Kristu Nia Naroman Lori Salvasaun & Separa Entre Los no Sala, Diak no Aat
Imajem: Sarani sira partisipa misa iha sabadu Aleluia iha Igreja
SAPNewsTL, Dili : Lilin ne’ebe lakan iha sábadu Aleluia simboliza Jesus Kristu nia roman no nabilan hodi hatudu katak nia mak naroman loos ne’ebé mai atu fó dalan no salvasaun ba ema hotu ne’ebe monu ba sala no nakukun laran.
Iha Evangelhu João 8:12, Jesus Cristo dehan: “Ha’u mak naroman mundu nian; ema ne’ebé tuir ha’u sei la la:o iha nakukun, maibé sei hetan naroman moris nian.” Liafuan ida ne’e hatudu katak Kristu mak fonte naroman espirituál ne’ebé guia umanidade husi sala ba moris rohan laek no ksolok.
Nabilan Kristu Jesus nian hatudu iha nia moris loron-loron, liu-liu iha nia servisu no domin. Iha Evangelhu Mateus 5:16, nia hanorin: “Halo ita nia naroman hanesan ne’e hodi hato’o ba ema seluk, atu sira haree ita nia asaun di’ak no glorifika Aman iha lalehan.” Ne’e signifika katak ema fiar-na’in tenke mos reflete Kristu nia nabilan liu hosi asaun di’ak.
Kristu nia roman no nabilan laos deit iha liafuan, maibé iha nia sakrifísiu. Iha Evangelho de João 1:9 dehan katak naroman loos mai ba mundu atu fó naroman ba ema hotu. Naroman ne’e hatudu iha nia mate iha kruz, ne’ebé fó salvasaun ba ema sira ne’ebé fiar.
Iha tempu nakukun, Kristu nia naroman kontinua loke dalan ba ema sira ne’ebé lakohi lakon. Iha Evangelho de João 1:5 dehan: “Naroman mak naroman iha nakukun, no nakukun la bele manán.” Liafuan ida ne’e fó esperansa katak maski mundu nakukun, Kristu nia naroman sei manán nafatin.
Nabilan Kristu nian demonstra iha nia relasaun ho Aman Maromak. Iha karta ba Hebreus 1:3 hatete katak Kristu mak refleksu Aman nia glória no imagem loos husi nia essénsia. Iha Kristu, ita bele hatene Maromak nia nabilan.
Kristu bolu ema hotu atu simu nia naroman no moris iha nabilan. Iha Evangelho de João 12:36, nia dehan: “Fiar ba naroman atu imi sai oan naroman nian.” Ne’e mak konvite ba ema hotu atu sai parte husi nia vida no moris tuir dalan loos.
Kristu nia roman no nabilan mak dalan ba moris foun no salvasaun ba ema hotu. Ema ne’ebé simu nia naroman sei moris iha paz no lialos, no sai testemuña ba mundu katak Maromak nia domin no nabilan boot liu hotu.
Iha Livru Génesis kona-ba roman no nabilan husi Maromak. Iha Génesis 1:3, Maromak dehan: “Sei iha naroman,” no naroman mosu. Naroman mak sinal husi Maromak nia podér no prezensa, ne’ebé ikus mai Jesus Kristu hanesan “Naroman mundu nian”.
Iha Génesis 1:4, Maromak haree katak naroman di’ak, no nia halo separasaun entre naroman no nakukun, diferensa entre di’ak no aat, loos no sala. Iha Kristu, separasaun ne’e sai klaru liután tanba nia mai atu lori lialos no hakotu sala.
Génesis 1:26-27, ema kria tuir Maromak nia imajen. Ema simu parte ida husi nabilan no naroman ne’ebé mai husi Maromak. Maibé tanba sala, naroman ne’e sai menus, no mundu tama iha nakukun.
Iha Génesis 3, istória ema nian hatudu oinsá nakukun tama iha mundu liu hosi desobediénsia. Maski nune’e, iha Génesis 3:15, Maromak promete salvasaun liu hosi “descendente feto nian,” ne’ebé interpreta hanesan profésia kona-ba Kristu ne’ebé sei manán kontra aat liu hosi ninia terus,mate no moris hias.
