Kobertura Vizita Santu Padre, Jornalista Nasionál Hamutuk 300

SAPNewsTL, Dili – Jornalista nasionál hamutuk atus tolu (300) mak sei kobertura ba vizita Sua Santidade Papa Francisco iha loron 09-11 Fulan Setembru 2024 iha Timor-Leste.

Sekretaria Estadu Komunikasaun Sosial (SEKOMS) Espedito Dias Ximenes haktuir nia parte distribui ona kartaun akreditasaun ba  jornalista nasional hamutuk 300 ne’ebé sei halo kobertura ba vizita Amu Papa durante loron tolu.

“SEKOMS, ohin fahe ona kartaun akreditasaun ba jornalista nasionál hamutuk atus tolu (300), ha’u husu atu bele halo kobertura tuir regra no respeitu rekezitu sira ne’ebe fó”. Tenik SEKOMS Espedito Dias Ximenes ba jornalista sira iha Nunsiatura Motael, 04/09/2024

Sekretariu Estadu ne’e informa governu prepara ona sentru media maka iha Salaun Ministériu Transporte no Telekomunikasaun (MTK), Otél Hilton no Tasi-Tolu, Media rua ne’ebe sei halo transmisaun direta mak Rádiu Televizaun Timor-Leste (RTTL,E.P) no Grupu Média Nasionál (GMN-TV).

“Governu prepara ona média center tolu, jornalista sira bele uza durante loron tolu, televizaun rua mak sei halo live streaming maka RTTL, E.P no GMN”. nia informa

Jornalista internasionál ne’ebe akompanha Amu Papa hamutuk ualunulu resin-ualu (88) no sira ne’ebe rejistu hamutuk hitunulu resin-lima (65), enkuantu jornalista nasionál hamutuk 300.

Nune’e jonalista internasionál no nasionál ne’ebe akreditadu atu halo kobertura hamutuk atushaat limanulu-resin-tolu (453).

Fo hanoin fali katak fatin neen ne’ebe Sua Santidade Papa Francisco sei halo vizita maka hanesan Nunsiatura Motael, Palásiu Prezidensial Nicolau Lobato, Orfanatu Madre Alma Pantai-Kelapa, Igreza Catedral Metropolita de Dili, Tasi-Tolu, no Centro Concenções de Dili (CCD), hafoin sei kontinua nia vizita apostólika ba nasaun Singapura no fila fali ba Vatikanu.

Jornalista : Ermelinda Soares & Conzita Mota