Kestiona Transparénsia Kaixa UNTL, Estudante Konvida KAK

SAPNewsTL, Dili : Assosiasaun Akadémika Estudantil, Universidade Nasionál Timor Lorosa’e (AAE-UNTL) halo denúnsiu ba públiku hosi kestiona kaixa UNTL, problema supra no infraestrutura  ne’ebé estudante sira enfrenta durante ne’e.

Porta-voz Jenia Filomena Lobo salienta, Asosiasaun Akademik Estudantil nota profesor doutor balun aproveita buka privilejiu no lakunas universidade nian ba interese privadu.

“Universidade Nasional Timor Lorosa’e (UNTL) estabelese ho dekretu Lei N. 16/2010 hanesan universidade públika ne’ebé vinkula ho prinsipiu legalidade maibe Asosiasaun Akademika no estudante nota katak Profesor Doutor balun aproveita universidade hodi buka previlejiu no balun aproveita lakunas universidade nian hodi atinji nia interese pesoal”. Dehan Porta-voz Jenia Filomena Lobo ba Jornalista sira iha Kampus sentral UNTL, (24/09/2024)

Porta-voz Jenia Filomena Lobo hateten, antes ne’e asosiasaun akademika halo ona enkontru iha loron 27 fulan juli tinan 2024 no konsege identifika problema ne’ebe estudante sira enfrenta kauza husi inkapasidade jestaun finanseira universidade.

“Liu husi enkontru primeiru asosiasaun akademika nian iha loron 27/07/2024 konsegue identifika problema ne’ebé estudante infrenta por kauza husi inkasipade jestaun universidade nian, maske universidade ida ne’e finansia husi estadu liu husi Orsamentu Geral Estadu (OGE) no finansia mos husi estudante liu husi pagamentus propinas no kontribuisaun seluk ba kaixa UNTL”. Jenia deklara

Jenia akresenta, ho inkapasidade jestaun UNTL asosiasaun akademika estudantil hala’o enkontru ho estrutura universidade hodi hato’o sira nia preokupasaun hodi konfirma osan kaixa UNTL maibe la hetan resposta pozitivu.

“Ho inkapasidade jestaun UNTL nian Assosiasaun Estudantil liu husi enkontru hato’o preokupasaun ba estrutura universidade iha loron 13/08/2024 atu komfirma osan kaixa UNTL maibe la hetan resposta pozitivu husi estrutura universidade”. Nia dehan.

Asosiasaun akademika estudantil tenta nafatin halo audiensia ho Magnifiku Reitor UNTL inklui subordinadu nain-4 maibe laiha esklaresimentu ne’ebé razoavel.

 “Iha loron 16/09/2024 reprezenta estudante halo audensia ho Magnifiku Reitor UNTL inklui nia subordinadu nain-4 maibe la halo esklaresimentu ida razoavel, maibe estrutura tenta dezvia estudante sira-nia preokupsaun katak ne’e kompetensia universidade nian no estudante la presiza hatene”.

Porta-voz ne’e konsidera aktu  ne’ebe estrutura universidade hatudu ne’e inkapasidade no viola prinsípiu transparénsia, boa governasaun iha kampus.

“Aktu ida ne’e hatudu puramente inkapasidade estrutura Universidade nian no viola prinspiu transparensia no boa governasaun iha kampus no aktu ida ne’e la reflete ba natureza universidade nian hanesan universidade públika”.

“Tanba ne’e liu husi enkontru asosiasaun estudantil iha loron 21/09/2024 desidi denunsia atu públiku hamutuk ho estudante sira halo kontrolu ida di’ak ba funsionamentu universidade nian”. Nia hakotu.

Entretantu, estudante sira mós preokupa ba problema supra no infraestrutura liliu Fakuldade Filosofia Siénsia Humanu uza deit sala rua ba ensinu aprendijajem, edifísiu agrikultura ne’ebé seidauk uza, fakuldade agrikultura uza haris fatin ba servisu administrasaun no uza oportunidade peskiza no estájiu hodi hetan perdiam.

Osamentu UNTL mai hosi fontes rua mak osamentu jeral estadu no kontribuisaun estudante, enkuantu kontribuisaun estudante kompostu  hosi kaixa UNTL ne’ebé mai hosi  osamentu rejistu, osan orientasaun, kontribuisaun graduasaun, kontribuisaun ba edifísiu kada semester, osamentu peskiza, no seluk tan.

Assosiasaun estudantil husu ba Ministériu Ensinu Superior Siénsia no Kultura (MESSK), Comição Anti Corupção (CAC), no Parlamentu Nasionál hodi toma atensaun ba problema ne’ebé estudante hasoru iha UNTL.

Enkuantu, MESSK José Honório husu ba Magnífiku Reitor UNTL JoãoSoares Martins hodi toma atensaun ba preokupasaun ne’ebé estudante sira kestiona iha UNTL.

Ligadu ho preokupasaun refere, SAPNews tenta atu entrevista  ho Magnífiku Reitor UNTL maibé la konsege tanba lider UNTL ne’e okupadu ho servisu seluk.

Jornalista : Daniel Soares & Marciana da Conceição