Laiha Dokumentu ! EhD Tereza & Ananias La Simu Pensaun Hosi MSSI
Imajem : Idozu Teresa Ribeiro ho difisiensia matan ho nia maun Ananias Amaral ho defisiénsia psikologia.
SAPNewsTL, Viqueque : Timor-Leste ukun ann tinan 24 maibe Idozu Teresa Ribeiro ho difisiensia matan ho nia maun Ananias Amaral ho defisiénsia psikologia husi aldeia Dacuate suku Afaloicai, Postu Administrativu Uatilari, munisípiu Viqueque to’o agora seiduak hetan nia diretu tanba la iha dokumentu identidade.
Xefe Aldeia Dacuate, Lamartinho de Carvalho haktuir Timor-Leste ukun aan durante tinan 24, maibe nia komunidade, Ema ho Defisiénsia (EhD) Teresa Ribeiro ho nia maun Ananias Amaral to’o agora seiduak hetan sira-nia direitu tanba la iha dokumentu identidade.
“Ha’u-nia komunidade ne’ebe mak defisiensia ho Teresa Ribeiru nia ho kondisaun defisiénsia matan husi moris mai kedas ho nia maun Ananias Amaral nia moras psikologia ka moras bibi mate, sira nain rua(2) to’o agora seidauk hetan nia diretu tanba laiha dokumentu”. Dehan Xefe Aldeia Dacuate, Lamartinho de Carvalho ba Jornalista SAPNews liu husi via telefone Segunda-Feira,12/01/2026.
Nia informa, Aldeia Dacuate ne’ebe ho kondisaun estrada ladiak hodi difikulta transporte públiku atu asesu ho distánsia ne’ebe dook husi postu, difikulta tebes idozu nain rua (2) hodi trata sira-nia dokumentu.
“Aldeia Dacuate ne’ebe mak dook husi postu nune’e susar tebes, dalaruma sira-rua(2), mesak entaun la’o mos araska, no bainhira udan kareta motor mai iha aldeia ne’e susar tamba estrada ne’ebe mak ho kondisaun la diak”.Nia salienta
Xefe Aldeia ne’e hateten durante nia mandatu nia halo pedidu ba iha Ministeriu Solidariedade Sosial no Inkluzaun maibe seidauk iha resposta.
“Iha mandatu, ha’u sempre hato’o hela deit ba xefe suku, no halo pedidu ba funsionariu sira husi Ministeriu Solidariedade Sosial no Inkluzaun, sira hatan dehan diak maibe to’o agora seidak iha resultadu”.
Enkuantu, Teresa Ribeiro ho kondisaun defisiénsia matan desde moris mai no Ananias Amaral ho kondisaun moras psikologia ka bibi mate ne’e iha aldeia Dacuate suku Afaloicai, Postu Administrativu Uatilari Munisípiu Viqueque.