KHUNTO Konsolida Masa, Promete Hasa’e Saláriu & Lori Desenvolvimentu

Imajem : Espesial

SAPNewsTL, Baucau : Dalan ba festa demokrasia, Partidu Kmanek Haburas Unidade Nasional Timor Oan (KHUNTO) realiza tomada de posse ba militante hamutuk 1.100 iha postu administrativu Laga, munisípiu Baucau.

Dircia Baptista – SAP News Plus

Koordenador Partidu KHUNTO munisipiu Baucau Ângelo Angelito Freitas Correia agradese ba ezekutivu nasionál tanba bele realiza atividade tomada de posse ba estrutura foun iha suku sia, postu administrativu Laga.

“Ha’u haree iha tempu uluk tinan 2011 to’o 2017, ami la’o sa’e mai iha Laga sidi ain, dala ruma ai tarak sona ami maibe ohin kompara ba kotuk iha diferensa, ita iha mudansa ne’ebe maka boot iha iha postu Laga”.

“Baucau uluk kuandu ita tama iha Laga ai-sar ne’e monu keta-ketak la iha ema ida tau hamutuk maibe ohin ai-sar ne’e KHUNTO mai hili tau hamutuk ona, ha’u fiar katak sai futun ida sei dasa foer iha Laga ne’e sai moos”. Dehan Koordenador Munisipio Baucau Partidu KHUNTO Ângelo Angelito Freitas Correia iha postu administrativu Laga suku Sae-lari,07/03/2026.

Koordenador ne’e kompromete sei servisu makaas hodi aumenta votus iha eleisaun presidensial 2027 no eleisaun parlamentar 2028.

“Knaar ne’ebe ita simu ne’e responsabilidade, Laga ita esforsu hodi KHUNTO bele manan maioria, nune’e mós iha munisípiu Baucau, liafuan ida ne’e hakarak rai hela no kari hela ba emposadu sira ne’ebe ohin simu responsabilidade, ne’e todan maibe ho pasiénsia, ita lori bazeia ba mandatu”. Nia afirma

Presidente Partidu KHUNTO Armanda Berta dos Santos apresia ba estrutura partidu munisípiu Baucau liliu postu administrativu Laga ne’ebe servisu makaas hodi fo vitória ba KHUNTO iha eleisaun Presidensial no eleisaun parlamentar mai

“Emposadu hamutuk 1.007 ne’ebe ohin hetan responsabilidade, ha’u fiar katak sei bele aumenta votus iha Munisipio Baukau, agradese ba Baucau ne’ebe uluk fo votus, KHUNTO sei la haluha, ita prepara an oinsa bele hasoru eleisaun presidente ho eleisaun Parlamentar iha tinan 2027 no 2028, hau fiar katak ita boot sira nian sei bele aumenta votus iha Baucau laran tomak espesial ba postu Laga”. Sublinha Presidente Partidu KHUNTO Armanda Berta.

Konseleiru Máximu Partidu KHUNTO Jose dos Santos Naimori Bukar apresia ba juventude Postu administratibu Laga tanba kria paz no estabilidade. Naimori sublinha KHUNTO hamrik hodi defende no proteje povu atu ema hotu bele moris diak no goza desenvolvimentu.

“KHUNTO mai atu haluha tiha passadu ne’ebe mak ita halo, ita koko buat foun ida ne’ebe iha ita-nia oin, desenvolvimentu hotu-hotu la’o maibe fo moris deit ba empresáriu sira. KHUNTO luta hodi defende, asegura no proteje povu, atu ema hotu moris hanesan, la bele ema ida rua maka bosu, ema hotu-hotu kabun hamlaha”.

KHUNTO hakarak ema hotu-hotu iha osan, nune’e Konselleiru Partidu KHUNTO ne’e promete wainhira fila ba ukun sei realiza kompromisu kada tinan fahe $ 500 ba povu

“KHUNTO nia preparasaun, tinan ida kada família sei hetan 500 dolar, ema iha uma-lisan hetan osan para hadia ninia uma lisan, KHUNTO hakarak ema hotu-hotu tenke moris hanesan”.

Iha oitavo Governo konstituisional partidu KHUNTO halao nia programa ema balun resieta ho programa oitavo Governo maibe povu senti desenvolvimentu hodi resolve nessesidade iha Uma kain.

“Uluk ita koalia 200 dolar ema dehan la diak hau la diak nee husi ne’ebe dehan tok mai inan isin rua osan la iha ita nia inan feton sira isin rua uluk osan iha tanba ida ne’e labele soe bebe, labarik isin diak no inan han diak, ita kuidadu halo buat sira nee mais ema dehan KHUNTO la diak”.

“Ema sempre dehan iha Facebook dehan konseleiru Naimori ho Presidente Partidu KHUNTO mesak beik, atu lori nasaun ba ne’ebe, ha’u dehan ba sira los maibe la naok ten tanba ami rua beik”.

Konseleiru Máximu ne’e deklara estrada postu Laga liga ba suku sira halo mandatu oitavu governu. Estrada ba Kelikai no Baguai ne’e aprova no halo iha mandatu oitavu governu.

Naimori hatutan, Timor-Leste atu ba oin, F-FDTL & PNTL nia osan tenke hasa’e, ema hotu-hotu nia osan tenke sa’e, nune’e povu bele hetan osan barak, goza frutu husi ukun rasik an no partisipa ativa iha desenvolvimentu nasionál.

Tomada de posse ba estrutura no konsolidasaun ba militante hamutuk 1.007 ne’e partidu KHUNTO iha Laga ne’e hetan partisipasaun maksimu hosi estrutura nasionál, munisipal no estrutura postu administrativu Laga ne’ebe kompostu hosi Suku 9.