Konsege Hakat Dejafiu Sira ! Pe. Lúcio : Maromak Mak Ha’u Nia Kbiit & Mahein

Imajem : Entrevista Jubilante Padre Lucio Norberto de Deus iha Igreja Maliana, 15/06/2024. Foto : Guilhermino Ramos da Cruz.

SAPNewsTL, Bobonaro – Hatan ba Maromak nia bolu durante tinan 25 nia laran. Padre Lúcio Norberto de Deus deklara Maromak mak ninia kbiit no mahein, maske hasoru dezafiu oin-oin iha vida saserdotal.

Tuir jubilante, Padre Lúcio Norberto de Deus hateten, sentidu Jubileu mai ho signifikativu katak selebrasaun ba vida saserdotal iha vokasaun amu lulik sira nian, ne’ebe hala’o knaar santo hahu husi ordenasaun saserdosiu.

“Iha tinan 1999, igreja katolika Timor-Leste hasoru tempu ida ne’ebe difisel tebe-tebes, situasaun politika rai laran kontra manas, maibé ami nain rua konsege hetan ordenasaun iha tempu ne’eba, tamba ho ami nia lema ordenasaun ha’u nian hakerek katak, Maromak mak ha’u nia kbiit no mahein,” Informa Padre Lúcio Norberto de Deus ba SAPNews iha igreija Paroquial Maliana, Sabadu (15/06/2024)

Nia hatutan iha tempu ne’ebe defisil mak sai alvu hodi dezafia Padre Mouzinhu Pereira Lopes no Padre Lúcio Norberto de Deus, hahu serbisu nu’udar amu lulik, maske evolusaun iha vokasaun ba amu lulik mosu iha tempu defisil maibé ho mentalidade no esperansa ba nai Maromak, sira konsege atinji objetivu.

“Maromak mak ha’u nia kbiit no mahein, entaun lema ordenasaun ida ne’e mak inspira ha’u iha kualkuer tempu saida deit maske hasoru dezafiu oin-oin iha vida nai-lulik. Dedikasaun ho ema nia relasaun intimidade hodi hatan ba obra maromak nian, ida ne’e mak bele fó kbiit ba ita, mai husi ita ema nia komitmentu no fiar ba maromak, ita rasik deside hodi hasoru dezafiu sira”. Pe. Lucio Norberto de Deus deklara

Padre Lúcio Norberto de Deus fundamenta, ho ispíritu loron Jubileu nia senti onradu tebe-tebes. tamba bele haforsa liu tan komitmentu ba maromak liu husi tulun sarani sira nian bele kompleta limitasaun sira bainhira hala’o knaar.

“Ha’u nia esperansa ba futuru, ha’u espera katak ho ema hotu-hotu nia apoiu ho sira nia prezensa iha selebrasaun 25 anos Jubileu de Prata, halo ha’u forte nafatin hodi habot nafatin ha’u nia komitmentu no prinsipiu atu serbi maromak, ita ema limitadu maibé maluk sira nia tulun bele kompleta ita nia limitasaun sira”.nia dehan

Entretantu, iha biban ne’e, Padre Lúcio Norberto de Deus esklarese mos kona-ba vizita, sua eminensia Papa Francisco nian mai Timor-Leste ho tema “que avosa fé seija vosa kultura” signifika fiar mak sai kultura la’os kultura mak sai ema nia fiar.

“Fiar mak sai kultura laos kultura mak sai ita nia fiar, tanba ne’e ha’u hanoin liu husi vizita Santo Padre nian bele habelar fiar kristaun katolika nian hodi hakbesik aan ba maromak iha tempu saida de’it”. nia hakotu

Jornalista : Marciana da Conceiçao & Guilhermino Ramos da Cruz