Inaugura Irrigasaun Laleia ! JICA Promete Kontinua Apoia Infraestrutura Bázika
SAPNewsTL, Manatutu : Ministru Obras Públikas (MOP) Samuel Marcal fo agradese ba Governu Japaun tanba hadomi tebes povu Timor desde Timor ukun an to’o agora tanba úniku Governu japaun maka ajuda makas ba povu Timor reabilita irrigasaun Lubuto, Postu Administrativu Laleia, Munisípiu Manatuto.
Ministru Samuel haktuir, Nia lori povu Timor nia naran fo agradese barak ba Governu Japaun tanba bele rehabilita irigasaun iha Laleia Munisípiu Manatutu.
“Lori Guvernu nia naran fo agradese ba Governu Japaun tanba ohin ita bele hadia fali ita nia irigasaun, ita espera katak ho irigasaun ida ne’e bele aumenta tan ita nia produsaun lokal, oinsa bele hamenus importasaun”,Dehan Ministru Obras Públikas (MOP) liu husi intervista iha Lubutu, Postu Laleia Munisípiu Manatutu, 27/10/2023
Samuel akresenta, Governu Japaun laos foin mai ajuda irigasaun maibé apoiu ona parte barak hanesan bee moos, ajuda ekipamentu no kapasitasaun Rekursu humano tanba hadomi tebes povu Timor hahu kedas Timor ukun an mai to’o agora
Ministru konsidera projetu reabilitasaun ho melhoramento ba eskema irigasaun Buluto apoiu husi japaun hanesan simbolu amizade ho koperasaun entre Japaun ho Timor Leste
Iha fatin hanesan, Embaixadór Japaun iha Timor-Leste, Kimura Tetsuya sente onradu tanba bele halo parte iha serimonia inaugurasaun
“Onra boot ida mai ha’u bele partisipa iha serimónia inaugurasaun “Programa Reabilitasaun Urjente ba Infraestruturas ne’ebé mak hetan Estragus husi Inundasaun'”
Timor-Leste sofre ona dezastres naturais boot hanesan inundasaun no rai-halai iha pasadu Iha tinan rihun-rua rua-nulu resin-ida (2021 ), inundasaun histórika nian halakon vida husi ema barak nian, no estraga ona infraestruturas importante iha fatin barak iha país ida ne’e.”
Embaixadór Japaun ne’e aprofunda, responde ba pedidu urjente husi Governu Timor-Leste, espesialista sira husi Japaun, parseria ho sira-nia omólogu iha Timor-Leste, identifika ona fatin haat no Governu Japaun realiza ona servisu reabilitasaun liuhusi JICA. Obra hirak ne’e inklui reabilitasaun ba mota-ibun, sistema abastesimentu bee moos, no sistema irigasaun rua (2).
“Ha’u hein katak Timor-Leste sei reziliente liu tan hasoru dezastres naturais oioin iha futuru, liuhusi utilizasaun koñesimentu hirak ne’ebé hetan husi projetu ne’e, no aplika ba iha área oioin”. Nia sublina
Nia konta, iha pasadu, Japaun mós sofre dezastres naturais oioin inklui tsunami, rai-nakdoko, rai-halai, erupsaun vulkânikas, no tufaun. Maibe, liu tiha tinan rihun ba rihun, povu Japaun ultrapasa desafiu hirak ne’e, no sempre hetan koñesimentu foun, tanba ne’e mak Redusaun Risku Dezastres mak entre ida husi prioridades ba kooperasaun dezenvolvimentu Japaun nian.
Iha sorin hanesna, Prezidente JICA Timor-Leste, Tanaka Akihiko, dehan JICA kontinua apoia Governu Timor-Leste iha área infraestrutura sira
“Ami kompromete atu kontínua suporta Governu Timor-Leste, liuhosi hasa’e kualidade infraestrutura báziku esensiál iha Timor laran tomak, ami espera katak projetu ne’e sei fo impaktu positivu bá komunidade sira nia moris no kontribui bá dezenvolvimentu nasaun ida forti liu,” Promete Tanaka Akihiko.
Enkuantu, konstrusaun bá reabilitasaun irrigasaun Buluto hola parte mós iha programa JICA nia suporta inklui reabilitasaun bá mota-ibun Comoro, Díli, sistema abastesimentu bee-moos, sistema irrigasaun Maliana ho montante orsamentu hamutuk miliaun $7,5.
Jornalista : Ermelinda Soares