Jogu CPLP 2025 ! MJDAC Entrega Farda Ba Atleta Sira

Imagem : MJDAK Nelyo Isaac Sarmento iha Otel Ramelau Aimutin, Dili,26/05/2025.

SAPNewsTL, Dili: Ministeriu Juventude Desportu Arte Kultura sigla portuges (MJDAC) entrega farda no ekipamentu treinu nian ba atleta sira ne’ebe daudaun ne’e halo preparasaun ba jogu CPLP 2025 iha Timor-Leste.

Augusto dos Santos – SAPNews

“Ohin, ita atribui ekipamentu no farda treinu ninian ba atleta sira U-17 daudaun ne’e halo preparasaun ba jogu CPLP 2025, ita hili mak modalidade tenis kampu, karate, taekwondo, futebol, xadres, basketbol 3×3, voleibol praia, no mos atleta paralimpiku nian, ita esforsu ba atleta sira maski sira halo preparasaun ho tempu badak”. dehan ministru juventude desportu arte kultura Nelyo Isaac Sarmento ba jornalista sira iha Otel Ramelau Aimutin, Dili, 26/05/2025.

Nelyo hatutan, governu tenki prepara kondisaun diak ba atleta sira mos laos atu halo preparasaun deit ba uma nain jogu CPLP maski ekipamentu treinu no farda atribui tarde, maibe hein katak sira sei hatudu duni kada modalidade hili ba jogu CPLP 2025.

Ministru informa tan, ida ne’e farda no ekipamentu ba treinu nian depois hela semana ida tan jogu CPLP atu la’o ona mak atleta sira sei simu farda ba jogu nian.

“Ne’e mak esforsu governu nian hein katak atensaun masimu ba atleta sira, balun hetan prestasaun diak ne’e mak esperança governu nian maibe jogu ne’e labele dehan katak manan ona maibe rezultadu iha depois sira hatudu iha kampu laran determina ona”.

Nia salienta tan, sasán sira governu prepara espesifiku ho finanseiru depois loke tender kompanha sira.

Entretantu, jogu CPLP 2025 iha Timor-Leste sei hahu iha loron 17 fulan Jullu to’o loron 27 fulan Jullu 2025.

Atleta nain-116 husi modalidade 9 inklui paralimpiku mak sei kompete jogu desportivu CPLP 2025, jogu sira sei uza maka estadium munisipal Dili, jinaziu desportu Dili, kampu tenis Liceu, kampu voleibol praia Lecidere, kampu basketebol MJDAK no kampu futebol Becora.