LFTL Sei Fo Subsídiu 30.000 USD Ba Klube Divizaun Dahuluk
Imajem : Prezidente LFTL Ipolito Soares iha nia servisu fatin Merkadu Lama Dili, 12/05/2025.
SAPNewsTL, Dili: Orgaun Liga Futebol Timor-Leste (LFTL) sei fo subsídiu ba kada klube divizaun dahuluk sanulu kompete Liga Timorense epoka 2025.
“Liga Timorense sei la’o durante fulan tolu, portantu ita prepara subsidiu 30.000 USD ba kada klube sanulu iha divizaun dahuluk, orgaun LFTL sei transfere 40% uluk ba klube sira bainhira orgaun LFTL remata ona halo verifikasaun ba klube sira nia dokumentu, prémiu kampiaun ba divizaun dahuluk ita prepara 25.000 USD, divizaun daruak ita prepara 10,000 USD, premiu ba tasa mos ita prepara 15,000 USD”, dehan Prezidente LFTL Ipolito Soares ba jornalista sira iha nia servisu fatin Merkadu Lama, Dili (12/05/2025).
Prezidente LFTL ne’e hatutan, subsidiu ba klube sira iha divizaun daruak orgaun LFTL prepara 5.000 USD ba kada klube tanba jogu setengah kompetisi, sira total jogu 21 husi klube hitu sei la’o durante fulan ida deit iha Dili laran no tenki diferente ho klube sira iha divizaun dahuluk nian tanba divizaun daruak sei la iha degradasaun ba klube sira.
Nia informa tan, orgaun LFTL mos prepara premiu jogu 1.000 USD ba klube sira manan hetan 70% , lakon 30% no impata 50%, orgaun LFTL prepara orsamentu 500 USD ba deslokasaun klube sira ba Manatuto ho Ermera.
Ipolito hatete tan, razaun Liga Timorense 2025 la’o setengah kompetisi tanba foin hahu fali liga no infraestrutura iha Dili laran seidauk prontu tenki hala’o jogu iha Estadium Manatutu no Ermera, tan ne’e sei aloka orsamentu mos ba ida ne’e liuliu ba deslokasaun klube no komisaun organizador.
Eis Prezidente klube Assalam ne’e afirma, horseik taka Janela tranferensia ba klube divizaun dahuluk nian, klube sanulu rejistu ona maibe sira sei kompleta dokumentu balun hafoin orgaun LFTL sei halo verifikasaun ba depois technical meeting.
Entretantu, klube sanulu sei kompete iha divizaun dahuluk Liga Timorense 2025 mk AD SLB Laulara, Karketu Dili FC, Emmanuel FC, AS Marca, DIT FC, AS Ponta Leste, Assalam FC, Academica FC, Porto Taibesi no Coração FC.
Klube hitu sei kompete iha divizaun daruak Liga Timorense 2025 mak FIEL FC, Kablaki FC, Santa Cruz FC, Nagarjo FC, Aitana FC, Zebra FC no Lica Lica Lemorai.
Reportajen: ADS