Kardeal Virgílio : “Eventu Tasi-Tolu Ne’e Extraordináriu, Mundu Louva Timor”
Imajem : Kardeal Dom Virgílio do Carmo da Silva iha Sala VIP Aeroportu Nicolau Lobato Díli, 13/05/2025
SAPNewsTL, Díli : Hafoin partisipa serimónia funeráriu falesimentu Papa Francisco no Konklave ba hili Papa Leão XIV, Ohin Dom Virgílio Kardeal do Carmo da Silva to’o hikas Timor-Leste ho aviaun Citilink.
Iha entrevista, Kardinal Virgílio do Carmo da Silva hateten nia parte representa Timor-Leste kongratula ona Papa Leão XIV hodi afirma katak povu Timor nia domin ba Papa Francisco hanesan nafatin ba Papa Leão XIV.
“Ha’u hasoru Papa Leão XIV, ha’u kongratula hodi Timor-Leste nia naran, ha’u dehan ba nia katak ita-boot la mesak, povu no igreza Timor hadomi ita boot hanesan Papa Francisco, ami hadomi ita-boot no reza ba ita, ami husu atu reza ba Timor no reza ba joven sira”.
Kardinal Virgílio hatutan, “Papa mós hanoin ita-nia orasaun, nia rona no simu ida ne’e ho hamanasa, ita reza ba paz iha mundu”.
Kardeal Virgílio konta, Papa Leão XIV sei kontinua hakuak ema hotu no haklaken paz ba mundu liliu ba nasaun sira ne’ebe kuran damen.
“Molok ha’u fila, ha’u ba hasoru nia hodi husu nafatin nia orasaun ba mundu no mai Timor-Leste, nia mensajen dahuluk maka paz ba mundu, nia vizaun klaru hodi kontinua saida mak Papa Francisco halo ona, oinsa hakuak ema hotu hodi hari’i paz”.
“Iha nia fuan, ha’u husu fatin espesial ba joven sira, nune’e nia mensagem fo ba mundu tomak liliu sira ne’ebe fahe malu, ita haree India no Pakistan funu uitoan maibe iha sabadu liu ba sira halo sejarfogu, iha domingu ne’e Papa louva ida ne’e, halakon diferensa hirak ne’e hotu hodi hari’i povu ida damen”.
Dom Virgílio sublinha, timoroan sira precisa hametin liutan mensagem ne’ebe Papa Francisco kuda ona iha Timor-Leste.
“Mai ita Timor iha organizasaun oioin, joven sira buka atu hametin liután mensajen ne’ebe Amu Papa Francisco mai kuda ona iha Timor”.
Ligadu ho misa funeral ba Papa Francisco ne’ebe hala’o iha Tasi-Tolu, Virgílio dehan mundu fo apresiasaun boot no relunhese katak ne’e momentu extraordináriu ida iha mundu nia matan.
“Eventu 26 Abril iha Tasi-Tolu ne’e, iha jornal Vatikanu tau kedas iha pajina boot ida hodi tau kedas ha ne’eba, ema fo importansia ba ida ne’e, ema apresia no louva Timor ninia domin ba Amu Papa ne’e extraordinariu”.
Kardinal timoroan ne’e afirma, sarani Timor presiza renova ninia domin ba Papa Leão XIV no santa kreda liu hosi kaer liman hamutuk kria paz no reza ba mundu.
“Amu Papa Leão ne’e, mai ita renova ita-nia domin ba santa kreda, ita reza nafatin liliu kaer liman hamutuk hodi damen no domin ne’e buras liután iha rain”.
Jornalista : Marciana da Conceição