Inundasaun Iha Vikeke, Komunidade Barak Sofre no Resulta Ponte Ida Kotu
![](https://sapnewstl.com/wp-content/uploads/2022/07/index-22-650x393.jpg)
SAPNewsTL, Dili, Deputadu Bankada Fretilin Dário Madeira foti asuntu kona-bá inundasaun ne’ebé akontese iha loron 31 to’o loron 02 iha Munisípiu Viqueque, iha ne’ebe resulta komunidade nia natar kuaze hektar sanulu (10) hetan estragus no ponte ida kotu, povu Viqueque difisíl tebes atu halo sirkulasaun.
“Iha loron 31 to’o loron 02 tinan 2022, udan boot ne’ebé akontese iha parte lorosa’e nian afeta estragus barak liu-liu ba estrada públiku sira, movimentu husi Viqueque ba Watucarbau ne’e difikulta tebes ba komunidade sira, liu-liu mak ponte ne’ebé kotu, mota sira ne’e mós fó ameasa ba estrada públiku sira, tanba ne’e sujere ba governu, karik bele governu toma responsabilidade hodi halo emerjensia ba fatin sira ne’ebé mak afeta ba estragus hirak ne’e”. Tenik Deputadu Dário
Bainhira governu la atende lalais, udan hanesan ne’e tinan oin akontese tan maka sei grave totál no la iha liu movimentu entre Munisípiu ba Postu Administrativu sira.
“Inundasaun ida ne’e akontese iha Postu Watucarbau ponte ida mos kotu maibé kompanha ida iha ne’eba ne’e konsege halo tiha ona ho emerjensia, kareta ho motor bele liu fila fali, maibé komunidade nia natar kuaze hektar sanulu (10) besik ponte ne’e rai taka tomak hotu, tan ne’e husu ba governu bele orienta instituisaun sira ne’ebé kompetente para bele halo identifikasaun para bele fo atendimentu ba populasaun sira ne’ebé mak ninia natar afetadu”. Dehan nia
Nia akresenta, la’ós deit Estrada ida ne’e, maibe kuaze Viqueque ne’e grave total duni, husi Viqueque mai fila fali iha Postu Administrativu Lacluta mos iha kondisaun ne’ebe hanesan Estrada kuaze halo movimentu publiku ne’e paradu, Viqueque mai iha Ponte Lacluta Dilor ne’e tinan ba tinan tiha ona nafatin deit
“Ha’u hakarak hato’o ba Sr. Ministru katak Komunidade Munisípiu Viqueque presiza resposta, la’ós ida ne’e deit husi Postu Watucarbau ba fila fali Baguia durante ne’e sira uza motorizada bele ba Baguia mai fila fali Baucau ne’e mós kuaze mota sobu hotu ona maibé durante ne’e seidauk iha resposta udan boot mai halo grave liu tan, tanba ne’e husu Sr. ministru presiza halo normalizasaun ba estrada ne’e para komunidade bele asesu fila fali ba nia postu no suku sira’’. Nia hakotu
Jornalista : Eduardo Moniz
Editor : SAPNewsTL