Komemora Tinan 25 Konsulta Popular ! Komunidade Talale La Sente Ukun An
Imajem : Komunidade Aldeia Talale Suku Edi, Postu Administrativu Maubesse, Munisípiu Ainaru, 22/08/2024. Foto : Genoveva Lopes Sarmento
SAPNewsTL, Ainaro – Tinan XXII ona Timor-Leste konsagra nia vitoria ba ukun rasik an, hodi kore an husi inimigu nia liman kroat, maibé komunidade Aldeia Talale Suku Edi Postu Administrativu Maubisse, Munisipiu Ainaro kontinua moris iha nakukun laran tanba makaer ukun sira seidauk tau matan.
Tuir Observasaun Média SAPNews Timor-Leste nota iha terenu katak, komunidade iha aldeia refere to’o ohin loron deskontenti, tanba seidauk senti Timor-Leste nia ukun rasik aan, ho rajaun aldeia Talale seidauk asesu ba infraestrutura bazika hanesan, eletrisidade, estrada, sentru saúde no laiha linha internet.
Bazeia ba informasaun ne’ebe Redasaun SAPNews, rekolha iha loron 22/08/2024 hatudu katak, komunidade lubun ida iha Aldeia Talale Suku Edi, la asesu ba linha eletrisidade, internet, sentru saúde, estrada no bee moos tanba governu la tau matan.
Ukun an ne’ebe la’o to’o ona tinan XXII, tinan ne’e komemora XXV anus loron konsulta popular maibe povu barak kontinua halerik iha area rural.
“Lolos la tempu ona atu povu sai atan ba nia rai rasik tamba povu sakrifika no dedika sira nia aan tomak hodi sosa ukun rasik a’an, ne’e duni labele husik povu sai vitima bebeik ba buat nebe’e sira rasik hakarak tamba husi povu nia kontribuisaun mak governante sira hetan kna’ar iha Governu no Parlamentu Nasionál”.
Situasaun ne’ebe hatudu faktu katak kondisaun estrada ligasaun Aldeia Talale ba postu Administrativu Maubisse att resulta ba movimentu transporte publiku no privadu sira, inklui difikulta komunidade asesu ba merkadu, liliu prejudika ba komunidade vuneravel sira atu hetan lukru hodi sustenta familia no oan sira nia eskola
Dala barak ona komunidade rona promesa furak husi membru governante sira iha tempu kampaña eletoral, partidu politiku sira hatudu sira nia maturidade, matenek no logika maibé hetan tiha responsabilidade husi povu, Governante sira la konsege realiza sira nia promesa to’o ohin loron povu barak kontinua halerik ba dezenvolvimentu.
Maioria estudante barak mak hela iha area remotas, susar ba sira tamba laiha linha internet no laiha eletrisidade hodi fasilita sira atu bele estuda iha tempu kalan no asesu ba informasaun sira, sira labele asessu informasaun importante liu husi media sosial.
Realidade ne’e sai mós preokupasaun no obstakulu ba estudante sira iha aldeia Talale tanba sira labele estuda iha tempu kalan no asesu referénsia sira hodi hasa’e sira nia kunhesimentu.
Aldeia Talale hola parte husi Munisipiu Ainaro, Postu Administrativo Maubisse, Suku Edi, komunidade sira ne’ebe hela iha aldeia refere maioria moris ho vida agrikultor.
Komunidade sira iha Aldeia refere iha potensia boot hodi kuda produtu lokal sira hanesan modo aimanas, Fehuk, Kafe, no koto, maibe sira labele lori produtu hirak ne’e ba fa’an iha merkadu tamba kondisaun estrada aat.
Komunidade Talale ne’ebe seidauk iha sentru saude, wainhira inan isin rua sira no idade vulneravel sira hetan moras sira la’o to’o Maubisse Vila hodi trata sira nia moras maibe kuandu udan sira labele Maubisse Vila tanba kondisaun estrada ne’ebe fo ameasa tebes hanesan rai monu, fatuk monu no mota boot.
Antes ne’e, SAP News hala’o ona kobertura dahuluk iha Aldeia refere, autoriedade lokal sira preokupa tanba komunidade sira iha aldeia ne’ebá falta tebes atensaun hosi governu sentral durante tinan XXII.
Hafoin notísia ne’ebe públika SAPNews seidauk halo komfirmasaun ho Ministériu Obras Públika (MOP) tanba sei okupadu ho servisu balun.
Jornalista : Genoveva Lopes Sarmento