Lansa Boletim ! Sergio : Halo Buat Ne’ebe Ita Ko’alia, Hakerek Buat Ne’ebe Ita Halo

SAPNewsTL, Dili – Eis Senadu Estudantil Periodu 2022-2024 Sergio Alves da Costa haktuir boletim ne’ebe hakerek ne’e akumula husi programa sira hotu ne’ebe assosiasaun akadémika estudantil UNTL  halo durante tinan 2 nia laran, estudante tenki halo buat ne’ebe nia ko’alia no hakerek buat ne’ebe halo, nune’e bele rai ba permanente tanba liafuan ne’e anin ne’ebe semo no lakon lailais.

Boletim refere lansa direta husi Magnífiku Reitor Universidade Nacional Timor Lorosa’e (UNTL) João Soares Martins, boletim ne’e hakerek husi assosiasaun akadémika estudantil faluldade engenharia siénsia no teknolojia, UNTL periodu 2022-2024.

Hafoin halo lansamentu liu husi ko’a fita, Magnífiku Reitor UNTL João Soares Martins agradese no fo parabens ba eskritor tanba bele hakerek jornada naruk ne’e ho volume ne’ebe boot no rai ba senadu foun sira.

“Parabens ba ita boot, agradese tanba bele hola inisiativa hodi hakerek boletim ne’e, parabens dala ida tan”. Dehan Magnífiku Reitor UNTL João Soares Martins ba eskritor iha Kampus Sentral UNTL, 14/06/2024.

Iha diskursu, Senadu estudantil  Periodu 2022-2024 Sergio Alves da Costa haktuir boletim ne’ebe hakerek ne’e akumula husi programa sira hotu ne’ebe assosiasaun akadémika estudantil UNTL halo durante tinan 2 nia laran inklui komunikadu imprensa sira.

Boletim assosiasaun akadémika estudantil UNTL periodu 2022-2024 refere ho lema jeral katak Hanoin, Hahalok no Hakerek Rasik.

“Assosiasaun estudantil FEST-UNTL deside halo boletim ida, boletim ne’e ho lema jeral ‘Hanoin, Hahalok & Hakerek Rasik’, boletim ne’e introduz husi programa hotu ne’ebe assosiasaun estudantil UNTL halo durante tinan 2”.

“Tansa mak ita deside hakerek ? Ita hanoin, ko’alia, halo no hakerek rasik, tanba wainhira ita ko’alia, liafuan ne’e anin ne’ebe semo aas no lakon maibe wainhira ita hakerek ne’e hela ba permanente, tempu no espasu bele muda, maibe saida mak ita hakerek ne’e sei la muda pontuasaun nein letra ida husi tinan ba tinan”. Tenik Eskritor, Eis Senadu FEST Sergio Alves da Costa iha kampus sentral UNTL, 14/06/2024

Eis Senadu Estudantil ne’e husu ba senadu foun sira atu hanoin, ko’alia no halo, hafoin halo bele hakaas an hodi hakerek saida mak halo tanba hakerek ne’e importante tebes kompara ho ko’alia ka halo diskursu deit.

“Husu imi hotu atu hanoin, ko’alia, halo maibe hakerek atu nune’e bele rai hela ba memoria permanente, halo buat ne’ebe ita koa’lia, hakerek buat ne’ebe ita halo, lee no lee, halo no halo, ikus ita hakerek no hakerek hodi konserva ba istória”. Sergio Alves da Costa hateten

Senadu sesante ne’e mos husu ba emposadu sira atu kontinua hatutan programa sira ne’ebe la’o durante ne’e, halo buat hotu tuir estatutu UNTL no regulamentu akadémiku UNTL, halo buat hotu ho didiak, kuidade no responsabilidade.

“Kontinua ba oin, halo buat hotu ho didiak, kuidadu no responsabilidade, kontinua defende interese estudante hotu nian no brani ariska an iha risku hodi defende estudante sira nia direitu iha UNTL, hamutuk ita tane aas UNTL, aas hanesan Foto Ramelau, Kablake no Matebean, UNTL tenki ba oin no diak liu iha Timor-Leste”. Senadu sesante ne’e husu.

Boletim ne’e lansa direita husi Magnífiku Reitor UNTL João Soares Martins, Vise Reitora Asuntu Estudantil Ligia Tomas Correia, Senadu Jeral UNTL Cristovão de Araujo, Eskritor Sergio Alves da Costa, hamutuk vise dekanu sira no senadu estudantil foun sira iha UNTL.

Jornalista : Marcela Mery da Costa & Ermelinda Soares