Lansa Manual Reportagem Jéneru ! SEKOMS : Mídia Bele Muda Atitude Sosiedade

Imajem : Sekretariu Estadu Komunikasaun Sosial (SEKOMS) Espedito Dias Ximenes, iha salaun FMDC, Hudi laran, Quinta (25/07/2024). Foto : Média SEI

SAPNewsTL, Dili – Kombate violênsia bazeia ba jeneru iha Timor-leste, Sekretaria Estadu ba Igualdade (SEI), akompanha husi Sekretariu Estadu Komunikasaun Sosial (SEKOMS) parseria ho Fundasaun Media Development Center(FMDC sigla portugues), no UN Woman, ofisialmente lansa manual Reportajen Sensivel ba Jéneru.

Sekretaria Estadu Igualidade (SEI sigla Portugues) Elvina Sousa de Carvalho hateten, SEI ho SEKOMS halo kooperasaun hamutuk ho UN Woman liu husi prozetu hamutuk ba igualdade ne’ebe konsege produz matadalan reportajem sensivel ba generu kona-ba aktividade rua (2), liga ba formasaun Jornalista imprime sensivel no mos Radio Komunidade Sensivel nia servisu.

“SEI konsiente katak média iha papel importante ida atu transforma no muda mentalidade iha sosiedade no mos atu kontribui mudansa etika, liu husi manual reportajen sensivel ba jeneru, tanba ne’e ami hanoin katak SEI tenki kolabora hamutuk ho SEKOMS, FMDC no UN Woman atu bele kontribui ba produtu jornalistiku.” Dehan SEI Elvina Sousa Carvalho, ba jornalista sira iha salaun FMDC, Hudi laran, Quinta (25/07/2024).

Governante ne’e hatutan, reportagem sira ne’ebe sensivel asuntu bazeia ba jeneru, sensivel ba informasaun sira ne’ebe igualdade jeneru no mos produtu jornalistiku sira promove no empodera feto sira, fó mos atensaun ba promosaun igualdade jeneru nian.

“Ami hanoin kooperasaun ida ne’e importante tebes no la hotu deit iha ne’e depois ba matadalan ida ne’e sei iha tan programa sira seluk. Tinan ida ne’e iha aktividade rua (2), ida mak hanesan formasaun ba jornalista sira bele sensivel liu tan bainhira produs notísia, inklui mos formasaun ba Radio komunidade sira, ne’ebe mak liu ona atu nune’e sensivel liu tan iha reportagem ba servisu públika informasaun, nune’e promove di’ak liu tan iha futuru”. Hateten SEI Elvira Sousa Carvalho.

Imajem : SEI, SEKOMS, KI, UN Woman & FMDC Hala’o Lansamentu Ba Manual Reportagem Sensivel Jéneru.

Iha fatin hanesan, Sekretariu Estadu Komuniasaun Sosial Expedito Loro Dias akresenta, papel média iha Timor-Leste importante teb-tebes tamba bele influensia halo mudansa ba mentalidade, atitude no sai labolatorium transfomadu ba públiku no sosiedade.

“Média ne’e sai hanesan universidade aberta tamba média iha nia notísia no informasaun ne’ebe publiku asesu, média nia papel importante teb-tebes iha ne’ebe deit tamba, média mak bele influensia no halo mudansa ba mentalidade, mudansa ba atitude no média mak sai labolatorium transfomadu ba ema”. Espedito Dias hateten

Nia argumenta, ko’alia kona-ba Polítika, Ekonomia, Sosial, Kultural, Seguransa no mos Defeza ne’e signifika média fo hela eskola ba públiku liu husi TV, Radio, Jornal no mos Plataforma Online Digital.

“Mídia fo eskola ba públiku liu husi TV, Rádiu, Jornal no Plataforma Online, signifika sai hanesan universidade aberta ida ba públiku tamba ne’e média importante iha aktividade ne’ebe de’it atu foti, média sai ponte osan mean entre estadu ho sosiedade”. Nia sublinha

Enkuantu, Matan dalan (manual) reportagem sensivel ba jéneru ne’e ko’alia liu kona ba Violénsia Bazeia ba Jéneru no Violénsia Hasoru Feto no Labarik Feto inklui mensagem sira husi entidade oioin ba pessoal média, editor notísia no organizasaun sosiedade sivil sira oin bele halo advokasia ne’ebe sensivel ba jéneru iha Timor-Leste.

Partisipa iha serimónia lansamentu manual ne’e maka SEKOMS Espedito Dias Ximenes, SEI Elvina Sousa de Carvalho, Presidente Konsellu Imprensa Otelio Ote, Representante UN Woman no Diretor Ezekutivu FMDC Francisco Gari.

Jornalista : António Altamiranda