La Indemniza, Komunidade Deklara Dada Hikas Lona Iha Ex-Aspol Kaikoli

Imajem : Komunidade Ex Aspol realiza Konferensia Imprensa Iha Kaikoli, 12/08/2025

SAPNewsTL, Dili : Komunidade uma kain 126, iha Ex-Aspol Kaikoli realiza komunikadu imprensa hodi ejize indenimizasaun ba governu, Porta vós Teresa Jacista de Fatima Soares deklara durante loron tolu la indemniza, sira sei dada hikas lona hodi hela nafatin iha Kaikoli.

Marino de Deus & Ermelinda Soares – SAP News TL

Teresa Jacista de Fatima Soares hatete sira-nia parte prontu kolabora ho governu no apoia desenvolvimentu, nune’e husik hela fatin maibe governu la halo indemnizasaun maka komunidade sira sei dada hikas lona hodi hela.

“Ami komunidade Ex Aspol mai buka moris iha fatin ida ne’e, maibe iha parte seluk presiza ita hotu nia kontribuisaun atu halo dezenvolvimentu nasional. Tamba ne’e mak Ami komunidade Ex Aspol durante ne’e kolabora 100% no kumpri desizaun governu liu husi Sekertariu Estadu Assuntu Toponomia e Organizasaun Urbana nian, konsege hamamuk fatin ho voluntariamente durante loron tolu ka hat nia laran hahu husi loron 17-20 Jullu 2025”. Dehan porta vós Teresa Jacista de Fatima Soares iha Kaikoli, 12/08/2025

Hafoin komunidade Ex Aspol hamamuk tiha fatin ida ne’e, laiha parte Sekertariu Estadu Terras Propriedade, Ministériu justisa, Ministeriu Obras Publika, Ministeriu Amdinistasaun Estatal Sekertariu Teras Propriedade, no Autoridade Lokal mak halo visita hodi esklarese ba komunidade.

“Ami Komunidade kumpri no obedese hodi hamamuk tiha ona fatin ne’e, katak antes ne’e husi parte kompetente sira mai foti tiha ami nia dadus no halo tiha ona markasaun ba ami nia uma dala rua 2x no promete mai ami katak: tempu badak ekipa sira sei mai hamutuk ho ami hodi realiza dialogu, hafoin bele hamamuk fatin realidade nunka realiza”.

“To’o ikus mai Estadu RDTL liu husi Sekertaria Estadu Assuntu Toponomia e Organizasaun Urbana ho ekipa fo ultimatu loron 3 deit mai ami, ami kolabora no kumpri, maibe to’o ohin loron laiha Parte kompetente sira maka mai hodi esplika ami-nia direitu no dever sira”.

Nune’e, komunidade sira ne’ebe afetadu ba eviksaun Ex Aspol husu :

1. Ami hakarak konfirma fila fali ami nia prosesu dadus, markasaun ne’ebe antes ekipa Ministeriu Justisa liu husi Terras propriedade, no Ministeriu Obras Públicas hodi klarifika rezultadu markasaun ne’ebe antes ne’e to’o iha ne’ebe no oinsa ona?
2. Ami komunidade Ex Aspol afetadu eviksaun ida ne’e maioria vida negosiante no barak liu maka estudante hahu husi ensinu intatil to’o universidade. Ami Komunidade Ex Aspol fo tempu loron tolu nia laran ba governu atu tun diretamente mai atu fo klarifikasaun no Esplikasaun ami nia direito no dever ho lolos.
3. Karik seidauk iha planu ruma ba fatin ida ne’e mak ami komunidade Ex Aspol sei reativa fila fali ami nia atividade negosiu iha fatin ida ne’e? Ho razaun katak durante fulan ida ona ami-nia ahi matan taka hodi hasusar tebes ami nia oan sira nia futuru.

Komunidade afetadu Antônio Gusmão deklara nia parte sei hela fali iha Kaikoli wainhira governu la halo indemnizasaun ba sira, tanba oan sira eskola iha Dili.

“Durante loron 3, hahú husi ohin to’o loron tolu mak governu la mai, mak ami sei hela nafatin iha ne’e, atu akontese udan mós ami sei la sai hosi fatin ne’e, avó faluk ida nia uma la sobu, nia hela nafatin, tanba sa ami-nia uma sira sobu tiha”. Nia afirma

Enkuantu, komunidade ne’ebe hetan evikasaun iha Kaikoli iha loron 17-20 fulan Jullu, oras ne’e balun hela iha kos, fila ona ba munisípiu no balun sei hela iha Kaikoli.