KI & ABC-ID Fasilita Formasaun ‘Storytelling’ Ba Jornalista 15

SAPNews TL, Díli – Concelho de Imprensa (CI), hamutuk ho ABC. International Development hala’o formasaun storytelling ba jornalista sira durante loron rua (2).

Prezidente Concelho de Imprensa (sigla Portugés, CI) Otelio Ote, konsidera formasaun ne’e importante tebes ba jornalista sira tanba, laiha instituisaun favoritu iha Timor atu hetan edukasaun di’ak iha area jornalismu, no apresia tebes ba imi hotu ne’ebé hili mundu jornalismu ne’e hanesan parte ida husi luta ba Nasaun.

“Ha’u rasik apresia tebes ba imi hotu ne’ebé hili mundu jornalismu ida ne’e tanba, ne’e parte ida husi luta ba ita nia Nasaun, ita mak tilun, ibun, matan no lia los ba povu, formasaun hirak ne’e importante los ba jornalista, tanba ita hatene Timor ne’e laiha instituisaun ne’ebé favoritu atu bele hetan edukasaun diak iha area jornalismu nian”.Dehan Prezidente Concelho de Imprensa Otelio Ote ba jornalista sira iha Palm Center, Salaun Brandit All hudi laran, 25/06/2024.

Prezidente CI hateten, sente orgullu no apresia ba aprosimasaun husi ABC. International Development durante tinan ida fulan neen (6) nia laran, hamutuk ho Concelho de Imprensa (CI).

“Desde Tinan ida (1) fulan neen (6) liu ba, ita halo kooperasaun ho ABC. Internasional Development, Conselho Imprensa sente orgullu no apresia tebes ba ABC.ID nia aprosimasaun ho CI tanba desde hahu sira nia servisu iha ne’e, sira laos ona ema foun ba Timor”. Hateten Prezidente Concelho de Imprensa.

Lideransa Orgaun Regulador ne’e akresenta, jornalista balun hala’o knaar iha mundu jornalismu durante tinan sanu (10), no balun foin hahu no hala’o ona teknika kobertura iha terenu.

“Hanesan ohin hateten balun hala’o knaar jornalista tinan sanulu liu, no balun foin hahu iha mundu jornalismu nian, sira halo tiha ona teknika kobertura iha terenu, ita koñese teknika kobertura ne’ebé konvensional mak observa, intervista no peskiza, teknika tolu (3) ne’e maka uza tiha ona iha terenu”. Nia deklara.

“Ohin ita iha formasaun ida storytlling (notisia not just talking but you have to tell something), halo notisia labele koalia deit tenke dehan netik buat ruma”. Nia kontinua.

Prezidente CI Otelio Ote, mos hateten, fulan kotuk jornalista balun tuir ona formasaun, no sira ne’ebé ohin tuir formasaun ne’e sorte tebes tanba formasaun ohin diferente ho formasaun fulan kotuk.

“Fulan kotuk kolega balun tuir ona formasaun no ohin karik imi sei partisipa, entaun sorti ituan tanba ohin bele hetan tan oportunidade hodi tuir formasaun ida diferente ho fulan kotuk nian, ha’u husu atu imi bele konsentra loron rua nia laran husi dader to’o loraik”.

Prezidente CI Otelio Ote hateten, Concelho de Imprensa sei hili fali membru foun iha fulan dezembru tinan ne’e, no iha fulan fevereiru 2025 sei iha CI foun, nia espera membru foun ne’e kontinua metin ho ABC. ID iha periodu tuir mai.

“Fulan Dezembru tinan ne’e sei hili fila fali membru CI foun, espera katak ABC. Internasional Development kontinua metin ho CI, iha periodu tuir mai iha tinan haat (4), hahu husi fevereiru 2025 hodi hadia, haklean no haburas liu tan Formasaun ne’ebé hala’o ona durante kooperasaun tinan rua (2) nia laran”. Nia hakotu

Iha fatin hanesan, Maria Tavare husi média STL, hanesan reprezenta jornalista sira ne’ebé tuir formasaun formasaun storytelling, agradese ba Concelho de Imprensa (CI) ne’ebé koopera hamutuk ho ABC. International Development hodi realiza formasaun refere no kapasita jornalista sira.

“Ha’u hanoin formasaun ne’e di’ak tebes ba jornalista sira, ida ne’e hanesan parte ida hodi kapasita ita nia koñesimemtu iha area jornalismu nian atu bele implementa iha terenu, agradese ba CI ne’ebé koopera ho ABC. ID, hodi fasilita formasaun ida ne’e”,

Jornalista ne’e mos husu konsellu imprensa hodi kontinua kolabora ho entidade relevante sira, nune’e bele kontinua fasilita formasaun no hasa’e kunhesimentu jornalista sira nian iha futuru.

“Husu ba CI nafatin kontinua formasaun sira hanesan ne’e ba futuru, nune’e bele aumenta liu tan koñesimentu jornalista sira nian”. Hateten Merlina Tavares husi média STL.

Fasilitador ba formasaun storytelling membru husi ABC. International Development Fiona Churchman hateten, formasaun storytelling hare liu kona-ba oinsa ita bele hetan ideia sira ba istoria, halo peskiza nomos identifika parte interesada sira hodi halo intervista, no ema sira ne’ebé sei hetan impaktu husi istória sira ne’ebé jornalista sira halo.

“Formasaun storytelling ne’e, oinsa hakerek istória ne’ebé ita boot hetan hodi hakerek ba plataforma diferente hanesan televizaun, radio, jornal online no sosial média, no presiza hanoin mos asuntu sira ne’ebé importante tebes ba ema sira iha Timor laran, hanesan jornalista oinsa ita boot sira bele hato’o fila fali istória ne’e di’ak liu tan ba rona nain no hare nain sira”. Fiona Churchman haktuir

Fiona Churchman deklara sira nia parte sente orgullu tanba bele servisu hamutuk ho konsellu imprensa hodi fo formasaun ba Jornalista sira.

“ABC.ID kontente no sente onradu tebes bele servisu hamutuk ho CI Timor-Leste, ami mos halo ona formasaun ba jornalista sira iha oe-cusse, Balibo no Díli, ami sei nafatin halo formasaun barak liu tan iha futuru liu-liu kona-ba storytelling, no formasaun ba média digital nian, reportajen klean no investigativu”.

Entretantu, jornalista ne’ebé ohin tuir formasaun storytelling ba jornalista Timor-Leste husi IBC. ID, hamutuk sanulu resin-lima (15) husi média ne’ebé lahanesan, formasaun ne’e mos halo ona iha Balibo, Oe-Cusse inklui Díli.

Jornalista : Marciana da Conceição