Jornalista Brazileira ! Rosselli Entrega Livru, Video & Fotografia Ba AMRT, I.P
Imajem : Jornalista Brazileira Rosseli Forganes Rosli entrega livru ba Diretor AMRT, I. P Jorge Alves iha nia kna’ar fatin Colmera, Segunda (24/03/2024).
SAPNewsTL, Díli : Jornalista internasional Rosseli Forganes ofisialmente entrega dokumentasaun Filmajen fotografia no livru istoriku 1999 ba Arquivu Museum Resistência Timorense Institutu Públiku (AMRT.IP sigla Portugués).
Diretór Ezekutivu Arquivu Museum Resistência Timorense Institutu Públiku (AMRT.IP) Jorge Alves “We moris” hateten, simbolikamente jornalista Brasileriu ne’e entrega dokumentasaun importante sira ne’ebe nia rasik arkuiva durante prosesu luta libertasaun nasionál.
“Nia mai Timor-Leste antes 1999, ohin nia mai hakarak entrega dokumentu sira ba Arquivu Museum Rezidensia Timorense nia entrega video, fotografia no livru ne’ebe nia rasik arkiva kona-ba prosesu libertasaun nasionál”.Dehan Diretór Ezekutivu AMRT.IP Jorge Alves “We moris” ba SAPNews iha nia kna’ar fatin Colmera, Segunda (24/03/2024)
Ezekutivu ne’e aprofunda, jornalista internasional ne’ebe ho nia dedikasaun hodi apoia prosesu libertasaun nasionál nia iha komitmentu hodi kontribuisaun ba prosesu dezenvolvimentu durante prosesu rezistensia nia laran.
“Parte ida mós ko’alia kona-ba prosesu dezenvolvimentu Timor nian, dokumentu ida ne’e importante tebes ba futuru jerasaun entaun dokumentu ne’ebe ohin nia entrega mak dokumentu sira ne’ebe antes 1999, hafoin forsa INTERNET tama iha ne’e, jornalista Rosseli halo ona arkiva ba dokumentu balun, nune’e dokumentu balun hahu deskreve iha tempu rezistensia mai to’o 2001”.
Dirijente AMRT.IP afirma, dadus ka dokumentu fisiku ne’ebe jornalista internasional sira arkiva iha valores essensial ba jerasaun kontinuador no povu Timor-Leste, nune’e bele entende kona-ba prosesu moruk iha tempu rezistensia.
“Hanesan ita hatene katak dokumentu fotografia sira ne’e importante tebe-tebes ba povu, jerasaun foun sira no nasaun Timor-Leste, buka hatene kona-ba saida mak akontese ne’ebé bsai interese ba komunidade jornalista internasional no públiku”.
Diretur Ezekutivu AMRT.IP Jorge Alves “We moris” hato’o agradesimentu wa’in ba jornalista internasional husi nasaun Brasil Rosseli Forganes Rosli, tanba bele rekoilha akontesementu sira iha tempu invazaun.
“Hakarak hato’o agradesimentu ba komunidade internasional liu-liu jornalista sira ne’ebe rekoilla fotografia, video no deskrisaun sira kona-ba prosesu libertasaun nasionál, liu-liu ba jornalista internasional sira ne’ebe ho sira nia laran luak tebe-tebes bele entrega dokumentu ne’e ba ita Timor-Leste”.
Aleinde termu entrega dokumentasaun, Arquivu Museum Resisténsia Timorense mos asina memorandu entendimentu ida entre jornalista Brasileira Rosseli Rorganes.
Enkuantu dokumentu ne’ebe jornalista Brasileria Rosseli Rorganes entrega ba Arquivu Museum Resistência Timorense kompostu husi fotografia,video no livru ne’ebe hakerek kona-ba isotria Timor-Leste nian.
Jornalista: Guilhermino Ramos da Cruz
