Lori Moris Di’ak Ba Povu ! China Deklara Kontinua Apoia Dezenvolvimentu TL
Imajem : Primeiru Ministru Kayrala Xanana Gusmão hasoru malu ho Vise Ministra Departamentu Internasionál Partidu Komunista Chines,Sun Haiyan. Dili, 01/08/2024
SAPNewsTL, Dili – Primeiru Ministru Kayrala Xanana Gusmão hasoru malu ho Vise Ministra Departamentu Internasionál Partidu Komunista Chines,Sun Haiyan, objetivu husi hasoru malu ne’e hodi ko’alia kona ba kooperasaun dezenvolvimentu ekonómiku entre nasaun rua ba futuru.
Primeiru Ministru Kayrala Xanana Gusmão haktuir China asina ona akordu ho Timor-Leste, Nune’e hasoru malu ohin hodi afirma no asegura katak sira sei halo buat ne’ebe bele ba dezenvolvimentu ekonomia.
“Ha’u agradese teb-tebes, Ohin hasoru malu Vise Ministra Departamentu Internasionál Partidu Komunista Chines, Sun Haiyan, nia mai depois de Presidente Repúblika ba vizita sira (China), mai atu afirma katak Memorandum of Understanding (MoU) ne’ebe sira asina, atu asegura katak buat ne’ebe sira bela halo, sira sei halo liliu kona ba dezenvolvimentu”. Tenik Primeiru Ministru Kayrala Xanana Gusmão ba jornalista sira iha Palasiu Governu, 01/08/2024
Primeiru Ministru hatutan, sorumutu refere mos ko’alia kona asuntu ASEAN, kooperasaun dezenvolvimentu ekonomia entre rai rua iha futuru.
“Ohin, ko’alia asuntu em jeral, ko’alia mos asuntu ASEAN, kooperasaun kona ba dezenvolvimentu ekonómiku, Nia (Sun Haiyan) mai atu afirma katak Governu Xinés kontinua apoia ita hanesan uluk sira apoia ita”. Xanana Gusmão sublinha
Iha fatin hanesan, Vise Ministra Departamentu Internasionál Partidu Komunista Chines,Sun Haiyan informa vizita Presidente Repúblika Jose Ramos Horta sira Xina ne’e asina ona nota entendimentu kona ba kooperasaun servisu ba futuru.
“Ha’u mai nu’udar Vise Ministra Departamentu Internasionál, ita boot sira nia Presidente Repúblika (Jose Ramos Horta) ba hasoru Xi Jinping (Presidente Xina), enkontru ne’e susesu tebes, asina MoU, konsensu ba kooperasaun iha futuru entre nasaun rua, Presidente na’in rua asina akordu ba dezenvolvimentu entre nasaun rua nian”. Sun Haiyan deklara
Sun Haiyan reafirma, China nia apoia ba Timor-Leste sei kontinua nafatin hanesan uluk apoia ba independénsia, nune’e bele servisu hamutuk no lori moris diak ba povu rai rua nian.
“Ohin hasoru malu ho Primeiru Ministru, ami halo diskusaun ne’ebe diak tebes kona ba parseria, China sempre hamrik ho Timor-Leste iha istória luta Timor-Leste nian ba ukun an, no dezenvolvimentu. Tan ne’e China no Timor Leste sei servisu hamutuk hodi lori moris diak ba povu husi nasaun rua ne’e.” Sun Haiyan hakotu
Enkuantu, sorumutu entre Primeiru Ministru Kayrala Xanana Gusmão hasoru malu ho Vise Ministra Departamentu Internasionál Partidu Komunista Chines,Sun Haiyan ne’e hala’o iha gabinete fronteira terrestre no marítima Palásiu Governu Dili.
Jornalista : Marciana da Conceição