Konfirma Orsamentu Munisipal, SEDL Hakarak Rezolve Problema Ho Lailais

SAPNewsTL, Díli : Sekretariu Estadu Dezenvolvimentu Lokal (SEDL), Mateus Wilfredos dos Santos Tallo reprezenta Ministru Administrasaun Estatal, Tomas do Rosario Cabral, hala’o abertura ba konfirmasaun Planu Asaun Anual no Planu Orsamentu Munisipal

Iha intervensaun, SEDL Mateus Wilfredos dos Santos Tallo husu ba Diretores Munisipiu sira atu hare didiak planu investimentu munisipal ne’ebe tenke refleta duni Planu Estratejiku Dezenvolvimentu (PED) 2011-2030, refleta mos liñas jerais Programa IX Governu Konstituisinal nian, no Planu Estratejiku Munisipal.

SEDL sei fó prioridade ba atividades dezenvolvimentu ekonomiku iha nivel lokal, no foku mos ba apoiu serbisu planu dezenvolvimentu munisipal, planu dezenvolvimentu komunitaria, hodi hasa’e kresimentu ekonomia povu nian inklui asuntu sosial sira.

“SEDL mos sei fóku ba atividades ekonomia sira iha baze, ami dejeña hela programa sira, oinsa bele refleta atu ajuda mos ita bot sira (Autoridade Munisipais), hodi hare mos serbisu ba apoiu planeamentu munisipal no mos apoiu dezenvolvimentu komunitariu. Iha tinan oin ami sei ajuda ita bot sira depois asaun sira seluk ita sei halo.” Tenik SEDL Mateus Wilfredos dos Santos Tallo liu husi nia intervensaun iha Salaun VIP MAE-Dili,20/09/2023

Governante ne’e mos orienta diretor serbisu Sosial iha Munisipiu sira, hodi hare ba asuntu sosial nian ne’ebe mak dadaun ne’e sai trend iha públiku, nune’e bele inklui iha planu Orsamentu Geral Estadu 2024 nian hanesan Munisipiu Ainaro iha eskola ida iha Aituturina, presiza tau matan no inklui iha planu orsamental munisipiu nian.

“Favor fo atensaun ba asuntu ka area sira ne’ebe mak urjente, ho karateristiku emerjensia. Ita tenki hare povu presiza dezenvolvimentu iha kraik ne’e, planeamentu ne’e tenke rutinitas. Nune’e politikamente ita tenke hare asuntu hirak ne’ebe mak iha urjensia. SEDL Mateus Wilfredos dos Santos Tallo hateten

Jornalista : Marcela Mesquita Lemos