Kandidatu Traballador 164 Tuir Briefing, SEFOPE Husu Haree Malu Hanesan Irmandade

SAPNewsTL, Dili: Sekretária Estadu Formasaun Profisionál no Empregu (SEFOPE) liu husi Diresaun Nasionál Empregu Exteriór (DNEE) realiza Pre Departure Briefing (PDB) ba kandidatu traballadór na’in atus  ida neen nulu resin haat (164) ne’ebé atu ba servisu iha Australia.

Tuir Diretór Diresaun Nasionál Empregu Exteriór (DNEE), Filomeno Soares hateten, realizasaun Pre Departure Briefing (PDB)  ba kandidatu traballadór sira ne’ebé atu ba servisu iha Australia ne’e bazeia ba kritéria ne’ebé empregadór husi Nasaun Kangguru fó, nune’e traballadór sira mos bele iha ona kuñesimentu kona-ba lei no regulamentu servisu nian

Diretor ne’e husu ba kandidatu traballador sira aproveita didiak oportunidade ne’ebe hetan hodi aprende

“Realizasaun PDB durante loron rua nia laran, tanbá ne’e husu ba kandidatu traballadór nain 164 ne’ebé hetan oportunidade ne’e, atu aproveita hó didi’ak hodi aprende, karik iha bu’at ruma ne’ebé la komprende bele husu ba formandu sira hodi esplika, nune’e bele hatene antes tama ba servisu”.  Dehan  Diretór Diresaun Nasionál Empregu Exteriór (DNEE), Filomeno Soares ba jornalista sira iha salaun Tower Bar Fatuhada no salaun sentru formasaun East Timor Development Agency (ETDA) Aimutin, Tersa-Feira, (20/09/2022).

Direktor ne’e hatutan, traballador sira ne’ebé ba servisu iha Australia ne’e la’os hanesan pesoál maibé ba servisu reprezenta bandeira Repúblika Demokratika Timor Leste (RDTL).

“Iha ema nia rain, haree malu hanesan maun-alin hó naan-feton (Irmandade), nune’e mós labele pratika fila-fali arte marsiais no arte rituais iha ema nia rain hodi hafo’er ita nia nasaun nia naran”. Tenik Direktor.

Governante ne’e mos apela ba joven Timor oan sira ne’ebé hetan oportunidade ba servisu ne’e atu  respeita lei ne’ebé iha hodi fo dalan nafatin ba Timor oan sira ba servisu.

“Ba servisu iha Australia hatudu komportamentu servisu ne’ebé di’ak, respeita ema nia lei no labele halai ses husi sistema tanbá halai sai husi sistema sei prezudika ba empregadór atu foti tán traballadór husi Timor Leste”. Nia informa

Entretantu joven Timor oan nain 164 ne’e, kompostu husi feto nain 32 no mane nain 132, enkuantu ema nain 43 ba servisu iha kompaña Midfield, ema nain 10 ba Koala Farm, Adco Handuside ema na’in 2,  na’in 32 iha Kolcoy, iha Connect Group Nice Foro hamutuk nain 75, ema nain 1 ba Adco West Hilis no kompaña FPG Smart Berries ema nain 1.

Jornalista: João Marito & Aquilina Taec

Editor: Ekipa Editorial