Kombate Malnutrisaun ! Assanami : BTL-EP Tenki Halo Mapamentu Ba Kualidade Bee Iha Timor
Imajem : Vice Primeiru-Ministru, Ministru Kordenador Asuntu Sosiál no Ministru Dezenvolvimentu Rural no Habitasaun Komunitaria (MDRHK) Mariano Assanami Sabino.
SAPNewsTL, Díli — Vice Primeiru-Ministru, Ministru Kordenador Asuntu Sosiál no Ministru Dezenvolvimentu Rural no Habitasaun Komunitaria Mariano Assanami Sabino husu Empreza Publika Be’e Timor-Leste (BTL-EP) atu halo mapamentu ba kualidade bee iha Timor-Leste.
Tuir Vice Primeiru-Ministru (MDRHK) Mariano Assanami Sabino hateten, mekanismu mapamentu bele fasilita tekniku BTL-EP hodi deskobre bee ne’ebe ho kualidade diak iha rejiaun Timor-Leste, bainhira ekipa BTL-EP halo fornesimentu bee ba komunidade konsumidor sira.
“Husu ba Bee Timor-Leste (BTL-EP), atu halo mapamentu iha Timor laran katak iha ne’ebe mak bee kualidade tenke proteje fila fali no halo barazen no tanki bo’ot ba sira ne’ebe mak presija molok fornese ba komunidade konsumidor”. Dehan Vice PM Mariano Assanami liu husi nia diskursu, hafoin partisipa serimonia Lansamentu PANKOS iha Salaun Delta Nova, Quinta (13/03/2025)
Governante ne’e afirma, deskobrementu ba be’e ne’ebe ho kualidade fó higene ne’ebe saudavel ba konsumidor sira, inklui kontribui ba Planu Asaun Nasional Kombate Stunting ka Raes badak iha Timor-Leste.
“Empreza Publiku BTL-EP tenki halo mapamentu ida adekuadu hodi deskobre ita nia bee sira iha Timor-Leste ne’ebe ho kualidade diak, molok halo perfurasaun hodi kanaliza ba konsumidor sira hotu”.
Assanami aprofunda, IX Governu serbisu hamutuk ho, Unidade Kombate Stunting (UNMICS), UNICEF, no linhas ministerias sira oinsa intensifika Planu Asaun Nasional Kombate Stunting, hahu agora no ba futuru, nune’e ema hotu iha dever atu proteze biodiversidade no ai horis sira ne’ebe besik bee matan sira.
“Ita tenke konserva fila-fali ai-laran tuan sira atu bele proteje bee, programa ida kona-ba ba kuda bee signifika katak fatin sira ne’ebe mak husik hela, ita rai bee iha laran atu nune’e be’e matan bele mosu fali”.
(Jornalista: Marcela Mery & Guilhermino Ramos)
