Komunidade Atsabe Inaugura Uma Lulik Aci-Ubu

SAPNwesTL, Ermera: Família Jerasaun Uma Lisan Aci-Ubu halibur hamutuk selebra no inaugura Uma Lulik Aci-Ubu, Iha intervista Jerasaun Kontinuador Manuel Oliveira haktuir Uma Lisan Aci-Ubu hari’i husi Avo Lulik Feto ida no Mane ída ne’ebe hahoris Maun Alin Nain tolu, ohin Jerasaun husi avó nain tolu ne’e halibur hamutuk hodi hametin unidade familiar

Manuel Oliveira hateten, Uma Lisan Aci-Ubu hari’i husi Avó Na’in tolu ninia Jerasaun, Uma Lulik ne’e hahu hafoun ona tanba ho mudansa klimátika halo material balun ne’ebé uluk Beiala sira uza hodi halo uma ne’e laiha ona

“Uma Lisan Aci-Ubu ne’e hari’i husi Avó Na’in tolu ninia Jerasaun, Uma Lulik ne’e hafoun ona ho ninia material konstrusaun sira tanba kauza husi mudansa klimátika halo material sira ne’ebé uluk beiala sira uza ne’e laiha ona, entaun ami uza ona semente, rai henek, Zinku, Besi, no sasan sira seluk tan, maske uluk avó sira uza Duut, aí, tali natural”. Tenik Jerasaun Kontinuador Manuel Oliveira Aci-Ubu, Iha Suku Atara, Postu Administrativu Atsabe, 19/08/2023

Jerasaun Kontinuador ne’e hatutan, Konstrusaun Uma Lulik Aci-Ubu konstroi durante tinan tolu resin, iha ne’ebé nia badaen mai husi Jerasaun Uma Lisan ida ne’e nian rasik, Uma Lulik ne’e Maiz ou Menuz gasta Orsamentu hamutuk 21.000 resin, osan hirak ne’e mai husi kontribuisaun familia nian

Durante halibur malu hamutuk, Jerasaun Uma Mané simu Fetosan sira tuir Kultura no tradisaun Familia nian liu husi tara Taís, Tebe, bidu no dahur, halo Serimonia ritual hodi han bua no malus molok tama ba vizita uma Tradisional refere

Iha Serimónia Inaugurasaun ne’e hetan partisipasaun maksimum husi Fetosan no Uma Mane, halibur malu durante semana ida liu husi halibur animal sira hanesan Bibi Karau, Fahi, inklui foos, mina no seluk-seluk tan

Uma Lisan Aci-Ubu hari’i iha Suku Atara, Postu Administrativu Atsabe, Munisípiu Ermera, Uma Lulik ne’e hari’i durante tinan tolu resin molok to’o iha faze inaugurasaun

Jornalista : Conzita Sandra Mota