Jesus Mak Esperansa ! Leão XIV : “Keta Koko Lohi Ema Ho Imitasaun Baratu Sira”.
Imajem : Papa Leão XIV Iha Vaticano, 03/08/2025. Foto : Vatican News
SAPNewsTL, Vaticano : Durante Misa ba Jubileu Foin-sa’e sira-nian iha Tor Vergata, Amu-Papa Leão XIV fó hanoin ba foin-sa’e sira katak Jezús mak ita-nia esperansa, no husu ba sira atu “aventura ho Na’i ba eternidade”.
Marciana Da Conceição Jurnalis – SAP News – TV | Fontes – Vatican News
“Jesus mak ita nia esperansa, aventura hamutuk ho Nia iha ita nia moris tomak, no husik Nia fo naroman ba ita”. Papa Leão XIV hato’o ida ne’e durante misa ba Jubileu Foinsa’e sira nian iha Tor Vergata iha Roma, 03/08/2025
Santu Padre introdús ida-ne’e hodi rekoñese iha ninia omilia katak maski liturjia ohin nian la temi diretamente epizódiu ne’e, konvida ita atu reflete kona-ba enkontru ho Ida-ne’ebé Moris-Hi’as “Ne’ebé transforma ita-nia moris no fó naroman ba ita-nia hakarak no hanoin sira.”
Na’i tuku janela ita-nia klamar nian
“Ita la’ós kria ba moris ida ne’ebé buat hotu-hotu konsidera hanesan buat baibain no estátiku, maibé ba ezisténsia ida ne’ebé maka hafoun beibeik liuhosi prezente ba an rasik iha domin.” nia hatete, “ita kontinua aspira ba buat ruma ‘liután’ ne’ebé laiha realidade kriadu ida bele fó mai ita; ita sente hamrook kle’an no lakan ne’ebé laiha hemu ida iha mundu ne’e bele satisfás.”
Leão XIV hatete, “mai ita keta lohi ita-nia fuan hodi koko atu satisfás sira ho imitasaun baratu sira!” Maibé, nia sujere, “Mai ita rona sira!”
“Mai ita nakfilak hamrook ida-ne’e,” Santu Padre sujere, “ba kadeira ida, hanesan labarik sira ne’ebé hamriik ho ain-fuan, atu bele hateke liuhosi janela enkontru nian ho Maromak. Ita sei hetan ita-nia an iha Nia oin, ne’ebé hein hela ita, tuku ho kmaan janela ita-nia klamar nian.”
São Agostinho nia matenek
“Furak duni, liuliu iha idade joven ida,” Santu Padre hatete, “atu loke luan imi nia fuan sira, hodi husik nia tama, no hahú aventura ida-ne’e ho nia ba eternidade.”
Saun Agostinho, reflete kona-ba ninia buka maka’as ba Maromak, Amu-Papa hanoin hikas, husu ba nia an rasik: ‘Entaun, saida mak ita-nia esperansa nia objetu ?’.
Se, ita-nia fonte esperansa nian maka rai ka buat furak ruma ne’ebé mai hosi nia, nia argumenta katak sasán sira-ne’e la’ós, maibé ‘Ida ne’ebé halo sira,’ ‘Nia maka ita-boot nia esperansa.’
Papa Leão fó hanoin ba foin-sa’e sira, hanoin kona-ba nia viajen rasik, reza no dehan, “Ita-boot [Na’i] iha ha’u nia laran, maibé ha’u iha liur, no iha ne’ebá maka ha’u buka Ita-boot […] Ita-boot bolu, Ita-boot hakilar, no Ita-boot sobu ha’u nia tilun-diuk.”
Amu-Papa rekoñese katak dalaruma foin-sa’e sira hanoin kona-ba pergunta sira ne’ebé hanesan.
Amu-Papa rekoñese, “Iha pergunta ida ne’ebé lakan iha ita-nia fuan, nesesidade ida ba lia-loos ne’ebé ita labele ignora ne’ebé lori ita atu husu ba ita-nia an rasik: saida mak ksolok loos? Saida mak sentidu loloos moris nian? Saida mak bele liberta ita husi lasu iha sentidu laek, baruk no mediokridade?”
Iha loron hirak ikus ne’e, Amu-Papa Leão hanoin hikas katak foin-sa’e sira iha esperiénsia furak barak, hodi hatutan tan katak liuhusi buat sira-ne’e hotu, “imi bele kaer pontu importante ida”, katak plenitude ita-nia ezisténsia nian la depende ba buat ne’ebé ita halibur ka, hanesan ita rona iha Evanjellu, ba buat ne’ebé ita iha.
Maibé, nia fó hanoin, plenitude iha relasaun ho saida maka ita simu no fahe ho ksolok. “Sosa, halibur no konsume la to’o. Ita presiza foti ita-nia matan, hodi hateke ba leten, ba ‘buat sira ne’ebé iha leten…'”
Jesus mak ita nia esperansa, “Foin-sa’e doben sira, Jezús mak ita-nia esperansa”, Papa Leão insisti.
“Nia maka,” hanesan Saun João Paulo II hatete bainhira dirije ba foin-sa’e sira durante Jubileu 2000, Papa Leo hanoin hikas, “hamosu iha nia hakarak atu halo buat boot ruma ho imi-nia moris, atu kompromete hodi hadi’a imi-nia an rasik no sosiedade, hodi halo mundu sai umanu no fraternu liután.”
Tanba ne’e, Santu Padre ezorta, “Mai ita nafatin unidu ho Nia, mai ita nafatin iha Nia amizade hodi kuda liuhusi orasaun, adorasaun, Komuñaun Eukarístika, Konfisaun beibeik, no karidade laran-luak, tuir ezemplu Beatu Piergiorgio Frassati no Beatu Carlo Acutis ne’ebé lakleur tan sei deklara nu’udar santu.”
Tanba ne’e, nia konvida, “Aspira ba buat boot sira, santidade iha ne’ebé de’it ó iha. Keta triste ho buat ne’ebé menus. Nune’e ó sei haree naroman Evanjellu nian buras loron-loron, iha ó no hale’u ó.”
Amu-Papa Leão XIV konklui, hodi harohan atu bainhira sira fila ba uma, sira “kontinua la’o ho ksolok iha Maksoin nia ain-fatin, no habelar imi-nia entuziazmu no sasin imi-nia fiar nian ba ema hotu ne’ebé imi hasoru!”.
