Laiha Karreta Funeráriu, Família Dudu Mate-Isin Januário Ba Uma
Imagem : Família Matebian dudu mate isin Januário Marçal ba nia uma Bidau Toko-Baru, Díli, 13/04/2025
SAP News TL Díli : Deskonfia Doutor iha Hospital Nacional Guido Valadares (HNGV) abandona pasiente no husik hela ba estagiáriu sira, ikus mai pasiente Januário Marçal lakon vida tanba ran sai makaas hosi liman.
Tuir informasaun ne’ebe SAP News asesu liu hosi via whatsapp, Sasin Natalino Magno Belo informa katak matebian sofre moras durante fulan rua, nune’e família donor ran hodi aumenta ran Januário Marçal nian atu halo operasaun iha aban maibe estagiáriu balun ba losu tiha soru nia matan no la taka hikas, ikus mai ran sai to’o maran halo matebian hakotu iis.
“Doutor sira husu familia buka ran no familia hasai tiha ran ne’e no tau hotu ran, tuir mai estajiadu mai losu soru matan ne’e no lataka entaun ran ne’ebe mak ense ne’e sai to’o maran deit, ikus mai Januário Marçal hakotu iis iha HNGV”.Tenik Sasin Natalino Magno Belo ba SAPNews iha HNGV Bidau, 13/04/2025
Tuir planu, Januário Marçal atu hetan operasaun iha loron aban, 14 Abril 2025 maibe infelizmente la to’o iha loron ne’e matebian tenki remata nia peregrinasaun iha mundu tanba inkapasidade estajiadu balun nian.
Matebian hakotu iis, iha oras tuku ualu kalan, situasaun ne’e halo família matebian Januário Marçal lamenta, no triste tebes tanba Doutor sira abandona hodi haruka deit estagiáriu sira ba haree no rezulta Januário Marçal tenki lakon vida.
Hafoin matebian hakotu iis, carro funerária ladauk tula, nune’e família matebian deside hodi dudu deit ho kama ospital nian hodi lori fila ba matebian nia residência iha Bidau Toko-Baru.
Matebian Januário Marçal original hosi Munisipiu Baucau no hela iha Bidau Toko-Baru, Postu Administrativu Cristo Rei Munisipiu Díli.
Hafoin notisia ne’e publika SAPNews seidauk halo konfirmasaun ho parte Doutor liliu responsavel sira iha Hospital Nacional Guido Valadares (HNGV) tanba tama ona iha oras deskansa.
Nune’e, SAPNews sei halo konfirmasaun ho parte HNGV no família matebian ligadu ho akontesimentu ne’e iha loron aban.
Jornalista : Marciana da Conceição