Kultura Ainaru Reprezenta TL, Simu Santu Padre Iha Katedral
Imajem : Koordenador ekipa Kultura Timor- Leste, Paulo Doutel Sarmento iha Katedral, Sabadu,07/09/2024.
SAPNewsTL, Dili – Kultura Paroquia Imaculada Conceição de Maria Maubisse (PICOMA) preparadu simu Sua Santidade Papa Francisco iha Paroquia Imaculada Conceição da Virgem Santa Maria Sé Catedral Dili.
Tuir koordenador ekipa Kultura Timor- Leste, Paulo Doutel Sarmento informa iha fulan Juñu Parokia Imaculada Conceiçao de Maria Maubisse hetan notisia husi Arcebispo Metropolita de Dili Dom Virgilio Cardeal do Carmo da Silva, no Ministru Administrasaun Estatál rasik fo konfiansa ba Grupu Kultura PICOMA husi Munisipiu Ainaru Postu Administrativu Maubise hodi simu Santu Padre Iha Katedral.
“Ami husi munisipiu Ainaru Postu Administrativu Maubesse, kultura ida ne’ebé moris nanis husi tinan 1989, ho primeiru Paroku Padre Norberto do Amaral hodi loke odamatan uma kreda nian, ohin ami mai hodi halo resesaun kultural, simu Sua Santidade Papa Francisco, maka ami halo preparasaun gladi Seregala no Bidu hodi simu Santu Padre iha Katedral”, Dehan Koordenador ekipa Kultura Timor- Leste, Paulo Doutel Sarmento Ba jornalista Sira iha Parokia Katedral,Sabadu,07/09/2024
Tuir sekuensia ne’ebe sira simu husi igreza no governu katak sira sei simu Santu Padre iha loron 10 Fulan Setembru ho kultura tradisionál ne’ebé kompostu husi seregala, olik no tebe dahur ida.
“Apresentasaun kultural hodi simu Papa Francisco Seregala ida ho nia titulu simu ho look, olik ida hasa’e no husu bensa matan malirin, tebe dahur ne’e katak reprezenta povu Timor tomak hodi hato’o ben-vindu ba Sua Santidade”.Nia informa
Lia nain ne’e hatutan, Huu karau dikur, no toka Korneta ne’e hodi haksolok povu Timor nian ba Lider Santa Sé Papa Francisco, bainhira nia to’o mai Timor-Leste.
Antonio de Jesus Maria Gomes, koordenador kultura iha dioseze Dili, esplika katak kultura look bua ho malus ne’e nu’udar kultura orijen bainhira bainaka ida mai, look ne’e hatudu Timor-Leste amizade, no respeitu hodi simu bainaka.
“Entaun, iha sira nain tolu ne’e, mane ida no feto nain rua, mane lori biti ba nahe tuir kultura Timor nian, feto nain rua lori bua malus ahu, ida lori tabaku, batar Kulit ho Ai Turi, daudaun ne’e sira preparadu hodi simu Papa, sira nain tolu ne’e mai husi Likisa, Manatutu no Viqueque nu’udar reprezenta Dioseze tolu”. Nia sublinha
Foinsa’e na’in tolu ne’e mak Augusto Caldas Lobato tinan 8 husi Munisipiu Likisa, Benecia Maria de Sousa tinan 4 husi munisipiu Manatutu no Felicia Gomes de Britos Lopes, tinan 7 husi Munisipiu Viqueque.
Grupu tradisionál ne’e hamutuk ema na’in tolunulu (30) kompostu husi mane na’in sanulu resin tolu (13) no feto hamutuk sanulu resin hitu (17). Ekipa ne’e sei simu Sua Santidade Papa Francisco iha loron 10 Fulan Setembru 2024.
Jornalista : Ermelinda Soares