Raut Fo’er Sustenta Moris, Folin Mina Sa’e Implika Rendimentu
SAPNewsTL, Dili: Ricardo Maia hanesan kondutor ho idade tolu nulu resin hitu (37) husi Munisipiu Covalima, Postu Suai Vila, Suku Beko no agora dadaun hela iha Tasi-Tolu, servisu hanesan kondutor hodi sustenta ba nesesidade uma laran.
Iha Tasi-Tolu Kondutor Ricardo Maia hateten nia moris loro-loron mak nu’udár kondutor Kareta Raut Fo’er nian hodi hetan osan oituan atu bele sustenta ba nesesidade uma laran no selu oan sira nia eskola.
“Ha’u nia moris loro-loron mak hodi kareta, antes tuku tolu dadersaan ha’u prepara kareta atu ba raut fo’er ne’ebé mak ema tau iha luron ninin atu ba fakar fali iha Tibar, sai hanesan aman tenke pasensia iha servisu saida de’it nune’e bele hatan ba nesesidade uma laran”. Dehan Kondutor Ricardu Maia Ba Jornalista SAPNewsTL, iha Tasi-Tolu, Dili Domingu, 14/08/2022.
Nia aumenta, nu’udár aman tenke halo aktividade saida de’it hodi haree ba nesesidade familia nian.
“Maske malirin-manas maibé ha’u la sente kolen no baruk tanba moris hanesan aman tenke halo aktividade saida de’it atu bele hadia ba nesesidade uma laran no selu oan sira nia eskola; fo’er ne’ebé ami raut, kada loron ida bele fila dala tolu ou dala rua,no mos iha tempu ne’ebé udan sei raut dala ida de’it no osan ne’ebé hetan kada fulan rihun 1.000.00 no osan ne’e sei fahe fali entaun kada ema ida hetan de’it 100.00 dolar ka 150.00 dolar de’it tanba hamutuk ho konjak”. Tenik nia
Kondutor ne’e hatutan oras ne’e tanba mina folin komesa sa’e nune’e osan ne’ebé sira hetan ne’e la hanesan baibain.
“Agora mina folin sa’e, ami la hetan osan hanesan baibain tanba mina nia folin sa’e no kada loron bele gasta osan privadi hodi ense mina ba aktividade loro-loron no osan ne’ebe hetan dalaruma nia sustenta ba familia uma laran la to’o tanba sei selu konzak ne’ebé mak ajuda raut fo’er”. Nia fundamenta
Entertantu nia husu ba Ministeriu relevante atu rezolve ba problema hirak ne’ebé mak nia hasoru no hatun mina nia folin atu nune’e nia bele hetan osan oituan hodi sustenta ba moris loro-loron no selu partisipante nain lima ne’ebé sai hanesan nia konjak
Jornalista: Aquelina Magalhães
Editor: Luis dos Santos