Konsidera TL Iha Poténsia Ba Komérsiu & Turizmu ! AKC Hakarak Estabelese Kooperasaun

Imajem : ASEAN-Korean Centre (AKC), Sekretáriu Jerál, Kim Jae-Shing hasoru malu ho Primeiru-Ministru (PM), Kay Rala Xanana Gusmão iha Palasiu Governu Díli, 13/03/2026. Foto : Média PM

‎‎SAPNewsTL, Dili – ASEAN-Korean Centre (AKC) liu-hosi Sekretáriu Jerál, Kim Jae-Shing hato’o interese bá Primeiru-Ministru (PM), Kay Rala Xanana Gusmão atu estabelese kooperasaun ho Governu Timor-Leste (TL) iha área komérsiu no turizmu.

‎‎Kim Jae-Shing ho Xefe Governu troka mós ideia kona-bá relasaun entre Koreia ho Timor-Leste liu-liu kongratula Timor-Leste ninia adezaun bá ASEAN.

‎‎“Ami esplora posibilidade kooperasaun ne’ebé ami sei halo entre TL ho Koreia liu-liu ho ASEAN Korea Centre. Kooperasaun ne’ebé ami iha maka komérsiu, kultura, turizmu no interkámbiu ema ho ema,” ‎Kim Jae-Shing hato’o interese ne’e liu-hosi audiénsia formál ho Primeiru-Ministru iha Palásiu Governu, 13/03/2026.

‎AKC haree katak TL nasaun ne’ebé iha potensialidade bo’ot iha futuru bá turizmu no komérsiu, tan ne’e hakarak atu estabelese kooperasaun hodi hola parte atu dezenvolve hamutuk, liu-hosi servisu hamutuk ho Embaixada Koreia iha Dili no Embaixada TL nian iha Koreia.

‎‎Parte AKC observa katak dezenvolvimentu iha Timor-Leste la’o makaas no sei bá oin liu-tán iha tinan sira tuir-mai.

‎‎Hosi aprezentasaun ne’e, Primeiru-Ministru énfaze-liu estabelese kooperasaun ne’ebé bele dezenvolve-liu pequena, médiu no mikro emprezas.

‎‎Sentru ASEAN-Korea (AKC) hanesan organizasaun intergovernamentál ida ne’ebé harii iha loron 13 fulan-Marsu tinan 2009, ho mandatu atu promove kooperasaun ekonómika no sósio-kulturál entre Estadu Membru ASEAN 10 no Repúblika Koreia (ROK).

‎‎Misaun hosi Sentru ASEAN-Korea maka estabelese parseria forte, hasae komérsiu, investimentu, kultura no turizmu.