Komunidade Fo Ultimatu Ba MOP Hapara Konstrusaun Moru Iha Asulau
Imajem : Konferénsia Imprensa hosi Natar na’in iha Asulau, Ermera,29/08/2025
SAPNewsTL, Ermera : Ligadu ho ezijensia natar nain iha Munisípiu Ermera, suku Asulau kona-ba projetu halo moru protesaun ba mota Laueli komunidade sira fo ultimatu semana rua ba Ministeriu Obras Públika (MOP) hodi halo despaixu hapara projetu refere.
Marciana da Conceição & Marino Pinto – SAPNewsTL
Portavoz Julio Cesar hamutuk ho komunidade natar nain kontinua reafirma sira-nia pozisaun ligadu ho ezijensia ne’ebé antes ne’e hato’o ona ba Ministeriu Obras Públiku (MOP) no deputadu sira hodi hatun despaixu hapara halo moru protesaun ba mota dalan anterior metru 1000.
Nune’e komunidade natar nain sira fo ultimatu semana rua ba Ministeriu Obras Públika hodi hatun despaixu ka tun direitamente hodi hapara projetu taka mota dalan anterior ne’ebé sai preokupasaun komunidade nian.
“Ami natar na’in fila mai iha fatin ida ne’e hodi kontinua reafirma ami-nia pozisaun ligadu ho ezijensia ne’ebé antes ne’e ami hato’o ba reprezentante Ministeriu Obras Públika no nai deputadu sira iha loron 18 fulan juñu 2025, katak hatun despaixu hapara taka mota dalan anterior 1000 metru, ministru rasik tun direita hodi buka solusaun ba vitima nia rai, laos fo malu projetu ikus hanehan povu kbiit laek sira nia lian”.
“Ami husu iha semana rua nia laran hatun despaixu hapara projetu taka mota dalan anterior ka tun direitamente duke vitima natar nain maka hapara projetu ne’e totalmente”. Dehan portavoz Julio Cesar ba jornalista sira iha Suku Asulau, Ermera 29/08/2025.
Imajem : Komunidade natar na’in ne’ebe afetadu ba moru protesaun
Julio afirma, implementasaun projetu gabiaun mota Laueli sein halo sosializasaun ho komunidade no autoridade lokal no nia konsidera la fo benefisio ba komunidade sira.
“Implementasaun projetu moru protesaun mota Laueli ne’ebé hetan aprovasaun iha ita-boot nia liman laran atu fó benefisiu ba se ?, komunidade no autoridade lokal ida ne’ebé maka husu ita-boot sira implementa projetu ne’ebé laiha sosializasaun ho natar na’in sira”.
Nia konsidera projetu ne’ebé kompaña Oelau Buras hamutuk ho Ministeriu Obras Públika halo ne’e hanesan traisaun irasional.
“Projetu ne’e laos posibilidade halakon deit rai hektar 485 ne’ebé nain ba ema rihun ida resin maibe nu’udar traisaun irasional husi nain ba konpaña Oelau Buras no Ministru Obras Públiku Samuel Marcal ba povu Ermera nia propriedade”.
“Ami hakarak ajuda governu iha diversifikasaun ekonómika nasional maibe governante sira maka laiha konsiensia ba futuru rai ida ne’e, hanoin liu osan ba bolsu iha loron ohin, haluha tiha futuru ida ne’ebé timoroan hotu hakarak hadia”.
Iha fatin hanesan, komunidade natar nain Gil Martins Soares informa, desde lansamentu fatuk dahuluk ba projetu ba mota Laueli parte MOP seidauk halo sosializasaun ho komunidade natar nain no autoridade lokal sira.
“Projetu ida ne’e desde inisiu loron 15 fulan fevereiru, lansamentu iha loron 7 fulan marsu, to’o agora seidauk halo sosializasaun ho ami natar nain no autoridade lokal sira”. Dehan Gil Martins Soares.
Gil informa, “Rai sira ne’e laos rai infraestrutura maibe ami Ermera oan nia rai produsaun no rai agrikultor, rai ne’e ami Ermera jona A, jona B no postu administrativu ida husi Bobonaro ida”.
“Ami husu ba governu se bele ho orsamentu miliaun resin ne’e, ami husu atu halo mota fila ba nia fatin maibe sira dehan labele ona tanba mota sa’e ona ba metru lima entaun labele, labele fila laiha buat ida”.
“Iha loron 17 juñu ami natar nain hamutuk foti solusaun katak projetu la’o tanba buat hotu aprovadu ona bele lao maibe mota nia dalan labele taka, se nonu governu konstitusional la konsege, ita-nia governu ne’e moris nia bele sa’e ba desimu, desimu primeiru, karik sira iha hanoin atu reativa ami-nia natar”. Nia espera
Antes ne’e, komunidade Suku Asulau lamenta ho projetu moru protesaun tanba implika natar komunidade 500 hektares, nune’e natar-na’in sira husu governu muda ba kilómetru ida dook hosi natar.
Portavóz natar-na’in Leonio Martins da Costa haktuir Natar-na’in hosi suku 13 ne’ebė pertense ba postu administrativu Hatulia A no Hatulia B, munsipiu Ermera, akumula mós natar-na’in hosi postu administrativu Atabae, munisipiu Bobonaro hamutuk la aseita projetu moru protesaun kona sira-nia natar, tan ne’e sira husu atu muda moru protesaun kilómetru ida dook hosi natar.
“Ami vitima ba dezastre naturál tanba mota Laueli sobu ami-nia natar hektares atus lima resin desde tinan 1996 no abandonadu to’o ohin loron. Natar-na’in sira ne’e idaidak kaer hela ninia sertifikadu natar nian nu’udar dokumentu komprovativu tanba hetan ona legalidade ne’ebé konsidera hanesan área pontensiál ba agrikultura liu-liu bá produsaun hare desde tinan 1996 bá kotuk”.
Tinan ne’e, IX Governu Konstitusionál liu-hosi Ministériu Obras Públika (MOP) atu implementa projetu moru protesaun hodi satan netik natar rohan balun neʼebé oras-ne’e sei iha hela, iha parte Asulau nian no prosesu hotu-hotu konklui ona, hein de’it atu implementa projetu, maibé iha realidade MOP rasik laiha koordenasaun ho natar-na’in sira no autoridade lokál durante hala’o levantamentu bá lokál projetu.
Durante konferensia imprensa Leonio Martins da Costa deklara laiha intensaun atu impede desenvolvimentu maibe husu atu muda lokal projetu tanba fo afeta ba natar komunidade.
“Ami natar na’in-sira laiha intensaun atu kansela projetu ne’e, maibé ami hakarak atu hato’o de’it rekomendasaun balun bá Governu hanesan :
1. Lideransa Comunitária hamutuk ho natar nain sira Laiha intensaun atu kansela ou impede projetu implementasaun moru protesaun iha mota Laueli.
2. Natar nain sira nia ejizensia ba MOP atu muda BOQ ne’ebé iha, tanbá tuir natar nain sira nia observa katak moru protesaun refere la fó benifisiu no sei halakon natar 500 hektares ba futuru.
3. Natar nain sira-nia ejizensia projetu moru protesaun labele taka mota dalan anterior. Tenke husik 1000 m (1km), nune’e ba futuru mota bele fila fali ba nia fatin, rekomendasaun ne’e hetan ona solusaun iha dialogu.
4. Ami lideransa komunitária hamutuk ho natar nain sira Rekomenda ba Guverno liu husi Minsitério Obras Público no Ministério Agricultúra Pescas pecuária e Floresta katak liu husi orsamentu gerál estadu 2026 tau prioriedade nú 1. ba ami nia preokupasaun hodi muda mota laueli ba mota anterior, nune’e ami bele kontinua reativa fila fali ami nia natar ne’ebé tinan barak hetan dezastre to avandona.
5. Ami natar nain ho respeitu husu ba Ministerio Obras Públiko Sua Ex, Dr. Samuel Marcal atu konsidera ami natar nain nia preokupasaun no rekomendasaun sira atu tau iha prioriedade”.
Rekomendasun hirak ne’e hetan ona konsiderasaun no aseitasaun husi membru Parlamentu Nasional, Autoridade Local, Autoridade Segurasa no akompanha husi ekipa MOP nasionál no Munisipiu iha 18 junu 2025.
“Liu husi dialogu ne’e hetan ona solusaunn no aseitasaun hodi muda projetu husi 1000 metros (1km) hodi fó espasu ba mota anterior, no labele taka mota dalan no iha deklarasaun husi membru Parlamentu Nasional moos sei halo karta direita ba Ministerio Obras Público”.
iha 26 de Juñu kompanha manan nain ba projetu kontinua fila-fali ho obra ne’ebé maka hetan ona konkordansia husi parte relevante sira iha 18 junhu 2025. Nune’e Lideransa Komunitária ho natar nain sira la aseita ho kompanha ne’ebé hala’o servisu hodi taka mota dalan anterior husi 1 KM ne’ebe iha ona solusaun, se nafatin kontinua maka natar nain sira sei lakon natar ne’ebé afetadu, se projetu neʼe mak la muda mak natar nain sira iha tempu badak sei halo asaun.
Xefe kompanha Woelau Buras Afonso Martins “Aten-Brani” deklara sira hetan ona legalidade hodi implementa projetu tanba ne’e sira sei la para iha dalan klaran.
“Obra ne’ebe ami halo iha ne’e tuir karta legalidade, kompanha sanulu resin tolu mak kompete, ha’u mak sai hanesan Xefe Ekipa manan nain ba projetu ida ne’e. Fatin ne’e Ministeriu Obras Públiku mai beibeik hodi survey dala barak, desde tinan kotuk liu ba no iha tinan ida ne’e ami hetan legalidade”. Hateten Xefe Kompanha
“Hanesan sira fo sai iha media liu hosi konferensia katak iha ne’e halo ajudikasaun polítika, karik iha ajudikasaun politika tenke hatudu evidensia. Projetu ne’e Ministeriu Obras Públiku maka projetu nia nain, ami hetan karta legalidade atu hapara kilo ida ka hapara totalidade husi kompaña sanulu resin tolu, ami prontu para, maibe projetu ami manan ho legalidade atu hapara karta legalidade tun mai foin ami hapara”.
“Liu loron tolu, Miniteriu Obras Publikas, munisipiu no nasional mai akompaña, ADN mós mai, servisu la’o namanas maibe iha grupu ida atu mai interven, ami hein karta maibe servisi nafatin la’o”.
Xefe Kompanha ne’e dehan, “Maluk sira-nia razaun ne’e loos, hakarak mota ne’e fila ba mota tuan bele, wainhira mai foti dadus dala hira iha ne’e, ha’u mós ko’alia maibe governu liu hosi Ministériu Obras Públika dehan kontinua, ami kontinua”.
Hafoin notísia ne’e publika, SAP News TL seidauk halo komfirmasaun ho parte Ministério Obras Públicas ligadu ho ezijensia ne’e.