Kolleta Meci Sai Kultura & Istória Ba Lautém ! Produtu Úniku Iha TL
Imajem : Komunidade kolleta meci iha Lautém, 09/03/2026. Foto : Sejario da Costa
SAPNewsTL, Lore : Meci nu’udar produtu natural úniku, istóriku no kultural ne’ebe kada tinan populasaun Lautém, postu administrativu Lore kolleta hodi konsumu tanba ne’e hahan ne’ebe mosu tinan ida dala ida.
Komunidade Lore Adelino Mirande informa komunidade barak mak kalan ne’e partisipa atividade koilleta Meci ka ular tasi iha Lori, Lore, Munisípiu Lautém.
Istorikamente atividade koilleta Meci sai hanesan kultura ba komunidade Loré desde beiala sira nia tempu to’o ohin loron.
“Meci sai ona tradisaun, kultura ka rikeza ba postu Lore no mesi hanesan milagre ida ba komunidade postu Lore tanba Postu Loré Munisipiu Lautém identifika mesi ka ular tasi depende ba tempu entaun nia mosu iha Loré hanesan milagre ida wainhira derepenti nia lakon de’it tuir nia tempu”. Dehan Adelino Miranda ba SAPNews iha Lore, 09/03/2026.
Tuir historia maun alin nain rua husi uma lisan Chailor pertense ba postu Lore mak deskobre meci ka ular tasi bainhira sira ba tasi hodi buka ikan, bazeia ba istoria ne’ebe haktuir husi beiala sira mesi sai hanesan hahan ba komunidade Lore.
“Meci, uluk ita-nia beiala sira mak hetan no deskobre ida ne’e lisan Chailor mak deskobre animal ida neʼebé ita hanaran Meci no sira nain rua husi familia ida Chailor maun alin neʼebé ba tasi hodi buka ikan iha tasi laran maibé wainhira iha tasi laran sira hasoru animal boot ida hanesan nú huun ne’ebé toba latan hela iha tasi leten”.
Husi historia ne’e ikus mai sira deside aumenta tan uma lisan nia naran husi Chailor ba ta’ana katak ta’a ain tanba nia maun ta’a nia ain wainhira atu taa animal ne’e, ida ne’e mak sira uluk ne’e lisan Chailor maibe sira aumenta iha ta’ana.
“Wainhira sira komesa kolleta oituan hodi lori ba uma te’in no han maibe sira husu ba malu, nia maun dehan husik ha’u mak han uluk, nune’e ha’u mate karik, ita boot bele konta tuir ba ema hotu no konta tuir ba ita-nia jerasaun katak ida ne’e labele han, wainhira nia han iha nia sabor katak midar ikus mai haruka nia alin hodi han no fahe oituan ba sira nia viziňu neʼebé hela besik ho sira”.
Iha fatin hanesan, inan feton Maculada Soares sente kontente wainhira hola parte iha atividade kolleta meci iha kalan ne’e tanba hetan barak no bele konsumu ho família sira.
“Ami kontente bele kolleta meci iha kalan ne’e, kalan ida ne’ebe ami barak mai tasi hodi foti mesi, ne’e desde uluk ami halo ida ne’e”. Nia sublinha
Kritériu atu asesu ba kolleta meci mak labele pinta ibun, rega mina morin no fokus hodi kolleta meci tanba dala ruma hetan uituan, laiha liu no bele hetan barak depende ba esforsu no sorte.
Tuir observasaun Sapnews Pro iha terenu nota katak atividade kolleta ne’e maioria jovens feto no mane, adultu no labarik sira. Sasan ne’ebe sira lori hodi kolleta mak lâmpada, bote, basia no karon.
Enkuantu, kolleta meci hala’o desde 2020, iha tinan 2025 Lore oan forma komisaun no halo tuir ho serimónia kultura iha loron 20 to’o 21 fulan Marsu 2025. Iha tinan ne’e komunidade sira kolleta iha loron 08-09 fulan Marsu 2026.
