KHS Hakarak Tulun Governu Kombate Moras Tuberkuloza, Lepra & HIV-SIDA Ho Volúntariu
Imajem : KHS Hala’o Atribuisaun Sertifikadu Ba Formandu sira iha salaun CNC,Sabadu(29/06/2024).
SAPNewsTL, Dili – Knua Habelar Siensia(KHS), sertifika membru 235 iha area tuberkuloza,lepra no HIV-SIDA, KHS existe hodi tulun sosiedade no ministériu saúde liu husi haburas espiritu voluntatismu hodi hari’i sosiedade ida saudavel no livre husi tuberkuloze, lepra no HIV-SIDA.
Diretor Knua Habelar Siensia(KHS), Nelson Martins hateten KHS realiza eventu simu sertifikadu ba formandu sira ne’ebe mak remata, no ohin loron espesial tanba KHS regista membru mil volúntariu ne’ebe mak hamutuk bainhira KHS estabelese iha tinan 2019.
Knua Habelar Siensia ne’e mai ho visaun no misaun atu habelar siensia ba komunidade sira, maibe alende ne’e forma mos jovem sira atu bele ajuda ministeriu saude hodi tun ba baze habelar siensia hodi liberta povu husi moras TBC, lebra no HIV-SIDA
“Moras TBC, Lepra no HIV-SIDA ne’e moras kronika ne’ebe mak susar tebes maske estadu estabelese ona sentru saude ho fasilidade kompletu maibe nafatin moras barak mak lakon iha komunidade, tanba ne’e Presiza organizasaun sira hanesan KHS no parseiru seluk sira atu tulun governu tun ba baze hodi halo promosaun no fahe informasaun lolos ba komunidade sira hodi identifika sedu” Dehan Diretor Knua Habelar Siensia, Nelson Martins ba Jornalista sira iha salaun CNC,Sabadu(29/06/2024)
Representante Formandu husi area Tuberkuloza bazika Norberto Neto Freitas fo agradesimentu ba fundador KHS ne’ebe mak ho sira nia inisiativa bele kria knua ida ne’ebe mak bele halibur jovem sira hodi bele aprende siensia.
“Siensia ne’ebe mak ita aprende, labele ho ita deit maibe tenke habelar ba ema selu-seluk ne’ebe mak iha, siensia ne’ebe mak ita aprende ita mos tenke fahe ba ita nia inan aman sira no sosiedade sira”. Nia haktuir
Formandu ne’e sente orgullu no kontente nu’udar membru foinsa’e ne’ebe aprende iha KHS tanba bele fo oportunidade ba sira atu aprende, aktividade ne’ebe mak durante ami hala’o ho voluntariu maibe iha valor ida ne’ebe mak furak tebes mai ita.
Presidente Komisaun Organizadora Barbosa Araujo Timan informa katak Knua Habelar Siensia katak atinji ona nia membru hamutuk mil pessoas ne’ebe mai husi universidade ne’ebe la hanesan no departamentu ne’ebe mak la hanesan maibe iha area saude nian.
Nia haktuir iha tinan 2019 KHS hari’i insia husi professor doutor Nelson Martins, ne’ebe mak membru registadu hamutuk 22 feto sanulu resin Ida (11), no mane sanulu resin ida(11). Iha tinan 2020 membru husi formasaun Tuberkuloza bazika hamutuk 104 pessoas kompostu husi 29 mane no 75 feto.
Aleinde durante tinan tolu(3) nia laran husi 2021 to’o 2023 dadus ne’ebe mak presidente komisaun haktuir katak membru hamutuk 603
“Iha tinan 2021 regista membru hamutuk 54 pessoas kompostu husi 17 mane ho feto 37. Iha tinan 2022 KHS regista nia membru hamutuk 97 mane 34 no feto 63, no membru ne’ebe mak tuir formasaun Tuberkuloza basika hamutuk 202 pessoas mane 62 ba feto 140. Iha tinan 2023 regista nia membru ba iha etapa Primeiru ho segundu hamutuk 250 mane 60 no feto 90” nia informa
Dadus ne’ebe mak iha durante 2019 to’o 2023 membru registradu hamutuk 750 ne’ebe mak aprende hamutuk iha Knua Habelar Siensia, ne’ebe kompostu husi mane 216 pessoas no feto 524 pessoas.
Enkuantu, membru sira ne’ebe mak preparadu ona atu simu sertifikadu iha Tuberkuloza, Lepre, no HIV-SIDA ne’e ho total 235 pessoas ne’ebe mak kompostu husi lepra 43 pessoas , HIV-SIDA hamutuk 25 pessoas, Tuberkuloza hamutuk 165 pessoas
Jornalista: Marcela Mery da Costa