“Jornalista Ne’e Vokasaun Ida, Servisu Voluntáriu Ne’e Folin”

SAPNewsTL, Dili : Padre Mouzinho Pereira Lopes sente orgullu hamrik ho Jornalista SAPNewsTL tanba jornalista ne’e hanesan vokasaun ida ne’ebe ema barak la hatene no ema barak la halo maibe foinsa’e sira SAP News bele, sira sai ezemplu, modelu no espellu ba joven sira seluk.

Ha’u mak Padre Mouzinho Pereira Lopes, husi Postu Administrativu Maliana, Munisipiu Bobonaru, agora daudaun saserdote durante 25 anos. Ha’u eskola iha Universidade Indonesia, Roma (Itália) no Londong (England), Aleinde ne’e mos ha’u tuir kursu iha Sidade Lisboa Páis Portugal.

Bainhira fila mai Timor Bispu Dioseze Dili fo konfiansa sai diretor iha semináriu, hafoin Papa Francisco foti ha’u sai hanesan koordenador misaun iha Timor durante tinan sanulu (10). Agora daudaun hanorin iha Institutu Supeior de Filosofia e Teolojia (ISFIT) no Universidade Católica Timorense (UCT) hanesan koordenador lingua Tetun.

Agora, ha’u hamutuk ho Mídia SAPNewsTL nu’udar koordenador konseleiru durante tinan 2. Ha’u gosta hakerek tanba ita nia emar Timor ko’alia mak barak maibe le’e no hakerek menus. Ema barak mak gosta konta istória maibe le’e no hakerek publika para ema le’e ne’e menus tebes. To’o agora ha’u esperiénsia hanorin deit, iha paroquia, la’e tanba bispu sira haruka ha’u hanorin.

Tebes, ha’u gosta akademia ne’e mak ha’u hatene situasaun, ita nia pesquisa menus tebes, signifika katak ema la le’e no la hakerek. Ita iha Timor ema ne’ebe hakerek mak jornalista sira. Sira mak hakerek istoria publika novidade sira. Iha mundu akademia hanesan deit ita husu estudante sira hakerek sira la hetene, ita sura ho liman fuan deit, ha’u hatene tanba ha’u iha esperiénsia hanorin iha UNTL, Universidade da Paz (UNPAZ), ISFIT no UCT.

SAPNewsTL ne’e  mídia ne’ebe mak hari’i husi estudante sira, bainhira hasoru ha’u no hili ha’u sai konseleiru, expresaun primeiru ne’ebe mak ha’u sente no husu, imi estudante  oan deit bele ga lae?, imi halo notísia, hasoru ema ho kargu boot sira ne’e hanesan ha’u nia primeira expresaun. Maibe nia diak mak ne’e, komu buat foun no ha’u mos hakarak, diak ita la’o hamutuk. Buat foun hanesan ne’e, ema barak mak la hetene, ita koko ho ita nia kbiit rasik, ne’e mak ha’u sente SAPNewsTL nia kbiit katak mai husi nia ann rasik duni  la’os dependente ba ema ruma.

Hanesan konseleiru, ha’u sempre dehan ba jornalista SAPNewsTL fuan bo’ot deit tanba foin hahú ne’e sakrifisiu barak, hanesan mensagem bíbliku liu husi sakrifisiu mak ita bele hetan diak, buat ida la iha duni, ha’u ba vizita iha sede buat ida la iha, atu dehan kondisaun minimal ne’e ita la iha maibe iha deit mak kamera privadu, laptop no komputador sira hodi imi halo notisia sira. Ha’u akompanha novidadade sira, notisia ne’ebe mak sai husi SAPNewsTL, ha’u hare hotu katak kualidade ass katak notísia la’os iha fatin ida deit maibe sai ba liur.

Tan ne’e, ha’u espera tebes katak ho imi nia sakrifisiu husi buat ne’ebe mak la iha, espera tebes atu buat ruma mosu mai tanba imi nia knaar jornalismu ne’e. Ha’u rona katak agora dadaun expanda tan ba meius sosial média hanesan instagram, tiktok, twitter, no youtube. Buat hirak ne’e ajuda katak imi mesmu la iha buat ruma maibe imi bele halo buat ruma ho imi nia matenek no vontade katak matenek iha kbiit ida no vontade iha kbiit ida, imi konsegue halo ida ne’e katak iha progressu hanesan ne’e diak ba imi no imi sai exemplar ba joven sira seluk.

Ha’u nia esperansa no konfiansa iha imi, so que  iha ligasaun sosial ho instituisaun ha’u sente, instituisaun sira ne’ebe mak responsavel ba hanesan ne’e seidauk diak. Ha’u gosta joven sira book ann do que baruk hodi hemu tua lanu, halo problema, Timor la presija ida ne’e, imi hatudu ona imi nia espíritu mesmu voluntáriu, voluntáriu ne’e buat ne’ebe mak folin tebes.

Hanesan Na’i Lulik, ha’u haree jornalista ne’e hanesan vokasaun ida iha imi, imi hamrik serbisu mesmu voluntáriu maibe imi halo diak tanba jornalismu ne’e sempre akompanha istoria nia la interese buat seluk, maske nia hakerek maibe nia marka istoria ida. Ha’u mos gosta los imi nia ispiritu de luta mesmu ke dala ruma imi lakon esperansa (putus asah), ida ne’e mak ha’u orgulhu hodi hamrik nafatin ho imi atu ita la’o hamutuk.

Ba ha’u, mídia Timor barak hau la gosta tanba notisia hoax barak liu, ha’u hakarak ne’e bainhira notísia tenke konfirma no rekonfirma, labele hanesan fali julga, no justu labele inventa hodi tau ita nia interpretasaun (interpretasi), buat hirak ne’e mak ha’u hakarak iha SAPNewsTL koko atu halo.

Imi sei sai profisional, ema sei gosta imi, imi la’o ona tinan rua no imi la monu, agora ida ne’e tenke kontinua no labele monu katak labele lakon vontade, hanoin katak jornalista ne’e vokasaun ida ema seluk la bele halo hanesan ne’e, ne’e so imi mak iha fuan ida ne’e.

Jornalista : Marcela Mery da Costa