Kompaña Servisu Lentu ! Komunidade Balibo Susar Tebes Ba Bee-Moos
Imajem : Komunidade Balibo kuru bee-moos iha Balibo, 13/10/2025. Foto : Marciana da Conceição
SAPNewsTL, Bobonaro : Kompañia Leohara halo kanalizasaun bee-moos tarde hodi rezulta komunidade Balibo tenke ba kuru bee ho distansia ne’ebé dook.
Autoridade Lokal Manuel da Cruz hateten, tuir lolos kanalizasaun refere finaliza ona iha fulan setembru maibé to’o agora seidauk iha faze finalizasaun.
“Suku Balibo Villa iha aldeia haat ne’ebe susar tebes ba bee-moos tanba deit ho konstrusaun ne’ebé la’o hela, agora konstrusaun ne’e atraja oituan”.
“Tuir lolos konstrusaun ne’e remata ona tanba tuir akordu ne’ebe sira kontratu entre konpaña ho governu ne’e hala’o iha fulan jullu to’o deit setembru maibe agora to’o ona outubru, ne’ebe governu extende tan fulan ida”. Dehan Xefe Suku Balibo Villa Manuel da Cruz ba jornalista sira iha nia knaar fatin, 13/10/2025
Autoridade lokal ne’e afirma, realidade ne’ebé komunidade sira enfrenta susar tebes ba sira ne’ebe laiha kbi’it naton hodi sosa bee no laiha transporte hodi tula bee-moos tenke la’o ain ho distansia ne’ebe dook.
“Ita haree ba realidade bainhira komunidade sira presiza bee tenke la’o dook hodi asesu ba bee-moos, komunidade sira ne’ebe iha transporte ne’e diak maibe ba sira ne’ebe laiha transporte ne’e susar tebes”.
“Sira tenke sosa fiber ida ho montante osan 15 dolares maibe komunidade sira ne’ebe kbi’it laiha atu sosa sira tenke lori masa la’o ain hodi buka bee-moos iha aldeia Belola ka Buileku ho distansia ne’ebé dook”.
Antes seidauk halo konstrusaun komunidade sira infrenta bee-moos maibe ladun, hafoin kanalizasaun bee ne’e loke semana ida dala ida ka dala rua.
Nune’e Autoridade lokal husi suku Balibo Villa husu ba parte guvernu liu-liu parte kompetente sira hodi orienta kompaña ne’ebe responsavel bele aselera lalais kanalizasaun ne’ebe agora la’o hela, nune’e komunidade labele buka bee.
Iha fatin hanesan, komunidade Maria dos Santos hateten durante fulan rua nia laran bainhira bee la sai sira haruka nia oan sira hodi ba lalin bee-moos hodi fasilita nesesidade uma laran.
“Durante fulan rua ona bainhira bee la sai ami haruka oan sira tenke la’o ba buka bee iha bee matan ne’ebe sira hetan, ami iha ne’e kuru troka malu deit no uza ba loron ida ka rua, depois hotu ami haruka fali oan sira ba buka bee-moos iha bee matan”. Dehan Maria dos Santos.
“Durante ne’e ami la sosa bee tanba oan barak ami haruka sira ba kuru, dalaruma uza motor hodi lalin deit”.
Komunidade suku Balibo Villa Geronimo Soares akresenta, sira kuru bee-moos iha Bebola hodi fan fila fali ba komunidade sira, no dalaruma sira oferese bee gratuita ba komunidade ne’ebe kbi’it laiha hodi sosa bee.
“Ami faan bee-moos iha Belola hodi mai faan fali ba komunidade sira iha area merkadu nian deit. Dalaruma ami ajuda komunidade sira ne’ebe kbiit laiha atu sosa bee-moos ami ajuda hodi fo bee ba sira”. Dehan nia.
Administrator Postu Administrativu (APA) Balibo Casimero dos Santos husu ba komunidade sira hodi pasensia tanba projetu la’o hela no bele finaliza kanalizasaun bee-moos iha fulan rua nia laran.
“Loos katak agora komunidade prezudika tebes bee-moos no parte igreza mos kestiona kona-ba ida ne’e, maibe ita pasiensia uituan tanba ita-nia projetu la’o hela, karik fulan ida ka rua bele finaliza projetu ida ne’e, ita bele hetan bee-moos ne’ebe sufisiente”. Nia subliña.
“Foin dadauk, ha:u koalia ona ho parte kompaña no sira hateten katak tanke maka seidauk finaliza maibe tanke boot kompaña monta hotu ona no agora hatama hela bee maibe debitu bee mak menus uituan”.
Administrator ne’e afirma, parte kompaña ne’ebe halo kanalizasaun bee iha difikuldade atu dada kanu ba komunidade sira tanba hein hela orientasaun husi parte governu atu bele koa estrada ka labele koa.
“Atu dada bee ba komunidade sira-nia uma problema maka estrada, tanba atu korta estrada presiza koa alkatraun ka aspal, entaun sira sei hein hela orientasaun husi governu katak kanu ne’e bele ko’a ka lae, komunidade sira ne’ebe la korta estrada ida ne’e sira monta hotu ona kanu”.
Entretantu, iha aldeia haat hanesan Balibo Villa, Atara, Amandato no Fatululic ne’ebe ho total uma kain hamutuk 774, daudaun ne’e seidauk asesu bee-moos 100% tanba iha hela faze kanalizasaun ba bee-moos.