Lansa Konstrusaun Merkadu Baucau & Ermera, VPM Assanami : “Hamutuk Ba Dezenvolvimentu Sustentavel”.

Imajem : Vise-Primeiru Ministru, Ministru Kordenador Ba Assuntus Sosiais, Mariano Assanami Sabino iha Ermera, 06/02/2026. Foto : GVPM. 

SAPNewsTL : Governu Timor-Leste atravez Vise-Primeiru Ministru, Ministru Kordenador Ba Assuntus Sosiais, Mariano Assanami Sabino, hamutuk ho membru governu sira lansa Merkadu Munisipal Baukau no Ermera.

Vise-Primeiru-Ministru, Mariano Assanami Sabino agradese ba povu Baukaun tanba servisu hamutuk ho Autoridade Munisipla Baukaun, Ministeriu Komersiu Industria, no Ministru Planeamentu Investimentu Estratejiku konsege lansa merkadu foun ba munisipiu Baukau.

IX Governu mai atu halo dezenvolvimentu, mai atu implementa kompromisu sira tanba ne’e presiza ema hotu-hotu liu-liu Partidu Politiku sira, Veteranus, Autoridade Suku no Aldeia sira hotu atu fo liman ba malu servisu hamutuk asegura oinsa obra ne’e bele la’o di’ak.

“Baukau iha fulan kotuk mak ita inaugura dalan Kaisidu ba Kairavela, iha semana kotuk lansa tan Estrada urbana, ohin ita lansa tan merkadu foun ida no obra sira seluk hanesan Estrada iha Bagia no fatin sira seluk sei la’o hela ne’e parte importante oinsa bele hamoris ekonomia povu nian iha baze”. Hateten Vise-Primeiru-Ministru, Mariano Assanami Sabino iha Baucau,12/02/2026. Sira Media G-VPM

Konstrusaun merkadu munisipal Baucau responsabiliza husi kontrator, Fujian Youngtai Construction Group Co.,LTD, ne’ebe JoinT Venture ho Suhurama Developer, Unipessoal, LDA. ho orsamentu hamutuk tokon $7,139,218.43, tuir planua sei termina konstrusaun iha 13 Novembru, 2027.

Antes ne’e, Vise-Primeiru Ministru lansa ona konstrusaun merkadu munisípiu Ermera, ne’ebe organiza hosi Ministeriu Komersiu no Industria (MCI), implementa husi Kompana Henan Fifth Construction Group Co., Ltd husi Xina, ho orsamentu $8.861.517,89.

Assanami Sabino konsidera, merkadu importante tebes hodi dudu ekonomia ba oin. Nune’e konvida populasaun hotu-hotu atu kontribui labele halo impedimentu atu kompaña bele halo nia servisu tuir tempu ne’ebe deterima ona.

“Obra ne’ebe ohin hatur iha ne’e, nain mak Ermera oan sira entaun presiza servisu hamutuk, labele haree ba partidu ka kor saida deit imi tenke servisu hamutuk ba Ermera nia diak”. Assanami sublinha

Assanami hatutan, IX Governu Konstitusional lansa ona estrada husi Gleno ba Letefoho no estrada urbana, tuir planu sei mai lansa tan estrada husi Letefoho ba Atsabe no Atsabe ba Hauba Bobonaru, hirak ne’e hotu atu kumpri kompromisu ne’ebe halo ona iha kampaña.

“Ami sei la mai halo deit kompromisu, ami mai atu halo, maske neneik maibe ita halo, tamba ne’e ba imi hotu-hotu tenke hakmatek labele rona propaganda oi-oin husi ema irresponsavel sira, mai ita hamutuk ba dezenvolvimentu ne’ebe iha sustentavel,” dehan V-PM.

Assanami afirma governu sei lansa lansa tan Hospital, Tribunal Munisipal, Edificio Autoridade, lansa uma dignu no sira seluk tan, nune’e “Ermera oan sira hotu prepara an didiak hodi simu dezenvolvimentu hirak ne’e”.Nia husu

Tuir planu iha fim Fulan-Fevereiru, MCI sei lansa tan Merkadu Munisipal Lautem, dadaun ne’e tekniku sira hahu dezeña hikas merkadu Maliana, Ainaru, Suai no Vikeke.