LAT: “Jovens Presiza Aprende Istoria, Kria Paz & Estabilidade”.
Imajem : Tenente Jeneral Reformadu Falintil Forsa Defesa Timor-Leste (F-FDTL), Lere Anan Timor, (LAT), iha Tasi-Tolu, 20/08/2025
SAPNews TL, Díli : Lembra hikas sakrifísiu FALINTIL, Tenente Jeneral Reformadu Falintil Forsa Defesa Timor-Leste (F-FDTL), Lere Anan Timor, (LAT), apela ba jerasaun foun buka hatene istoria rezisténsia, aprende hadame malu, kria paz no estabilidade ba nasaun Timor-Leste (TL)
Marcela Mery da Costa — SAPNews TL
Tuir Eis Xefi Estadu ne’e hateten, istoria FALINTIL hahu konstroi iha Ai-sirimou Munisipiu Aileu iha tinan 1975, ho luta rezisténsia ba okupasaun Indonézia durante tinan 24, hodi defende direitu povu maubere nian husi invazaun.
“Ohin FALINTIL tinan 50, ha’u apela ba jerasaun patriota, ha’u apela ba juventude Timor-Leste, se uluk imi nia aman, imi nia avo sira aprende halo funu, aprende ho ema to’o ita ukun ann ona, nune’e imi aprende hadame malu aprende kria paz no estabilidade ba ita nia rai,” Dehan Jeneral Reformadu Lere Anan Timor ba Jornalista sira, hafoin partisipa eventu komemorasaun FALINTIL ba dala 50 iha Tasi-tolu, Quarta (20/08/2025).
Lider rezisténsia ne’e hatutan, pajina husi tinan 1975 to’o mai 1999 ne’ebe mak hahu iha Aileu Ai-sirimou, martires rihun ba rihun mate tui-tuir dalan, tanba defende makaas povu Timor-Leste.
“Ami ne’ebe mak sei moris, ami sama sira-nia ran, hakat sira-nia mate hodi hasa’e bandeira ukun rasik aan ho ita-nia povu maubere, komemorasaun 50 Anos FALINTIL mak sakrifísiu jerasaun rezisténsia hodi fó inspirasaun ba jerasaun foun atu kontinua kaer prinsipiu no valores nasionalistas” Tenik nia.
Lere Anan Timor salienta, juventude sira buka aprende husi sakrifísiu aman-avo sira, la’ós de’it kona ba funu, maibé aprende espiritu unidade nasional, luta ba ukun rasik an, hadame malu, fo prioridade ba paz no estabilidade ne’ebe fó moris diak ba povu Timor-Leste iha futuru.
“Ohin loron ita hatene katak ita iha lei, ita iha konstituisaun no ita iha regulamentu militar, 24 anos ami forsa la iha lei, la iha konstituisaun no regulamentu militar maibé firme no ami iha unidade lori ami-nia inisiativa komanda da forsa, husi ami esperiénsia no prátika mak ami manan funu, tanba ne’e joventude sira buka aprende husi istória luta ne’ebe naruk”.
Aleinde apela ba juventude sira, lider rezisténsia ne’e fó mós deklarasaun kona-ba veteranu sira ne’ebe kontinua enfrenta desafiu, tuir nia maski governu sira tinan-tinan la’o hodi hadia politika ba veteranu, maibé problema tékniku seidauk permite solusaun kompletu, prosesu ida ne’e mós fó sinal katak istoria sakrifísiu tenke iha memória kolektiva povu Timor-Leste.
Entretantu, iha eventu komemorasaun ezistensia FALINTIL ba dala 50°, partisipa husi orgaun soberanu sira, militar, sivil, familia mártires, veteranu, veterana no konvidadu sira, maibé la marka prezensa husi Eis Prezidenti Republika Fransisco Guterres Lu Olo no Eis Primeiru-Ministru Marí Bin Amude Alkatiri.