Konferénsia Nasionál PD Deside Prolonga Mandatu No Prepara Enfrenta ELPAR 2023

Dili,10/07/2022: Konferensia Nasional Partido Demokratiku(PD) ba dala IV deside Rezolusaun N^o1/KMPD/7/2022 Reafirma prolongamentu mandatu estrutura orgaun Partidu Demokrátiku(PD) iha nivel hotu-hotu, Depois de eleisaun parlamentar 2023 tanba ho razaun polítika

Rezolusaun N^o1/KMPD/7/2022, Konsidera Estatutu Partido Demokrátiku(PD) artigu 156 alinea 1 katak Konferênsia nasional maka forum hodi formula desizaun  polítika foun ne’ebé la inklui iha dezisaun polítika iha kongresu tanba iha mudansa konjuntura polítika ne’ebé la prevê iha kongresu, konsidera diskusaun klean kona-ba lejitimidade estrutura Partido Demokrátiku(PD) ne’ebé mandatu remata iha loron 24 fulan fevereiru tinan 2022 no por razaun polítika iha nesesidade atu reafirma ezistênsia estrutura orgaun partidu nian

Nune’e liu hosi konferênsia nasional Partido Demokrátiku(PD) ne’ebe realiza iha loron 10 fulan jullu tinan 2022, iha Salaun Delta-Nova ho partisipasaun konferênsista atus tolu neen-nulu resin lima(365) konforme hatuur iha artigu 156 alinea 2 aprova katak :

“Reafirma prolongamentu mandatu estrutura orgaun Partidu Demokrátiku(PD) iha nivel hotu-hotu, Depois de eleisaun parlamentar 2023 sei realiza kongresu nasional haktuir estatutu Partidu Demokrátiku(PD) artigu 35 alinea 2”. Deklara Sekretario Jeral Antonio da Conceição Kalohan, iha Salaun Delta-Nova Dili, 10/07/2022

Entretantu, estrutura superior partidu sei reajusta nia estrutura hodi halo substituisaun ba kuadrus inativus sira iha tempu hodi prepara ba eleisaun parlamenta tinan 2023

“Iha fulan ida nia laran hahú hosi rezolusaun no fó sai konsellu superior Partidu Demokrátiku(PD) ho komprimentu artigu 38 alinea H katak tenki halo substituisaun kuadrus inativus no prensimentu estrutura ne’ebé mamuk hodi asegura funsionamentu regular estrutura orgaun partidu ninian, Rezolusaun konferênsia nasional ida ne’e hahú vigora iha loron 10 fulan jullu tinan 2022”. Afirma Sekretario Jeral Antonio da Conceição Kalohan iha leitura akta de resolusaun

Entretantu iha rezolusaun ne’e hetan asinatura hosi Prezidente PD Mariano Assanami Sabino, Prezidente Komisaun Polítika Nasional Adriano do Nascimento, Sektretáriu Jeral Antonio da Conceição, hamutuk ho estrutura nasionál sira hanesan Manuel de Carvalho, Lito Rambo no Octavio da Conceição.

Enkuantu, iha Konferensia Nasional Partidu Demokratiku ba dala IV ida ne’e, hetan partispa husi Presidente da Republika Dr. Jose Ramos Horta ne’ebe iha diskursu Presidente fo parabens, koragem ba PD no husu atu servisu makaas liu tan hodi aumenta kadeira, liliu fo garantia ba involvimentu Feto 50% no Mane 50% iha estrutura Partidu laran, iha konferensia ne’e mos hetan partisipa husi Sekretariu Jeral Partidu CNRT, Presidente CNE no kuadrus paridu demokratiku husi nivel munisipiu sanulu resin-rua inklui RAEOA

Jornalista  : Marinho de Deus Pinto

Editor        : Geraldo da Gama