Kazu Asédiu Sexual Iha UNTL ! Estudante Fo Ultimatu Blokeia Kampus
Imajem : Estudante FCS & FMCS halo konferénsia imprensa hasoru Estrutura UNTL kona ba kazu Asédiu Sexual iha Kampus Kaikoli, 13/10/2025
SAPNewsTL, Díli : Asosiasaun Estudante Fakuldade Ciénsias Sosiais FCS no Fakuldade Médicina e Ciensia da Saúde FCMS Universidade Nasional Timor Lorosae UNTL, kontinua deklara katak, sé estrutura universidade laiha resposta ba ezijénsia estudante kona-ba aktu predator sexual ne’ebe komete husi dosente MB, Asosiasaun sei organiza estudante ativu no alumi hodi blokeia kampus UNTL Kaikoli.
𝐌𝐚𝐫𝐜𝐞𝐥𝐚 𝐌𝐞𝐫𝐲 & 𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 – Mídia Sapnews
Portavós Asosiasaun Estudante, Anatolia Maria Castela da Cruz deklara, assosiasaun estudante kontinua reafirma no husu estrutura topu Universidade Nasionál Timor Lorosa’e (UNTL) atu aselera rezultadu ne’ebe avalia husi Konsellu disiplinar UNTL kona-ba kazu asédiu sexual ne’ebe komete husi dosente balun hasoru estudante feto.
“Ami asosiasaun husi Fakuldade rua, CS & FMCS ezije ba estrutura UNTL atu lalais fó resposta ba ezizensia estudante, tanba relatoriu kona-ba kazu asédiu sexual ne’ebe komete husi dosente balun, ami submete ona ba estrutura, maibé ate agora ami seidauk hetan resposta”. Dehan Portavós asosiasaun estudante, Anatolia Maria Castela da Cruz liu husi Komunikadu Imprensa, Segunda-Feira, (13/10/2025)
Estudante ne’e salienta, UNTL tenke promove ambiente ida ne’ebe seguru, inkluzivu no ekuitativu, la iha toleránsia ba diskriminasaun no violénsia ho forma oioin kontra direitu ema ninian, liu-liu abuzu de podér, violénsia bazeia ba jéneru, violasaun sexuál, asédiu sexuál hasoru estudante feto sira.
Iha fatin hanesan, estudante FMCS Herculano Asala Vicente realsa, kazu asédiu sexual hasoru estudante iha UNTL la’os foin akontese maibé desde uluk kedas kazu ne’e akontese, dosente sira uza sira-nia kompetensia hodi viola direitu estudante.
“Kazu sira hanesan ne’e laos foin mak akontese maibé desde uluk, maibe professor sira taka malu. ami iha tatika batalha ho senadu nain rua (2), no ami fo tempu badak atu fo sai resposta ba públiku”.
Nia konfirma katak, karik laiha resposta imediata asosiasaun estudante sei organiza estudante ativu no alumni sira hodi blokeia kampus UNTL kaikoli tanba dosente sira abandona kazu asédiu sexual ne’ebe akontese iha resintu UNTL.
“Fakuldade ida ne’e, ha’u sadik ekipa auditoria husi Ministeiru Ensinu Superior Siensia no Kultura atu aselera lalais prosessu ne’e tanba dosente sira maioria taka malu, se karik sira laiha resposta lalais, ami prontu organiza malu hodi blokeia kampus ida ne’e, tanba hahalok ida ne’e kontra rezimentu interna UNTL nian katak, zero toleránsia asédiu sexual iha eskola”.
Herculano hatutan Proverbu ida dehan nune’e ai-fuan ida kuandu monu sei la dook husi nia hun, se manorin ida mak nia karakter ho modelu hanesan ne’e oinsa mak bele garantia kualidade edukasaun ba nia estudante sira.
Estudante Faculdade Ciência Sociais (FCS) no Faculdade Medicina Siencia Saúde haktuir sira-nia ezijénsia katak ;
1. Husu ba magnífiku Reitor UNTL no Prezidente konsellu disiplinar atu fó sai rezultadu dezisaun husi konsellu disiplinar nian liu-husi relatóriu no akta final kona-ba kazu asédiu sexual ne’ebe akontese iha FMCS, tanba ate a data seidauk iha resposta signifikativa.
2. Husu ba magnífiku Reitor no Prezidente konsellu disiplinar aplika mós sansaun disiplinar ba diretor departamentu parteira ne’ebe komete abuzu de poder liu husi fó suspensaun ilegal ba estudante nain tolu, sein konsulta ho konsellu disiplinar.
3. Husu ba magnífiku Reitor no Konsellu Disiplinar atu kria komisaun inkéritu ida
ne’ebe imparsial, independente no profisionál hodi investiga kazu asédiu sexual iha FCS, Departamentu Polítikas Públikas (DPP).
4. Husu ba estrutura universidade tenke iha trasparánsia ba rezultadu husi desizaun sira ne’ebe relativa ho kazu asédiu sexual iha FCS no DPP.
5. Husu ba estrutura Universidade atu aplika sansaun disiplinar ne’ebe todan ba predator sexual iha FCS no DPP.
6. Husu ba universidade atu enkamina kazu asédiu sexual iha FCS no DPP ba Ministeriu Públiku atu prosesa tuir dalan legal.
Entretantu, estudante sira deklara se estrutura universidade la kumpri ezijénsia sira iha leten mak assosiasaun estudantes Fakuldade Siénsia Sosiais, Fakuldade Medisina no Siénsia Saúde, Universidade Nasionál Timor Lorosa’e sei organiza estudante ativu no alumni sira hodi foti asaun hasoru estrutura univerisidade no bloekia prosesu ensinu aprendizagem.
Tuir dadus ne’ebe assosiasaun fakuldade rejista katak estudante liu husi nain haat mak hetan asédiu sexual hosi dosente balun no kazu refere iha ona gabinete PRAPA UNTL no Konsellu Disiplinar UNTL.
Antes ne’e, Magnífiku Reitor UNTL João Soares Martins komfirma katak kazu refere iha ona prosesu investigasaun, nune’e parte UNTL sei haree no analiza, hafoin fo resposta ba kazu ne’e.