Idul-Fitri Ba 1446 H ! Okto : Musulmanu Kontribui Ba Armonia & Desenvolvimentu
Imajem : Embaixador Indonesia iha Timor-leste Okto Dorinus Manik iha Masjid An-Nur, Kampu-Alor, Segunda (31/03/2025)
SAPNewsTL, Díli – Prezidente Konsellu Kurador Fundasaun An-Nur Timor-Leste Abdullah Said Sagran informa, Idul-Fitri hanesan loron determinadu ba komunidade musulmanu iha mundu tomak hodi selebra vitória.
Objetivu husi jejum mak atu elojia ema ida-idak nia fiar ba maromak liu-husi atividade jejum hodi prova sentidu fidelidade profundu ba Nai Maromak ho simplesidade hodi hatudu katak jejum hanesan sakrifisiu ne’ebe ema depozita nia konfiansa ba Maromak.
“Ohin loron bo’ot ne’ebe mak komunidade musulmanu sira hotu remata sira-nia jejum, ida ne’e hanesan luta bo’ot ba ida-idak nia ann atu hasa’e sira nia fé ba Maromak, objetivu husi jejum ne’e mak atu hasa’e kapasidade fe ba Maromak,” Dehan Prezidente Konsellu Kurador Fundasaun An-Nur Timor-Leste Abdullah Said ba Jornalista sira hafoin termina jejum, iha Masjid An-Nur, Kampu-Alor, Segunda (31/03/2025)
Imajem : Prezidente Konsellu Kurador Fundasaun An-Nur Timor-Leste Abdullah Said
Abdullah esplika, kulturalmente loron 31 fulan marsu hanesan loron determinadu ba komunidade musulmanu iha mundu tomak hodi hato’o agradesimentu ba Maromak atu proteje vida umana ema ida-idak nian, bainhira hala’o jornada iha mundu.
“Ita moris iha mundu ne’e sei la kleur tanba aban bainrua ita sei ba moris iha mundu seluk tanba ne’e mak ita tenke preokupa ita ida-idak nia aan hodi hato’o agradese ba Maromak” Dehan nia.
Responsavel fundasaun An-Nur ne’e afirma, loron 31 fulan marsu ne’ebe ema koiñese ho naran, Idul Fitri sai ona hanesan toman ida ba komunidade musulmanu hotu-hotu hodi remata sira nia jejum no husu perdua ba nai Maromak.
“Idul fitri ne’e hanesan ita selebra ita nia vitoria tanba luta durante fulan ida nia laran, ita konsege to’o ohin loron selebrasaun ne’e tanba ne’e mak ita husu no reja ba Nai Maromak atu fo perdua mai ita, konvivénsia komun tanba ne’e mak ita tenke hala’o nafatin tanba iha alquran hateten katak ita ema sei la iha dignidade bainhira iha relasaun diak ho Maromak”.nia sublinha
Iha fatin hanesan, Embaixador Indonezia iha Timor-Leste Okto Dorinus Manik aprofunda, komunidade musulmanu iha Timor-Leste moris ho armonia, paz no kontribui ba dezenvolvimentu Timor-Leste nian, nune’e ohin loron komunidade sira konsentra hamutuk hodi selebra Idul Fitri.
“Loron ksolok ba ita hotu, nu’udar embaixador Indonesia iha Timor-Leste hamutuk ho familia musulmanu hotu ami selebra loron Idul Fitri, hamutuk ba tinan 1446H, ami hein katak povu muslim iha Timor-Leste atu mantein armonia, dame, pasiensia no kontribui ba dezenvolvimentu nasaun Timór-Leste nian” Nia subliña.
Nia hatutan, nia parte reprezenta governu Indonesia saúda komunidade musulmanu hodi garante paz, estabilidade no kontribui ba prosesu mudansa ne’ebe la’o iha Timor-Leste.
Enkuantu, Embaixador ne’e haktuir sosiedade Timorense toleránsia makaas ba diversifikasaun hanesan diferensia religiaun, ras no kultura ne‘ebe eziste iha sosiedade ne’e.
“Iha Timor-Leste tuir ha’u nia haree komunidade sira toleransia makas hanesan ita haree katak bainhira ami halo aktividade saida deit governu no komunidade sira apoiu masimu, nune’e mós ami bainhira belun sira husi religiaun sira seluk hanesan katólika bainhira selebra natal no aktividade ami mos sempre apoiu ba sira” Nia hakotu.
Entretantu, iha selebrasaun hijriah no Idul Fitri ba dala 1446 iha Masjid An-Nur Kampu-Alor ne’e partisipa husi Embaixador Indonesia iha Timor-leste Okto Dorinus Manik, Prezidente Konsellu Kurador Fundasaun An-Nur Timor-Leste Abdullah Said Sagran, no Komunidade musulmanu sira ne’ebe rejidente iha Timor-Leste.
Jornalista : Marcela Mery da Costa & Marciana da Conceição