. Aviaun hotu-hotu agora iha liur hosi espasu aéreu Iraun nian. Karga kompletu ida ho bomba sira soe iha fatin prinsipál, Fordow.

Trump sita oras ne’e aviaun hotu-hotu seguru iha dalan hodi fila fali ba América, nune’e Trump parabeniza ninia militar sira tanba susesu iha misaun.

“Aviaun hotu-hotu iha dalan seguru iha sira nia dalan atu fila ba uma. Parabéns ba ami nia Funu-na’in Amerikanu boot sira. Laiha militár seluk iha Mundu ne’ebé maka bele halo ida-ne’e.

Presidente Estados Unidos América Donald J. Trump deklara katak tempu ona ba hari’i paz.

“Tempu Ba Paz ! Obrigado ba Ita-boot nia atensaun ba asuntu ida-ne’e.” –Prezidente Donald J. Trump

Fo hanoin fali katak funu entre Iraun no Israel rezulta infra-estruturas barak hetan estragus, sidadaun balun mate no halo komunidade Internasional pániku no preokupa tanba funu refere bele fo impaktu ka ameasa ba sira-nia vida.