IX Governu : “Kurize Erru, Tinan Ba Mudansa & La’os Hanoin An & Família”.
Imagen : Primeiru Ministru Kay Rala Xanana Gusmão iha Palasiu Governu, 05/01/2026. Foto : Média PM
SAPNewTL, Díli : Primeiru-Ministru (PM), Kay Rala Xanana Gusmão apela bá ajente administrasaun Estadu tomak atu kurize erru sira ne’ebé komete iha tinan 2025 no hadi’a iha tinan 2026 hodi servisu ho responsabilidade ba povu no nasaun.
“Tinan 2026 ne’e la’ós fásil bá ita. Tanba ne’e ita buka kurize nafatin atu povu fiar katak hetan tiha ukun-an, oan sira ne’ebé bá servisu hanoin netik sira-nia moris, hanoin netik rai ne’ebé ema rihun atus bá atus fó tiha sira-nia vida la husu buat ida”.Dehan Primeiru-Ministru Xanana Gusmão iha Palásiu Governu, 05/01/2026. Sita média GPM
Xefe Governu ne’e hatutan, “2026, tinan mudansa, katak mudansa iha atitude, kompromisu no iha buat hotu-hotu, nune’e povu bele senti katak sira-nia oan ne’ebé sai matenek, kaer servisu hanoin duni rai ida-ne’e, la’ós hanoin de’it sira-nia an no família,”
Xanana Gusmão konsidera tinan 2026 importante tebtebes tanba sempre temi bebeik kona-bá halo korresaun bá administrasaun públika. Povu sei hadomi no respeita ajente administrasaun Estadu tomak bainhira hatudu servisu di’ak bá sira.
“Tanba ne’e husu bá imi hotu, bá imi-nia responsável sira administrasaun tomak, tenke servisu ho di’ak, responsabilidade ho hanoin ida, objetivu ida servi rai no povu ida-ne’e. Husu imi-nia kompromisu. Fulan tolu mak laiha mudansa iha ita-nia hahalok no iha servisu laran entaun ita lalika iha tán serimónia hasa’e Bandeira Nasionál,” Xefe Governu apela.
Iha kalan 31 Dezembru 2025, taka Kontra Jerál Estadu (KJE) presiza kurize tanba iha fatin balun ezekuta 75% maibé iha fatin balun ezekuta de’it 50%, tanba ne’e tinan 2026 tenke kurize nafatin hodi halo di’ak liu tán.
Partisipa iha isar Bandeira Nasionál ne’e maka funsionáriu sira hosi Gabinete Primeiru Ministru, Gabinete Fronteira Marrítima no Terrestre, Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Prezidénsia Konsellu Ministru, Ministériu Koodenadór Asuntu Ekonómiku (MKAE), Gabinete Vise Ministru Asuntu Parlamentár, Sekretaria Estadu Igualdade (SEI), Sekretaria Estadu Komunikasaun Sosiál (SEKOMS), Komisaun Funsaun Públika (KFP), Sentru Nasionál Chega (CNC, sigla portugés), Inspesaun Jerál Estadu (IGE) no Institutu Defeza Nasionál (IDN).