Kardeal Inaugura Gruta Sagrado Coração de Jesus Haeh Ria

Imagem : Dom Virgílio Cardeal do Carmo da Silva inaugura Gruta Sagradu Kurasaun de Jesus Haeh-Ria iha Ermera, 25/01/2026

Sapnews Pro, Ermera : Dom Virgílio Cardeal do Carmo da Silva inaugura Gruta Sagrado Coração de Jesus Haeh Ria ne’ebe hari’i hosi Grupu Colimau 2000 iha postu administrativu Ermera Villa, munisipiu Ermera.

Dom Virgílio Cardeal do Carmo da Silva hateten Gruta Sagradu Kurasaun de Jesus sai fatin ba timoroan sira atu halibur malu no halo orasaun.

“Uluk, ita bolu de’it Foho Haeh-Ria, ohin ita bolu ona ho Gruta Sagradu kurasaun de Jesus Haeh-Ria, iha ona sentidu bo’ot mai ita, fatin ida ne’e la’os de’it halibur balada nian, la’os de’it ba movimentu Grupu Sagradu Kurasaun de Jesus nian, maibe Fatin ba ema hotu atu halibur malu, Ermera oan no Timor oan hotu karik atu mai halo orasaun iha fatin ne’e”. Hateten Dom Virgílio Cardeal do Carmo da Silva iha Ermera, 25/01/2026

Serimonia inaugurasaun no misa solene ne’e prezide hosi Presidente Conferência Episcopal Timorence (CET), Dom Virgílio Cardeal do Carmo da Silva hamutuk ho Grupu Colimau 2000 no autoridade munisipiu Ermera.

Gruta Sagrado Coração de Jesus Haeh Ria lokaliza iha fatin ne’ebe malirin, matak, furak no úniku, gruta ne’e atrativu no inspirativu tebes ba públiku hodi halo vizita no hasa’e ninia orasaun ba Aman Maromak.

Tuir observasaun SAP News TL iha terenu nota katak serimonia inaugurasaun ne’e hetan partisipasaun maksimu hosi membru Parlamentu Nasional, Membru Governu, membru Colimau 2000, populasaun Ermera, no Presidente Autoridade Munisipiu Ermera.

Enkuantu, serimónia ne’e la’o iha paz, amizade estabilidade, hakmatek no susesu tanba membru Colimau 2000 sira-nia servisu makaas, sakrifisiu, dedikasaun no responsabilidade.