KEJF Loke Kompetisaun Diskursu, La’os Kompete Maibé Kompleta

SAPNewsTL, Dili: Organizasaun Klibur Estudante  Juventude  Fatubessi (KEJF) realiza  programa  kompetisaun  desportu, kompetisaun diskursu, no kompetisaun dansa kultural  ba juventude  sira  iha  Munisípiu Ermera, Postu  Administrativu  Hatulia  B, Suku  Fatubessi  hodi  komemora  loron FALINTIL ba dala  47 iha Timor Leste.

Tuir Prezidente Komisaun Organizadora Domingos Martins katak  diskursu ne’ebé sira halo la’os atu kompete no la’os mos haree ba taxa maibé atu haree ba kapasidade ne’ebé iha hodi haree ba futuru.

“Iha diskursu  ida ne’e  la haree manan  ka lakon, atu halo kompleta  tan ita nia kapasidade, ita la haree ba taxa no montante ne’ebé mak iha, maibé  buat ne’ebé mak ita  halo  hatudu ba ita nia sosiedade  sira katak ita mos bele no ita nia diskursu la’os kompete maibé atu kompleta malu oinsa mak atu haree ba futuru, alin sira bele la’o  tuir ita nia ain fatin.”Dehan Prezidente KO iha fatubessi, Sábadu, 13/08/2022.

Entertantu, Aktividade  ne’ebé  mak  realiza iha  oin  tolu (3);  jogu  futebol  remata  ona ba iha final iha dia 12-08-2022 no pasa  ona ba daruak nian mak diskursu no aktividade  datoluk nian mak   dansa  kultura.

Iha fatin hanesan Xefi  Suku Fatubessi   Armando de Carvalho hateten programa refere hetan apoiu husi SEJD, nia orgullu ho juventude nia hanoin di’ak ne’ebe konsege realiza aktividade ne’e iha Suku Fatubessi

“Senti orgullu  tebes  tanba  juventude  sira iha hanoin di’ak tau hamutuk hanoin, hafanun fila fali sira nia hanoin no kuñesementu liu-liu  kona-ba pasadu ne’ebé jerasaun  foun  sira ladún akompaña, orsamentu ne’ebé apoiu husi  Sekretariu Estadu Juventude Desportu (SEJD) maka  dollar rihun rua atus ha’at ($2.400); pedidu sempre  hetan husi Xefe  Suku  no relatoriu  sira mos Xefe  Suku mak asina hotu”. hatete nia

Autoriedade Lokal ne’e akresenta, Xefe Suku sai hanesan  matan, tilun, no ibun ba estadu atu haree ba orsamentu sira  ne’e  aloka tuir nia aktividade ka lae,  enkuantu, nia mos fo koragen nafatin ba juventude sira, nafatin iha vontade liu-liu iha aprendizajen ne’ebé sira aprende kona-ba lideransa nian

Enkuantu, manan nain ba Diskursu estudante Gil Martins sente kontente ho aktividade ida ne’e tanba bele fanu fali joven sira iha Suku ne’e, bele hatudu sira nia kapasidade no oinsa prepara di’ak liu iha futuru.

“Hanesan manan nain senti  kontenti  tebes ba eventu ida ne’e, oinsa mak bele fanun fila fali  joven sira iha  Suku  ida ne’e,atu nune’e  ema mos hatene katak eventu ida ne’e sai hanesan  buat ne’ebé importante ida ba ami joven sira atu hatudu ami idak-idak nia talentu liu husi ami nia kapasidade sira hotu no oinsa prepara an di’ak liu tan iha futuru”. Nia subliña.

Vensedor ne’e  afirma nu’udár joven milenial sei kontinua halo tuir sira bele hodi hodi anima juventude sira iha aspeitu hotu-hotu.

“Ami mos aban bainrua kontinua halo hodi hatene netik  historia ruma konaba  juventude  rezisténsia, hanesan  juvetude milenial, aktividade ne’e  impotante tebes mai ami no mos hanesan  joven iha hanoin ida katak aban bainrua ami  mos bele halo buat ruma atu bele  anima joven sira no komunidade sira iha suku  ida  ne’e”. Nia salienta

Jornalista: Ekipa Kobertura

Editor: Luis dos Santos