Liafuan Kroat ! Jose : “SEATOU Ganas, Kuta Husi PM Xanana”

SAPNewsTL, RAEOA : Relasiona ho eviksaun ne’ebe komunidade hamutuk uma-kain 361, Ativista Jose da Costa Sure hakerek essay krítiku ida hasoru nonu governu konstitusional tanba konsidera asaun eviksaun ne’ebe SEATOU halo viola direitu ema nian liliu feto no labarik sira. Tuir mai lee notisia kompletu.

Kazu eviksaun/gusur ne’e akontese desde períodu ukun-an, maibé ida ganas liu ne’e tinan ida ikus (2024) to’o agora iha sidade Dili hanesan Becora, Bidau, Aitarak-laran, Tasi-Tolu, nst., no mós iha Munisípiu balun hanesan Baucau no tinan ne’e loke kedas iha Fomentu II.

Husi fenómena ne’e, mosu reasaun ne’ebé luan alias pro no kontra husi parte akadémista, sosiedade sivil, membru parlamentu nasionál sira, governantes to’o ba povu baibain. Entre hirak ne’e, balun mai ho razaun argumentativa, balun fali, mai ho sentimental no sorin seluk mai de’it ho tolok (katak argumentu laiha).

Iha tinan foun agora 2025, eviksaun hahú kedas iha Fomentu II ne’ebé lidera husi Secretário Estado Assunto Toponímia e Organisação Urbana (SEATOU), ne’e nu’udar prezente moruk ida ba povu ai-leba sira iha fatin ne’e. Halo populasaun sira traumatizadu, triste, tauk iha klima ukun rasik an ida ne’e . Husi ne’e, ita akompaña deklarasaun balun husi parte SEATOU katak, “durante ne’e aviza ona ba uma kain sira ne’e atu voluntariamente sai husi fatin ne’e no sorin seluk balun ne’ebé halo uma iha kedas mota ninin ne’e tendénsia bo’ot ba dezastre naturais ka inundasaun, nune’e tenki muda husi fatin risku sira ne’e”. Ita bele akompaña deklarasaun sira ne’e iha mídia nasionál sira (GMN TV, SAP NEWS TL, SMNEWS, nst).

Husi deklarasaun sira ne’e, dudu ha’u hakarak hamosu pergunta filozófiku balun katak, tanba sá kada loron ema husi munisípiu mai konsentra iha kapital Dili? Tanba sá ita ukun an ona tinan ruanulu resin tolu (23), maibé ema sei hela iha mota ninin no ponte okos? Tanba sá mak parte relevante fó avizu beibeik ona, maibé ema sira ne’e mantein la hamamuk fatin refere? Saida mak nia kauza primordial?

Pergunta hirak ne’e nu’udar pontu sentrál ba ita atu diskuti didi’ak hodi buka-hatene ninia kauza prinsipál sira ne’ebé dudu ka obriga ema mai konsentra iha Dili até hela iha mota ninin, nune’e ita evita ka labele tolan tomak saida mak elite polítiku sira ko’alia iha nia diskursu sira hodi fó sala de’it ba povu kbi’it laek sira, enkuantu sira (elite) santu alias sala laek.

PM Xanana injeta nia ignoránsia ba SEATOU Germano

Xanana nu’udar Comandante em Chefe das FALINTIL depois de Prezidente Nicolau dos Reis Lobato mate iha batalla iha 1979, 31 de dezembru. Tuir nia (Xanana) iha nia livru “Temática da Guerra” iha kedas nia prefásiu hateten katak, “ ‘kuandu ha’u temi método marxista de análise’, ‘ha’u hakarak prefere ba método dialético de análise ba fenómenos’, ida ne’ebé hatudu kontradisoens sira ne’e, tuir ida-idak ninia importánsia, ho relasaun ba prosesu dezenvolvimentu fenómenu ne’e”.

Husi método marxista de análise alias Materialismu Dialétiku Históriku (MDH), Xanana uza ida-ne’e hodi halo análize ba kontradisaun funu entre Timor-Leste ho Indonésia oinsá nia bele hatene funu ne’e nia kontradisaun prinsipal no sekundáriu em termos de kapasidade Komandu, fatór polítiku, militar diplomátiku no ekonómiku. Husi análize ne’e, nia (Xanana) to’o iha konkluzaun ida katak, ita-nia forsa sei bo’ot liu inimigu nian em termos de fatores sira ne’e hotu, nune’e loron ruma ita sei hetan vitória hodi lori moris di’ak ba povu maubere(luta prolongada). De faktu ita hakotu iha 1999 liu dalan referendu.

Kona-ba paradigma refere (método marxista) sai nu’udar ita-nia oklu ba analizasaun hodi hare’e problema ka fenómena ida ho nia totalidade, katak atu evita vizaun unilateral ka subjetivizmu ka hare’e fenómena ida ho pedasuk-pedasuk de’it em termos de setor infraestrutura, ekonómika no kapital sosial. Kona-ba ida ne’e, Xanana hatene liu tanba hirak ne’e tinta hotu iha ninia livru laran.

Husi nia análize ba funu difísil ne’e, ita bele lori mai hodi hare’e ba fenómena sira ohin-loron liu-liu ba kazu eviksaun. Husi ita-nia leitura ba nia livru sira hanesan Temática da Guerra, Reverificação da Prática em 1984, Saudações da Brigada Vermelha, nst., ita hatene katak, saída mak uluk nia halo iha tempu funu laran no ohin-loron nia hakerek sai nu’udar nia obra, nakonu ho kontraditóriu ba nia prátika sira iha era ukun-an, tanba ninia ignoránsia.

Husi nia (Xanana) nia ignoránsia no arogánsia mak ense fali ba nia membru governu sira, liu-liu ba SEATOU mai ho karáter represivu, ditadura, bandalizmu, militerizmu no fasista hodi halo destruisaun ba ema-nia hela fatin, duni vendedór ambulante sira iha dalan ninin, harahun vendedor sira-nia sasan no baku, tuku, tebe to’o kanek.

Prátika sira ne’e uluk rejime Soeharto mak halo ba povu Timor-Leste durante tinan ruanulu resin ha’at (24) iha ne’ebé Xanana rasik foti pozisaun kontra, maibé hafoin ukun-an nia rasik mak ezekuta fali hahalok kriminozu hirak ne’e ba nia povu maubere. Ninia mehi ba libertasaun povu Maubere husi ki’ak no mukit ne’e utópiku ka mamuk, maibé ba grupu balun mak realidade moris di’ak, maka Xanana nia família ho nia aliadu sira no mós lideransa sira seluk.

Estadu, Governu no autoridade munisipál ne’ebe lidera husi PM  Xanana Gusmão preokupa liu sidade ne’ebé moos, ijiene no Dili saudável, duké organiza povu nia moris ba hakonu nia nesesidade báziku loron-loron nian. Ba Estadu, Dili tenki moos, maske nakonu ho ki’ak-sidade. Polítika sira-ne’e la pró ba povu nia interese, maibé fó fatin de’it ba dominasaun ema osan-na’in, atu hadau no okupa sidade. Enkuantu, povu baibain, violentamente, duni ba ninin. Ami hare’e katak moris-di’ak no sidade-moos no organizadu tenki la’o paralelu.

Povu nia moris-di’ak no dignu tenki integradu iha ordenamentu territoriál no planemamentu urbana. Sidade atu sai furak maka tenki investe ba ema hodi hakonu nia nesesidade báziku sira, tanba asesu ba sidade ne’e direitu báziku ema-hotu nian.

Klase elite ka osan-na’in sira hakarak dezeña sidade tuir sira-nia interese hodi bele masimiza akumulasaun osan ba habokur sira-nia konta bankaria no bolsu. Sira sempre hakarak dezeña sidade tuir sira-nia interese hodi sira-nia produtu, sira-nia fasilidade fa’an, arenda no aluga nian, sira-nia supermerkadu, sira-nia restaurante, sira- nia loja boot sira, sira-nia otél no seluk bele akumula osan ho másimu liuhusi elimina ka eviksa negosiante ki’ik (hanesan vendedór ambulante) sira ba iha área perifériku.

Tan elite sira sempre domina ekonómikamente no polítikamente, sira sempre manán sira-nia interese ekonomia-polítika partikulár ne’e liuhusi instrumentu legál ne’ebé sira rasik mak prodús ka, liuhusi polítika planeamentu urbana. Tanba ida-ne’e planeamentu urbana iha sidade ne’ebé de’it la’ós kestaun estétika, planeamentu espasu/arkitektura no ambientál nian de’it, maibé mós problema ekonomia-polítika iha-ne’ebé elite sira hakarak masimiliza sira-nia lukru liuhusi elimina negosiante ki’ik sira. Nune’e polítika governu nian hodi halo eviksaun ba vendedór ambulante sira la seluk la leet hanesan polítika ne’ebé afavór ba klase osan-na’in sira de’it. Polítika ne’ebé hamate asesu klase oprimidu sira ba rekursu ekonómika hodi asegura de’it akumulasaun másimu osan ba klase elite ka osan-na’in sira. (Komunikadu imprensa husi OAN, 2023).

Tanba sá ema barak mai konsentra iha sidade Dili kada loron?

Sidade iha ne’ebé de’it mosu nu’udar rezultadu husi sentralizasaun kapitál (osan no rekursu ekonómika sira seluk) sosialmente no jeográfikamente iha fatin ida. Ne’ebé, ikusmai, estimula urbanizasaun ka migrasaun ba populasaun husi área-rurál bá iha fatin ne’ebé osan no rekursu ekonómika sentraliza ba (sidade). Nu’udar fatin iha-ne’ebé osan no rekursu ekonómika sira sentraliza ba, sidade ne’ebé de’it sempre sai hanesan kontestasaun klase ba akumula no domina sirkulasaun osan no rekursu ekonómika sira.

Ema husi munisípiu no área rurál sira mai iha Dili la siginifika katak sira-nia rai iha munisípiu maka laiha, maibé tanba hanaran Dili maka sei sentru ba buat hotu-hotu (Diliséntriku), tantu ekonomia, polítika, formasaun, aprendizajen, kursu, instituisaun, nst.

Nune’e kompete ba ema hotu-hotu mai Dili buka moris, asesu edukasaun, formasaun, kursu, nst., tanba setór estratéjiku sira hanesan edukasaun, agrikultura, saúde, iha munisípiu hakdasak. Maibé, elitista polítika sira liu husi Preman Sekretáriu Estadu Asuntu Toponímia no Urbanizasaun (P-SEATOU) ne’ebe asegura husi aparellu represivu estadu nian hanesan militar, polísia ne’ebe delek no la hanoin hetan kestaun hirak ne’e ou bele nakonu ho ignoránsia hodi duni povu maubere iha fati-fatin Dili laran no mós munisípiu balun hanesan lós sira-nia animal, la konsidera ema ho nia valór umanidade.

Makaer poder sira nakonu ho ferujen, kakutak la funsiona, maupikun la hatene jere povu nia osan hodi diversifika ekonomia to’o iha nível baze. Hanoin de’it maka ba na’uk, supa, sa’e kareta povu maubere nian, halo jeitu oioin moe laiha, nia fuan asu han tiha ona. Ida ne’e mak nu’udar hahalok elite kapitalista sira nian.

Povu maubere moris iha kapitalizmu nia okos, nu’udar komoditi ka merkadória ne’ebe hanesan valór uzu no valór troka. Valor umanidade  hanesan justisa, igualdade, konsiderasaun, respeita hirak ne’e lakon.

Se ita dehan, sira hotu tenki fila-fali ba sira-nia munisípiu, ita husu durante ita ukun an tinan ruanulu resin tolu (23) estadu liu husi governu halo saida ona iha munisípiu to’o ba área rural sira em termos de setór ekonomia (agrikultura, turizmu, indistria), kapital sosial (edukasaun, saúde, desportu) no infraestrutura (Estrada, ponte)? De faktu buat hotu hakdasak, ho nune’e mak obriga ema mai konsentra iha Dili to’o hela iha mota laran. Katak ema hirak ne’e la bulak, la beik, la pikun no la delek mai konsentra de’it iha sidade, maibé kondisaun konkreta ida mak dudu. Ida delek, beik, pikun mak estadu no governu ida agora liu husi SEATOU refere.

Sobu hela fatin nu’udar violasaun ba Direitu Subjetivu

Hela fatin (uma) nu’udar direitu báziku ka fundamental ema nian ne’ebé konstituisionalmente (Direitu Objetivu) garante nos termos do artigu 58.˚ kona “Hela-Fatin” hateten katak “Ema hotu iha direitu ba nia an, nia família atu iha uma ida ho nia dimensaun no kondisaun di’ak, moos no konfortu atu bele iha intimidade ba ema idaidak no privasidade familiar”. Ne’e katak ema hotu iha direitu ba hela fatin hodi moris kontinua moris atu asesu ba nesesidade sira seluk hanesan edukasaun, saúde, ekonomia, seguransa, nst. Maibé, na realidade estadu halo violasaun grave ba direitu fundamental ida ne’e. Halo nia povu sira ba hela fali iha ponte okos tantu ema bo’ot no labarik sira, pior ainda feto sira, sira ba asesu hariis fatin sira iha ne’ebé lós.

Ita kestiona nune’e la’os signifika ita anti ka lakoi dezenvolvimentu, maibé ita husu dezenvolvimentu ba sé? Ba povu? Povu ida ne’ebé?  Se dzenvolimentu ne’e ba povu, hanusa mak estadu liu husi nia aparellu duni, sobu, tuku no tebe to’o kanek?

Ba povu maubere iha fatin ne’ebé de’it mak imi horik ba, atu dehan ba imi hotu katak, buat ne’ebé estadu nia aparellu sira halo ba ita tantu ideolójiku no represivu ne’e nu’udar planeadu, sistemátiku no organizadu. Ho nune’e ba povu maubere tomak ita tenki unifika an liu husi movimentu ka instrumentu polítika ida hodi bele hadau no kaer nia estadu rasik, só nune’e de’it maka bele hatúr fila-fali ukun an ida lolos hodi garante prosperidade ba ita tomak.

Ikus liu, ha’u-nia solidaridade profundu ba populasaun sira ne’ebé hetan eviksaun ilegál husi SEATOU. Iha ne’ebé imi horik ba, ha’u-nia hakuak bo’ot.

VIVA POVU MAUBERE!

VIVA VENDEDÓR AMBULANTE!

VIVA KIAK SIDADE!

A LUTA, KONTINUA!

Naimeco/Oe-Cusse, 08 de janeiru de 2025

Hakerek na’in: José da Costa Sure