Kazu Iha Fronteira, PM Xanana Hakerek Karta Ba PR Prabowo

Imajem : Primeiru Ministru Kay Rala Xanana Gusmão iha Palasiu Presidensial Nicolau Lobato, 29/08/2025.

SAPNewsTL, Dili : Hafoin enkontru semanal ho Presidente Repúblika José Ramos Horta, Primeiru Ministru Kay Rala Xanana Gusmão informa konflitu ne’ebe akontese iha Oecusse, nia parta halo ona karta ba Presidente Repúblika Indonesia Prabowo Subianto.

Primeiru Ministru Xanana Gusmão hateten problema ne’ebe mosu iha fronteira, governu halo ona karta ba embaixada Indonesia no Presidente Repúblika Indonesia Prabowo Subianto.

“Aproveita informa ba Presidente Repúblika kona-ba problema ne’ebe mosu iha Oecusse ne’eba, los duni. Ha’u hakerek ona surat ida ba Presidente Indonésia”. Hateten Primeiru Ministru Xanana Gusmão iha Palasiu Presidensial Nicolau Lobato, 29/08/2025.

Xanana Gusmão sublinha, “hakerek mos surat ba Embaixada Indonesia iha Timor hodi dehan katak buka tok, tanba ita nian mos dehan ita mak nain no sira nian mos dehan sira maka nain”.

“Tanba ne’e maka halo misaun konjunta ida para investiga didiak para atu labele akontese tan”. Nia informa

Xefe Governu ne’e akresenta apresenta mós ba Xefe Estadu kona-ba asuntu diskusaun entre Timor-Leste no Indonesia kona-ba fronteira maritima.

“Ohin mai hasoru malu iha ne’e atu informa ba Presidente Repúblika katak ita hasoru malu tiha ona ho delegasaun husi indonesia ba enkontru formal kona-ba fronteira maritima, ita hotu hatene ho rezultadu maibe ita hatene katak sira mai ho vontade atu rona no halo diskusaun ne’ebe diak”.

“Tinan ne’e sei iha tan enkontru ida, iha planu enkontru tinan oin, míninu ha’at ne’ebe tinan ida ne’e no fin do ano enkontru ida fali iha sorin ne’eba”.

Durante sorumutu parte rua mós ko’alia kona-ba expo ne’ebe Ministério Comércio e Indústria (MCI) organiza no hetan partisipasaun hosi nasaun seluk ne’ebe hahú iha loron 28 Agostu to’o 1 Setembru 2025.

“Konvida Prezidente Repúblika atu ba haree iha Centru Convenções Dili, saida maka ita-nian, sira-nia hanoin no talentu mesak komesa produz daudaun”.

“Tinan mai sei iha banku dezenvolvimentu nasional fo tan apoiu para sira bele loke tan, tanba ita iha buat balun, ita bele ona redus importasaun, lae, ita sosa buat hotu-hotu”. Nia dehan