Komunidade Sagadate Orgullu ! KEJUSS & PERMATIL Ke’e Debu & Hetan Bee-Moos

SAPNewsTL, Baucau – Komunidade Aldeia Samagata, Suco Sagadate, Posto-Administrativo Laga, Município Baucau kontente ba konservasaun bee ne’ebé oferese husi grupu Klibur Estudante Juventude Suku Sagadate (KEJUSS) no Permakultura Timor-Leste (PERMATIL).

Komunidade Domingas Gusmão hatuir iha tempu uluk bee matan maran komunidade sira ba koru bee iha bee matan kuaze horas ida, maibe tan de’it bee matan dook entaun laen ho oan sira mak sempre ajuda ba koru bee, ema ida lalin masa rua ka tolu sente todan tanba husi uma ba bee matan neé la’o tun de’it, maibe fila husi bee matan ne’e la’o sa’e fali rai lolon entaun hakarak ka lakoi tenke la’o kuaze oras ida.

“Durante ha’u isin-rua, laen mak ajuda ha’u ba koru bee, antes tuku 5:00 dadersan madrugada ha’u-nia laen sai ba kuru bee hafoin ba servisu, maibe agora sente kontente tanba bee barak no balun estraga de’it. Uluk iha tempu bailoron naruk ami susar loos atu hetan modo tanba dook husi merkadu maibe agora ami mos aproveita kuda modo ida ne’e fó vantajen di’ak tebes ba ami”, Dehan Domingas Gusmão ba Jornalista sira iha aldeia Sagamata,10-08-2024.

 

Bee matan dook nesesidade obriga Domingas husik nia bebe toba mesak iha uma hodi ba kuru bee, dalaruma husu ajuda ba banin sira hodi hein bebe. Problema seluk ne’ebé nia hasoru mak ba kuru bee lokraik tuku 5 fila husi bee matan derepente sidi fatuk balde monu nakfera no bee iha masa fakar hotu entaun nia fila ho mamuk.

“Nu’udar inan sente triste bainhira hasoru difikuldade hirak ne’e, tempu la’o beik-beik, oan sira mos ba eskola hotu iha sidade, entaun ema ajuda ha’u laiha, dalaruma tuur mesak ho matan-wen maibe tanba oan sira-nia futuru ne’e importante tebes tenke haruka sira ba eskola karik sente kolen deskansa depois kontinua fali”,

Xefe família Abel Jóse Pereira haktuir, uma laran bee laiha tenke ajuda nia parseira hodi ba kuru bee, momentu bee matan Gia-Kiri seidauk iha sira ba koru bee iha bee matan Matisi maibe bee refere maran entaun sira tun fali ba mota Du’uira mak kuru bee komesa iha tinan 2017-2018.

“Iha tinan 2019, grupu KEJUSS mai hanesan milagre ida hodi tulun ami liuhosi atividade kee debu, momentu iha bailoron komesa husi fulan Jullu ba leten bee komesa menus maibe agora komunidade sira asesu bee ho diak tanba inisiativa husi grupu KEJUSS. Uluk ne’e ajuda parseira ba kuru bee, ense masa walu depois tau ai hodi leba mai uma, sente kolen, todan, loron manas no udan maibe pasiensia tanba bee laiha.” Nia konta

 

Inacia Manuela Pereira hatete, ho tinan 30 iha aldeia sagamata hateten,foun-foun komunidade hamutuk ho grupu KEJUSS mai ho inisiativa rasik hodi kee uluk debu, primeiru nia rezultadu mak bee la maran maibe menus, nune’e komunidade no KEJUSS hamutuk ho NGO PERMATIL hodi kee tan debu rua hamutuk tolu hodi haforsa bee matan Gia-Kiri hodi oferese ba komunidade sira.

“Iha tempu uluk bailoron naruk no tempu udan obrigatoriu ba koru bee iha mota la’o kuaze 30 minutus, karik ami hakarak hariis ka fase roupa entaun tenke lori ho kedas roupa hodi hariis no fase roupa maibe iha tempu udan, ami labele ba tanba mota tun. Entaun ami tenke buka dalan seluk ba fali bee matan Lobular ne’ebé dook husi komunidade ho kilometru rua ho balun.”

Bee ne’e importante tebes ba ema atu konsumu ba nesesidade loron-loron, entaun familia uma laran inan aman no labarik prioritiza bee, maibe iha parte seluk sente triste tan problema bee, karik la ba kuru bee, nia inan sempre hirus no hakilar. Iha tempu uluk inan isin-rua sira partus husik bebe ho nia avó sira mak hein depois inan sira ba fase roupa no kuru bee.

 

Angelinha da Costa Pereira ho tinan 80 iha aldeia Sagamata salienta katak, “iha tempu uluk mota tun entaun ami labele ba koru bee nomos labele ba bee matan seluk tanba dook, entaun ami tabun udan been liuhosi kesi ai-tahan ba nu’u hun depois tau balde iha okos mak ami konsumu”.nia sublinha

Quibenia da Conceição Pereira (8), daudaun ne’e hala’o nia estudu iha iha Eskola Baziku Filial (EBF), Sagrada Coração de Jesus Sagadate 2 ano atividade loron-loron mak nia sempre ajuda nia ama hodi kuru bee, fase bikan no fase roupa.

“Ha’u sente kontente tebes tanba agora bee ami dada mai uma no loron-loron ami hariis no fase roupa iha uma, tanba tempu uluk bee sei dook dalaruma ami ba eskola lahariis hamoos oin ba deit “,Nia kontente

Eis delegada Aldeia Sagadate, Domingas Gusmão (40), dehan durante ne’e sira la hatene saida mak debu no benefisiu husi debu ne’e mak saida entaun sira la satisfas, maibe no fim sira simu konvite husi KEJUSS hodi tuir treinamentu no hetan esplikasaun klaru kona-ba planu kee debu katak nia objetivu fó benefisiu ba komunidade hodi sustenta sira-nia moris maske kolen.

“Durante ne’e ami susar loos ba bee tanba impaktu husi mudansa klimátika, iha tempu bailoron naruk bee matan sempre maran entaun komunidade hamutuk ho grupu KEJUSS mai ho inisiativa rasik hodi kee debu, primeiru nia rezultadu bee lamaran maibe menus entaun grupu KEJUSS ho NGO PERMATIL mai ho ideia foun hodi kontinua kee debu rua hamutuk tolu hodi distribui ba komunidade sira hodi konsumu”.Dehan Domingas

Tempu uluk bainloron naruk bee matan maran entaun komunidade hamutuk ho KEJUSS kria inisiativa rasik no hetan apoiu husi NGO PERMATIL hodi kee debu tanba komunidade presiza tebes bee moos hodi konsumu loron-loron, maske servisu todan, maibe komunidade hotu-hotu feto no mane konsentra hamutuk hodi kee bee debu ne’e.

“Ami kontente tebes ho sira-nia programa ne’e maske liuhosi prosesu ne’ebé naruk, tanba prosesu kee debu ne’e kuaze tinan ida ho balun, rezultadu husi kee debu ne’e mak dadaun ne’e ami uza iha bailoron naruk hodi konsumu ba nesesidade loron-loron nomos kuda modo tanba bee refere la maran to’o agora, bee debu ne’e mak aumenta bee matan antigu hodi fornese ba komunidade”,

Nacia Manuela Pereira hateten, foun-foun komunidade hamutuk ho grupu KEJUSS mai ho inisiativa rasik hodi kee uluk debu primeiru nia rezultadu mak bee la maran maibe menus, nune’e komunidade KEJUSS hamutuk ho NGO PERMATIL hodi kee tan debu rua hamutuk tolu hodi haforsa bee matan Gia-Kiri hodi oferese ba komunidade sira.

Xefe Suku Sagadate Areliano de Jesus agradese ba KEJUSS tanba sira iha inisiativa hodi ajuda komunidade sira atu bele konserva bee hodi fahe ba komunidade sira tanba komunidade sira prezisa tebes bee.

“Ami agradese ba KEJUSS tanba hola hanoin diak hodi ajuda bee ba komunidade, Depois rona kona ba programa KEJUSS nian tanba ami nia finansas bee ne’e uza osan PNDS maibe PNDS mós iha regras, ami mos halo pedidu ba parte relevante para sira bele resolve lais problema kona ba bee”. Nia fundamenta

Enkauntu, komunidade sira mós hahú halibur osan husi 3-10 dolar hodi prepara ba manuensaun bee, wainhira bee maran no problema kanalizasaun.

Enkuantu, notisia ne’e Mídia SAPNews kolleta liu hosi ekipa media tour ne’ebe organiza husi Assosiasaun Jornalista Timor Lorosa’e (AJTL) no Oxfam Timor-Leste.

Jornalista : Ermelinda Soares