Konsidera Desenvolvimentu La’o Tarde, PDC Defende Hakbesik Ukun Ba Povu No Kria Kampu Servisu
Imajem: PDC fahe brosure no halo dialogu ho komunidade iha Ainaro, 20/04/2023
SAP NewsTL, Ainaru : Partido Democrata Cristão (PDC) hala’o Dialogu iha Aldeia lia Huu Suku Ai-Tutu Munisipiu Ainaru, PDC Nu’udar Partidu jerasaun foun ne’ebe mai ho programa foun hodi hadia povu nia moris
Tuir Prezidente Partido Democrata Cristão, Francisco de Arauju hateten iha ona Lei dezantralizasaun poder lokal maibe seidauk implementa tanba ne’e PDC Sei esforsu hodi konkretiza wainhira hetan fiar husi povu
“Ita sei esforsu hodi implementa polítika desentralizasaun, ita tenki fo poder ba autoridade lokal sira maibe sira seidauk hetan poder ne’ebe mak klaru entaun ita hakarak dezenvolvimentu desentralizasaun, Lei ne’e tenke aselera lalais, Ita tenke hahú dezenvolvimentu infrastrutura hanesan estrada, eletrisidade, bee mos, Agrikultura, saúde, Edukasaun no seluk tan.” Dehan Prezidente PDC Francisco de Araújo ba militantes sira iha Ainaro, 20/04/2023
Presidente PDC konsidera, sira ne’ebe mak hela iha kapital Munisípiu sira sente dezenvolvimentu, maibe povu ne’ebe iha area rurais hanesan Aldeia mai to’o postu administrativu no Munisípiu sira susar atu asesu estrada, Susar atu hadia sira nia moris.
Imajem : Presidente PDC Francisco de Araujo
“Buat ne’ebe mak bele fo la presija Governu loke kampu ba sira, prejisa mak produtu ne’e asesu ba merkadu, Governu nunka tau atensaun ba ida ne’e, Governu hanoin de’it mak sira nia poder atu ukun haluhan tiha povu sira ne’ebe iha baze, Ida mak eletrisidade durante ne’e barak mak asesu ona maibe balun seidauk asesu, Agrikultura importante tebes, ita tenki halo modernizasaun, no modernizasaun ne’e hahú husi rai sira ne’ebe hanesan Manatutu, Natarbora, Loes ne’e fatin ne’ebe mak produtivu hahan.”Nia Defende
Iha Fatin hanesan, Vise Presidente Partido Democrata Criatão, Domingos da Costa hatutan jerasaun foun tenki tau prioridade ba povu sira nia moris
“PDC nafatin foti ass jerasaun tuan sira hodi nafatin tane ass sira, tanba sira mak hahú no la iha liafuan tarde ba jerasaun sira hodi avansa, tuir komitmentu bele hadia sira nia moris, husu mos ba jerasaun foun sira atu servisu makas liu tan hodi fo kontribuisaun ba rai ida nee.” Dehan Vise Presidente PDC Domingos da Costa ba jornalista sira
Vise PDC informa haree ba dezenvolvimentu seidauk lao ho di’ak no hare ba realidade joven barak mak halerik ba kampu servisu ho nune’e PDC mai ho programa foun hodi tulun povu nia problema ne’ebe mak sira hasoru iha tinan barak nia laran.
“Ita mos la bele hare ba nasional no Munisípiu de’it maibe ita mos tenki tun mai iha baze hodi hare iha husi suku ba to’o iha aldeia sira nune’e hadia husi area rural mak mai la bele husi nasional ka Munisípiu, Liliu oinsa kria Kampu Servisu ba joven sira” Dehan Prezidente PDC Domingos da Costa
Jornalista: Lídia Amaral