Lere Deklara Troka Reitor UNITAL ! Nomeia António Sai Interinu

Imajem : Konseleiru FUNATIL Lere Anan Timur iha Kampus UNITAL, 06/08/2024. Foto : Dircia Baptista Belo

SAPNewsTL, Dili – Relasiona ho lamentasaun no ezijénsia ne’ebe estudante halo hasoru Fundasaun Aswa’in Timor Lorosa’e (FUNATIL) hodi ezonera atual Magnifiku Reitor UNITAL Joaquim de Jesus Vaz ne’ebe ho títulu lisensiatura lidera UNITAL, Konseleiru FUNATIL Lere Anan Timur deklara troka reitor foun no nomeia Vise Reitor Asuntu Akadémiku António Guterres sai Reitor UNITAL Interinu.

Konseleiru FUNATIL Lere Anan Timur hateten, FUNATIL hamutuk deside Vise Reitor Asuntu Akadémiku António Guterres sai Reitor UNITAL Interinu durante fulan tolu (3) hodi hein desizaun FUNATIL nomieia Reitor Foun ba periodu 2024-2028.

“Ami konseleiru sira hamutuk deside no hili Vise Reitor Asuntu Akadémiku António Guterres sai Reitor UNITAL Interinu durante fulan tolu antes fundador sira tur hamutuk hili Reitor Foun”.Tenik Konseleiru FUNATIL Lere Anan Timur ba Jornalista sira hafoin hala’o dialogu ho estudante sira iha Kampus UNITAL, 06/08/2024

Konseleiru FUNATIL Lere Anan Timur husu mos estudante sira hodi hakmatek no labele iha ema ida partidariza universidade tamba universidade ne’e hari’i husi veteranu sira hodi loke ba ema ki’ak no ki’ik sira iha Timor-Leste.

“Universitáriu sira tenki hakmatek, importante labele familiariza, labele partikulariza universidade no ema ida labele partidariza universidade, universidade ne’e tenki diferente, ema barak kiak tamba funu, tamba ne’e ami loke universidade ne’e ba ema ki’ak sira”. Konseleiru FUNATIL Lere Anan Timur sublinha

Lere Anan Timur dehan, wainhira la priense kritériu dalan di’ak liu maka troka hodi tau fali ema seluk ne’ebe prense kritériu tamba universidade produz doutor bar-barak ne’ebe bele uza hodi dezenvolve universidade.

“Professor sira tenki kualidade, hanorin ho diak, ha’u nia alin Joaquim de Jesus Vaz, nia nu’udar Timor oan, nia mos fo nia kontribuisaun ba universidade, ita la despreza nia maibe ita servisu tuir kritériu, normas, no lei. Se la priense kritériu, lalika para labele tau estudante atus ba atus ne’e sai vítima ba nia hahalok, UNITAL iha doutor barak ne’ebe bele uza hodi lori universidade ba oin”.Nia deklara

Imajem : Estudante UNITAL

Konseleiru FUNATIL husu ba ema hotu iha UNITAL atu servisu hamutuk hodi lori universidade ba oin, labele halo aproveitamentu iha universidade laran tamba UNITAL ne’e hari’i ho ruin no ran.

“Labele fahe malu, hatudu fraternidade humana, maun ho alin nafatin, labele fahe malu hanesan uluk, buat ruma ladiak, halo diálogu hodi rezolve, tanba universidade ne’e hari’i ho ruin no ran, hari’i husi veteranu na’in lima, hafoin konvida sira seluk mai apoia, to’o loron ida ita sei hanaran nia sai universidade veteranus para mundu bele kunhese”. LAT afirma

Imajem : Senadu Geral UNITAL Guilherme da Silva

Iha fatin hanesan, Senadu Geral UNITAL Guilherme da Silva sente kontente tebes tanba hetan ona solusaun ne’ebe fo ona satisfasaun ba estudante hotu.

“Sente kontente tebes tamba ohin konsege ona iha desizaun no  solusaun ne’ebe fo satisfasaun ba estudante sira, nune’e bele iha reitor foun ne’ebe bele lori universidade ba oin”. Senadu Geral UNITAL Guilherme da Silva hateten.

Fo hanoin fali katak Fundador ba Universidade Oriental Timor Lorosa’e (UNITAL) maka hanesan Lere Anan Timur,  Cornelio Ximenes Maunana, Matus Lemorai, Nunura no Nixon.

Jornalista : Dircia Baptista Belo