Kria Planu Sustentável ! SEDL Lansa Relatóriu Avaliasaun Rekursu Munisipál

Imajem : SEDL lansa relatóriu avaliasaun rekursu munisipal iha Salaun Laline Larigutu CNE, 13/02/2025

SAPNewsTL, DILI – Intensifika elabora planu dezenvolvimentu lokal ida própriu no sustentável, Sekretariu Estadu Dezenvolvimentu Lokal (SEDL sigla portugues), ofisialmente lansa ona relatóriu nasional avaliasaun kapasidade no rekursu munisipal ne’ebe implementa iha fulan abril to’o Maio 2024.

Tuir Sekretariu Estadu Dezenvolvimentu Lokal Mateus W. dos Santos Tallo hateten lansamentu ofisial ba relatóriu avaliasaun rekursu no kapasidade munisipal ne’e hodi tulun lideres komunitáriu sira ba planu dezenvolvimentu komunitaria nian.

“Lansamentu ba resultadu peskiza avaliasaun rekursu munisipal nian ne’ebe mak halo iha tinan kotuk, relatóriu ne’e importante tamba atu ajuda no apoiu lideransa komunitária sira hodi elabora no prepara sira nia planu dezenvolvimentu komunitaria no preparasaun ba apresentasaun sira nia planu iha assembleia aldeia konselhu suku”.Dehan Sekretariu Estadu Dezenvolvimentu Lokal Mateus W. dos Santos Tallo, ba jornalista sira iha salaun Latine Larigutu-CNE, Kinta-Feira (13/ 02/2025).

SEDL informa dadus husi avalisaun ba kapasidade no rekursu munisipal ne’e objetivu atu realiza planu nasional dezenvolvimentu munisipal hodi nune’e bele elabora planu dezenvolvimentu komunitaria.

“Objetivu segundu atu halo planu nasional dezenvolvimentu munisipal, nune’e dados husi resultadu peskuisa ne’e bele ajuda ekipa teknika sira hodi elabora planu dezenvolvimentu komunitaria no revisaun planu dezenvolvimentu munisipal nian”. Nia deklara

Iha fatin hanesan, Vise primeiru Ministru Ministru coordenador dos Asunto Social ,Ministru do Dezenvolvimentu Rural e Habitação comunitaria Mariano Assanami Sabino afirma dadus avaliasaun na relatóriu nasional avaliasaun kapasidade no rekursu munisipal ne’e importante ba progressu dezenvolvimentu munisipal ba tinan lima(5) nian.

“Ohin ita lansa ofisial livru avalisaun kapasidade no rekursu munisipal ba peskiza, ida ne’e importante atu oinsa ita bele buka progressu dezenvolvimentu tinan lima(5) nian, reforsa no aliserse iha suku atu bele halo desentralizasaun suku”. Nia haktuir

Assanami subliña avaliasaun kapasidade no rekursu ne’e oinsa mak pesquisa problema munisipal atu implementa desentralizasaun ne’ebe mak diak, no bele akomoda programa liderasa  nian iha baze.

Presidente Autoridade Munisipiu Lautem, Melio de Jesus agradese ba Ministériu Estatal no Sekretariu Estadu Dezenvolvimentu Lokal liu husi dadus peskiza avaliasaun kapasidade no rekursu tanba tulun Presidente Autoridade Munisipiu no lider komunitariu sira.

“Ha’u agradese ba ministériu administrasaun Estatal liu husi sekretrariu estadu dezenvolvimentu lokal ne’ebe mak lidera prosessu pesquisa ba relatoriu ida ne’e, ha’u hanoin katak ho lansamentu ne’e iha buat barak mak kestiona iha laran, nune’e autoridade munisipiu no administrador postu no sefe suku bele hare relatoriu refere hodi tau prioridade ba planu no programa ba dezenvolvimentu iha kada munisipiu”. Nia agradese

PAM Lautem salienta bainhira pesquisa ne’e la’o sira sei tau prioridade ba sektor produtivu tolu(3) mak eziste iha munisipal Lautem hanesan agrikultura, turismu no rekursu naturais sira.

“Ami simu ona formatu husi Ministériu Administração Estatal kona-ba avaliasaun dezempenhu no servisu munisipal ne’ebe mak iha atu hato’o relatoriu dezempenho de servisu, nune’e problema sira ne’ebe mak falta presija hadia no ida ne’ebe mak diak ona bele melhora diak liu tan”Nia hakotu

Jornalista : Marcela Mery da Costa