LFTL Ofisialmente Loke Janela Transferênsia Jogador Ba Klube 17
Imajem : Diretor Kompetisaun LFTL Charles Guterres hala’o konferensia imprensa iha Estadium Munisipal Dili sesta (11/04/2025).
SAPNewsTL, Dili: Orgaun Liga Futebol Timor-Leste (LFTL) ofisialmente loke janela transferênsia jogador ba klube 17 ne’ebé sei partisipa Liga Timorense divizaun dahuluk no daruak epoka 2025.
“Ohin ami husi parte LFTL fo sai janela transferênsia jogador nian ba klube divizaun dahuluk no daruak hahu iha loron 11 fulan abril to’o loron 11 fulan maiu 2025, ba rejistrasaun no verifikasaun komesa iha loron 12 fulan maiu to’o loron 15 fulan maiu 2025, hafoin submisaun lista final loron 16 fulan maiu to’o loron 19 fulan maiu 2025”. dehan Diretor Kompetisaun LFTL Charles Guterres ba jornalista sira liu konferensia imprensa iha Estadium Munisipal Dili sesta (11/04/2025).
Diretor hatutan, sira fo sai orariu janela tranferénsia bazeia enkontru triparte katak governu no FFTL serteza ona para atu finansia osan hamutuk $700.000 ba liga futebol epoka 2025.
Iha fatin hanesan, porta voz LFTL Jordão Henrique hatete, regulamnetu no orariu parte orgaun LFTL prepara ona no sei fahe ba klube sira bainhira sira halo rejistrasaun.
“Regulamnetu no orariu ami parte husi orgaun LFTL prepara hotu ona depois sei fahe ba ita nia klube sira bainhira sira mai halo rejistrasaun, regulamentu ami sei muda oituan deit barak liu mak uza tiha ba liga sira durante lao ne’e”. tenik Jordão
Jordão informa tan, kada klube sei rejistu total jogador nain-27 ho ofisial nain hitu, kuota ba jogador estranjeiru nain hitu nain lima mak sei joga iha kampu laran, Jogu divizaun dahuluk mak sei la’o uluk, hafoin mak komesa divizaun daruak.
Nia salienta tan, Liga Timorense 2025 sei abertura iha fulan maiu nia laran iha Estadium Manatuto, liga ne’e rasik sei utiliza kampu Manatuto, Ermera no Estadium Munisipal Dili iha tempu kalan depois jogu CPLP 2025 iha Timor-Leste.
Entretantu, klube sanulu mak sei kompete iha divizaun dahuluk no klube hitu mak sei compete iha divizaun daruak Liga Timorense epoka 2025.
Reportajen; Augusto Dos Santos